Республикæ Хусссар Ирыстоны Хицауады Сæрдар Пухаты Эрик йæхимæ райста Республикæйы Хъæууон хæдзарады министр Пухаты Лев æмæ Мидхъуыддæгты министр Наниты Игоры. Уыдон хыгъд радтой æрдæг азæн сæ бакæнгæ куысты тыххæй.
Хъæууон хæдзарады министрад
Пухаты Лев банысан кодта, зæгъгæ, хъæууонхæдзарадон продукцийы сæйраг аразджытæ сты зæхкусæгон-фермерон хæдзарадтæ, уыдонæн æххуыс кæныны хъуыддаг паддзахад сæвæрдта ахсджиагдæр бынаты.
Хицауады Сæрдар бацымыдис кодта, хуымзæххыты бæрц æмæ æфснайæн куыстытæ куыд цæуынц, уымæ.
Информацимæ гæсгæ, зæхкусæгон-фермерон хæдзарадтæ æмæ арендатортæ Ленингоры районы байтыдтой 1200 гектары зæхх, Знауыры районы – 1000 гектары, Цхинвалы районы – 200 гектары онг.
Райдыдтой тыллæг æфснайæн куыстытæ дæр. Ленингоры районы æмбырд æрцыд 150 гектары хор. Фермертæн хъæууонхæдзарадон продукци æмбырд кæнынæн æххуыс кæны Паддзахадон унитарон куыстуат «Ирагпромсервис». Механизацигонд куыстыты аргъ фермертæ фидынц 35 проценты, иннæ суммæ та – паддзахад.
Уымæй уæлдай ма, министр фехъусын кодта, зæгъгæ, азы фыццаг æмбисы уагъд æрцыдысты профилактикон мадзæлттæ, кæцытæ развæлгъау сбæрæг кæнынц хæдзарон фосыл тæссаг инфекцион низты уæвынад æмæ парахатдзинад.
Ныхас цыд хъæууон хæдзарады фадыджы контролон-цæстдарæн мадзæлттыл, кæцытæ уагъд цæуынц планон режимы.
Министрад æнгом æмгуыст кæны Цæгат Ирыстон-Аланийы коллегæтимæ хъæууон хæдзарады нысанæн зæххыты картæтæ саразыны хъуыддаджы æххуысы фæдыл, агрохимикон анализтæ ауадзын æмæ агрохимикон паспорт райсыны тыххæй.
Фембæлды рæстæджы ма нысан æрцыд, зæгъгæ, Хъæууон хæдзарады министрад тамож-нæйон сужбæ æмæ цæстдарæн органтимæ æппæт уавæртæ кæй аразы фыдыбæстæйон продукци хуссарирыстойнаг-уæрæсейаг арæныл æнæцæлхдуртæй ласыны тыххæй.
Мидхъуыддæгты министрад
Наниты Игорь банысан кодта, зæгъгæ, ахæм фыдракæндты хуызтæ, куыд æхсæнадон фæтк халын, давын, исад куынæг кæнын, амарын, уæззау буарон зиæнттæ ракæнын, æнахъомты фыдракæндтæ, наркотиктæ æвæрын æмæ сæ парахат кæныны нымæц къаддæр кæнынц.
Барадхъахъхъæнæг органты фæрцы иуварс æрцыд республикæйы территорийыл уæззау наркотиктæй пайда кæнын æмæ уæй кæныны хъуыддаг.
Республикæйы фæндæгты авариты тыххæй дзургæйæ, министр банысан кодта, зæгъгæ, фæндагон æнамонд цауты нымæц фæкъаддæр, уыцы нымæцы уæззау цаутæ дæр, кæцы баст у фæндагон-постон службæйы материалон-техкникон базæ фæхуыздæр кæныныл, структурон дæлхæйтты æмæ персоналон бæрндзинадыл фæткон архайады æмвæзад фæбæрзонддæр кæнынимæ.
«Республикæйы мидхъуыддæгты органты фыццаградон хæстæ, кæй зæгъын æй хъæуы, сты уагæвæрд æмæ закъондзинад ифтонг кæныны фарстытæ, кæцытæн се скъуыддзаг кæнын баст у æхсæнадимæ, хицауады æххæсткæнынадон æмæ закъондæттæн къабæзтимæ констурктивон æмархайдыл», – банысан кодта Пухаты Эрик.
Comments are closed, but trackbacks and pingbacks are open.