Республикæ Хуссар Ирыстоны Культурæйы министр Зæгъойты Рада ацы бонты хайад райсдзæнис X-æм æхсæнадæмон культурон форумы, кæцы уыдзæн Уæрæсейы Федерацийы цæгаттаг столицæ – Санкт-Петербурджы. Ацы уæрæхмасштабон форуммæ министры фæхуыдта Уæрæсейы Федерацийы Культурæйы министр Ольга Любимова. Уый тыххæй нын фехъусын кодтой РХИ-йы Культурæйы министрады пресс-службæйы.
Уæрæсейы культурон столицæйы Æхсæнадæмон форум радон хатт æрбамбырд кæндзæн бирæ бæстæты культурон организациты минæвæртты æмæ ацы фадыджы зындгонд архайджыты. Форум йæ куыст райдайдзæн 11-æм сентябры æмæ аххæсдзæн 14-æм сентябрмæ.
«Зæгъойты Радæйы доклады ахæм темæ у: «Перспективы международного культурного сотрудничества». Уымæй дарддæр ма плангонд цæуы, цæмæй нæ республикæ æмæ Уæрæсейы Федерацийы Культурæты министртæн уа фембæлд», – банысан кодтой пресс-службæйы.
Форумы программæйы фæлгæтты цалдæр боны дæргъы организацигонд цæудзысты тымбыл фынгтæ æмæ дискусситæ, цæмæй æппæт хайадисджытæ æруынаффæ кæной культурон политикæйыл æмæ æхсæнадæмон æмгуыстады райрæзты фарстатыл.
Ивгъуыд аз дæр Хуссар Ирыстоны Культурæйы министр Зæгъойты Рада хайад райста IX-æм Дунеон культурон форумы. Уæд Ольга Любимоваимæ Зæгъойты чызг официалонæй сæ къухтæ бафыстой 2024-2026 азтæн æмгуыстады программæйыл. Уый уыдис стыр цау культурæйы къабазы, уымæн æмæ ацы хъуыддаг сбæрæг кæндзæн ног фæдыздæхтытæ æмæ ахъаз уыдзысты нæ республикæйы культурæйы райрæзтæн дæр.
Уæрæсейы Федераци æмæ Хуссар Ирыстоны æмгуыстадæн культурæйы фадыджы ис активон размæцыд. Нæ бæстæты æхсæн æнтыстджынæй реализацигонд цæуынц проекттæ дыууæфарсон культурон мадзæлтты фæлгæтты æмæ проект «Большие гастроли»-йы руаджы. Нæ республикæйы сфæлдыстадон коллективтæ хайад райсынц Уæрæсейы Федерацийы хуыздæр культурон фæзуæтты æмæ уымæн ис стыр нысаниуæг.
Нæ уацх.
