25 январы Хуссар Ирыстоны Паддзахадон Университеты уагъд æрцыд цытджын ма-дзал – Президенты æрвылазон фембæлд студенттимæ.
РХИ-йы Президент Тыбылты Леонид Студенты боны цытæн арфæ ракодта ХИПУ-йы æппæт студенттæн.
– Алы аз дæр æй æнæнизæй æмæ хъæлдзæгæй цы нысан кæнат, уый амонд уæ уæт. Фæнды мæ, цæмæй фæсивæд размæ цæуой. Сымах стут нæ сомбон, æмæ нæ сомбон та ис уæ къухты, – банысан кодта уый.
Фембæлд рауад цымыдисон. Студенттæ райзæрдæйæ сæмбæлдысты, ног ахуыры азы ног бæстыхайы кæй ахуыр кæндзысты, уыцы цауыл.
«Дзырд уын дæттын, æмæ нын тагъд рæстæджы фадат кæй уыдзæн фембæлын ног актон залы», – загъта Президент.
Тыбылты Леонид студенттимæ зæрдæбын ныхасы рæстæджы рахицæн кодта уыдонæй сæ иуы. Джиоты Любовь ма ацы бон нысан кодта йæ райгуырæн бон дæр, æмæ йын балæвар кодта дидинджыты баст дæр. Дидинджыты баст ма балæвар кодта ноджы иу студенткæйæн, уый та хæссы, Студенты бон кæй ном хæссы, уый Татьянæ. Йæ мыггаг – Тедетæй.
Студентон советæн Президент бакодта хицæн лæвар. Иттæг хорз чи ахуыр кæнынц æмæ университеты царды активон хайад чи исынц, уыдонæн лæвæрд æрцыд президентон стипендитæ. Ахæм стипенди студенттæн паддзахады сæргълæууæг радта йæхæдæг.
Президентон стипенди ныртæккæ у фондз мин сомы. Фембæлды рæстæджы Президент йæ æххуысгæнджытæн бахæс кодта, цæмæй бацæттæ кæной барамынд президентон стипенди фондзæй авд мин соммæ фæфылдæр кæныны фæдыл.
Фембæлды студентты цымыдис кодтой нæ республикæйы социалон-экономикон æмæ æхсæнадон-политикон къабæзтæм хауæг фарстытæм. Æмæ уыдон истой æргом дзуаппытæ æппæт фарстытæн дæр.
Университеты ректор Тедеты Вадим студентты хъусдард аздæхта, зæгъгæ, æхсæ-нады цæуы ахсджиаг æмæ вазыгджын процесс, æввахс кæнынц президентон æв-зæрстытæ. Ныридæгæн бирæтæ агитаци кæнынц æргомæй закъоны домæнтæ халгæйæ. Уый фæстиуæгæн президент сиды æппæт æхсæнадон тыхтæм дæр, цæмæй æвзæрстытæ ацæуой сабыр уа-вæры.
Паддзахадон университеты архайы ансамбль «Сæрмæт», кæцы йæ куыст кæнын райдыдта Президенты æххуысы фæрцы. Паддзахады сæргълæууæг сын баххуыс кодта уæлæдарæс æмæ музыкалон инструменттæ самал кæныны. Ансамблы къухдариуæггæнæг Тедеты Ацæмæз студентты номæй бузныджы ныхæстæ загъта Президентæн, кæй сæм цæуы ахæм хъусдард, уый тыххæй.
Студентты, куыд фидæны специалистты, цымыдис кодта куыстæй ифтонг кæныны фарст. Дзуаппытæ æнæратгæ нæ уыд, фæсивæды цардимæ баст чи у, ахæм фарстытæн дæр. Зæгъæм, ацы фæдыздæхты цавæр куыст цæудзæн, паддзахады сæргълæууæджы ма ногæй Президентæй куы равзарой, уæд. Кæй зæгъын æй хъæуы, студентты цымыдис кодта стипендиты фарст дæр. Фембæлд фæцис ахсджиаг æмæ йæ мидис арф кæмæн у, ахæм фарстæй, зæгъгæ, цы у бæстæйы национ идеяйы мидис.
«Мах хъæуы бахъахъхъæнын нæ традицитæ, æмæ культурæ. Хъæуы сæ æрфидар кæнын нæ хæдбар паддзахады. Нæ хъæуы ивын нæ рæсугъд æгъдæутты, цæмæй сæфты къахыл ма ‘рлæууой. Иры фарны суадон, цæмæй йæ бынæй абуза, ууыл зæрдæбынæй хъуамæ кусой нæ абоны фæлтæр»,- банысан кодта Президент.
ДРИАТЫ Лейла
Comments are closed, but trackbacks and pingbacks are open.