Ирон адæмы амæттæгты рухс нæмттæ ссардзысты иу уысм æмырæй алæугæйæ, Хуыцаумæ бакуывдтытæ æмæ 13 Коммунары цырты раз дидинджытæ сæвæрынæй.
20 июны республикæйы къухдариуæгад, Хицауады уæнгтæ дидинджытæ сæвæрдзысты 13 коммунары цырты раз – ахæм уынаффæ ист æрцыд республикæйы зæрдылдарæн бонты фæдыл паддзахадон къамисы рабадты. Дидинджытæ сæвæрыны церемони райдайдзæн 12 сахатыл. Кæй фæнды, уымæн йæ бон у æрбацæуа æмæ ссара геноциды амæттæгты рухс нæмттæ.
13 сахатыл Мады Майрæмы æмæ Сыгъдæг Æртиуон аргъуанты уагъд æрцæудзысты Хуыцаумæ бакуывдтытæ ирон адæмы геноциды амæттæгты фæдыл.
13 сахатыл æппæт республикæйы иу уысм æмырæй алæугæйæ, ссардзысты амæттæгты рухс нæмттæ. Паддзахадон тырысатæ бынмæ æруадздзысты.
Курæг стæм æппæт цæрджытæй, цæмæй нæ хъайтар фыдæлты мысынадмæ равдисой бæрнон ахаст. Автотранспорты шофыртæ æмæ фистæгæй цæуджытæ 13 сахатыл хъуамæ æруромой се змæлд æнæаххос амæттæгты мысынады нысанæн.
