Нæ республикæйы фæстаг азты уæлдай стырдæр хъусдард здæхт цæуы æрыгон фæлтæртæн раст хъомылдзинад радтынмæ. Уый фæдыл знон Хуссар Ирыстон-Паддзахад Аланийы ахуырад æмæ зонады министр Гасситы Натали дзуаппытæ лæвæрдта мыхуыры кусджыты фарстытæн.

– Фæуд кæны зæронд, 2017 аз. Цахæм æнтыстытимæ æмбæлут ног, 2018 азыл?

– Раст у, фæуд кæны зæронд аз, фæлæ ахуыры къабазы кусджытæн та у азы æмбис. Уымæ гæсгæ дзурын дæр æмбæлы рацæугæ рæстæджы тыххæй. Уый та мæгуырау нæ уыди.

– 2016 ахуыры аз цæмæй хицæн кæны 2017 ахуыры азæй?

– Алы ахуыры аз дæр ахуырады къабазы æрцæуы ивындзинæдтæ. Кæй зæгъын æй хъæуы, уыцы ивындзинæдтæ вæййынц хорзæрдæм. 2016 азы не скъолаты, уымæй размæ азтæм абаргæйæ, хуыздæр ацыдысты алыгъуызон темæтыл конференцитæ, тымбыл фынгтæ. Алы хатт дæр сæм цыдыстæм цæттæйæ. Æнтысгæйæ цыдысты тематикон олимпиадæтæ. Не скъолаты ахуыргæнинæгтæй бирæтæм стыр æвзыгъддзинæдтæ ис бæлвырд зонæдты ‘рдæм. Уый тынгдæр фæбæрæг цы олимпиадæтæ уагътам, уыдон рæстæджы. Не скъоладзаутæй бирæтæ баулæфыдысты сывæллæтты улæфæндæтты.

– Ног азы Хуссар Ирыстон-Паддзахад Аланийы ахуырады къабазы æрцæудзæнис стыр цау – байгом уыдзæнис нæ паддзахадон университет, цахæм æнкъарæнтимæ йыл æмбæлут?

– Раст у, нæ адæмы царды уый стыр цау у. Уымæн æмæ уый у нæ паддзахады иунæг уæлдæр ахуыргæнæндон. Не студентон фæсивæдæн уыдзæнис æмбæлон фадæттæл, цæмæй сæ зонындзинæдтæ рæзой, кæной хуыздæрæйхуыздæр.

– Дзурынц, зæгъгæ, нæ университеты уыдзæнис Цæгат Ирыстоны паддзахадон университеты филиал. Цас раст у ацы хъуыды?

– Нæу раст. Æз ацы хъуыды хъусын фыццаг хатт.

– Ног 2018 азы ахуырады къабазы Инвестпрограммæйы архайд цахæм уыдзæнис?

– Инвестпрограммæйы фæлгæтты ацы аз нæ горæты скусдзæнис сывæллæтты дыууæ рæвдауæндоны. Сæ иу – Вокзалгæрон, иннæ та – Суворовы уынгыл. Æхсызгон уый у, æмæ азæй азмæ кæй фылдæр кæны нæ республикæйы сывæллæтты нымæц. Абон чи кусы уыцы рæв-дауæндæттæ се ппæт дæр сты дзаг. Рады дæр лæууы бирæ сабитæ.

– Ахуыргæнинæгты ‘хсæн цахæм куыст цæуы цæмæй зоной æмæ аргъ кæной сæ адæмы, сæ фыдæлты æгъдæуттæн?

– Уый ахсджиаг хæс у æмæ йæ не скъолаты ахуыргæнджытæ дæр нымайынц æнæмæнгхъæуæгыл. Фыдæлты хъæбатырдзинæдтыл дзургæйæ сын уарзын кæнæм радтæг адæмы истори. Уарзын сын кæнæм нæ фыдæлты дæрæс. Ирыстоны ахсджиаг æмæ нысаниуæгджын бæрæгбонты тыххæй скъолаты уагъд æрцæуы алыгъуызон мадзæлттæ. Курдиатджын скъоладзаутæн кæнæм æххуыс. Ахæмты нымæц азæй азмæ кæны фылдæр. Ацы аз ма фæнд кæнæм, цæмæй Æрыгон натуралистты станцы байгом кæнæм туризмы хайад.

– Цахæм у сывæллæтты рæвдауæндæтты хæлцады фарст та?

– Алы сывæллоны боны хæлцы хиаргъ у 47 сомы. Уырдæм хауынц фыццаг, дыккаг æмæ æртыккаг хæрды хæринæгтæ. Афтæ ма дыргътæ æмæ халсæрттæ. Сывæллæтты рæвдауæндæтты фарст хауы горæты æмæ районты разамындмæ, фæлæ сæм мах дæр дарæм нæ хъус.

– Скъолаты æмæ сывæллæтты рæвдауæндæтты цахæм уавæры ис нуазыны донæй ифтонгад?

– Цалдæр скъолайы æвæрд æрцыдис, сывæллæттæ сыгъдæг дон кæцæй нуазой, ахæм мигæнæнтæ. Кæм нæй, уым дæр æвæрд æрцæудзыстыс. Сывæллæтты рæвдауæндæтты сабитæн та лæвæрд цæуы æхсыст дон.

– Цахæм уыдзæнис  уæ дзуапп оптимизацийы тыххæй та?

– Оптимизаци уагъд цæуы, уæлдайдæр та хъæууон скъолаты, фæлæ æгуыст никæйы ныууадзæм. Хъæуты бирæ кълæсты ахуыр кæны дыгай, æртыгай ахуыргæнинæгтæ, уагъд сын фæцæуы иумæйаг уроктæ. Къостайы хъæуы астæуккаг скъолайы дæр цæуы оптимизаци. Скъола æмæ рæвдауæндонæн ис иу директор.

– Не скъолаты куыд кусы информатикæйы фæдыл ахуыры программæ?

– Ацы программæйæн фæрæзтæ куы нæ уа, уæд кусдзæнис зынтæй, йæ фæстиуæг нæ уыдзæнис ахадгæ. Программæ арæзт æрцыдис. Ныр цæмæй æххæстбæрцæй скуса, уый тыххæй хъæудзæн бакусын.

Гæззаты Иван

Comments are closed, but trackbacks and pingbacks are open.