Хæдзардзин зæхкусæгæн афæдзы алы рæстæг дæр зынаргъ у, уый кæддæриддæр куыстыл лæуд вæййы. Афтæ куы базмæлы, уæд йæ фæззæджы бæркад дæр зæрдæйы фæндиаг вæййы æмæ дарддæр дæр фæтырны ногдæр æнтыстытæм. Хъаруджын æмæ куыстуарзаг сты Ленингоры районы хоргуыстгæнджытæ дæр, ацы бонты сты æнæвдæлон. Цы нæмыгон культурæтæ байтыдтой уалдзæджы, уыдоны тыллæг цыбыр æмгъуыдты бабæстон кæнынмæ. Тракторон бригадæйы бригадир, механизатор Габиты Хвичайы куыстуарзаг механизатортæ ныр къуыримæ æввахс кæнынц хуымгæрдæны куыст æмæ сæ хъазуатон архайды фæстиуæгæн сæ къухты æфты зæрдæрухсгæнæн фæстиуджытæ. Зæгъын хъæуы, райдианы цалдæр боны акуыстой, стæй æрлæууыдысты, къæвдатæ кæй ахаста, уый аххосæй. Фæлæ та куыддæр, кусынæн бæзгæ бонтæ скодта, афтæ та сæ комбайнтæ балæууыдысты кæрдинаг хуымты. Ныр цалдæр бон Цъинагар æмæ Орчъосаны хъæутæй хъуысы комбайнерты æнæзæрдæхудт фæллой.
Бæрæг куыд у, афтæмæй æфсирон культурæтæй раздæр кæрдынæн сбæззы хъæбæрхоры культурæ. Уымæй уал цыбыр рæстæгмæ æркарстой 200 гектармæ æввахс. Хуымгæрдæны хъазуатон фæллой кæнынц комбайнертæ Хуриты Сослан, Мæргъиты Бесик æмæ бригадир Габийы фырт йæхæдæг. Гектарон тыллæгæрзад астæуккаг нымадæй у 17-20 центнеры æмæ уый мæгуырау фæстиуæг нæу ацы хойрагон культурæйæн. Куыддæр ацы хуымтæ æфснайд фæуой, афтæ та бавналдзысты иннæ фæзуæттæ æфснайынмæ. Уымæй дарддæр механизатортæ Дриаты Звиад, Хуриты Зураб æмæ Гусойты Валери та кусынц хъæмп пресс кæныныл. Хуымгæрдæн æмæ холлаг æфснайыны куыстытæ дарддæр дæр ацы комбæсты цæуынц æнтысгæйæ.
Бригадир райгонд у «Ирагропромсервис»-ы директор Мамытаты Вахтъангæй, æмбæлон хъусдард сæм кæй здахы, æнтысгæ куыстæн сын сæ къух кæй аразы, уый тыххæй.
Хуыбиаты Никъала
