“20-21 июны Цхинвалы районы Дменисы хъæуы медицинон амбулаторийы уагъд цæудзæнис цæрджыты диспансеризаци», – фехъусын кодта Æнæнæниздзинад хъахъхъæныны министрады пресс-службæ.
Дменисы амбулаторимæ ацæудзысты невролог, хирург, окулист, гинеколог, уролог æмæ эндокринолог.
Басгæрсты фæстиуджытæм гæсгæ дарддæр хос кæндзысты сбæрæггонд низтæн. Специализацигонд æмæ бæрзондтехнологион æгъдауæй хос кæнын кæй хъæуа, уыдон та æрвитдзысты Уæрæсейы медицинон центртæм, РХИ-йы Æнæниздзинад хъахъхъæныны æмæ УФ-йы хицауады ‘хсæн 2017 азы цы сразыдзинадыл æрфыстæуыд къухтæ, уый фæлгæтты.
Диспансеризацийæн йæ нысан у низ афоныл сбæрæг кæнын. Уымæ гæсгæ йæм æнæзивæгæй хъуамæ цæуа алчи дæр. Ацы мадзал уагъд цыд Советон дуджы дæр. Фæлæ нырыккон диспансеризаци, раздæр чи уыд, уыимæ абаргæйæ ахадгæдæр у. Ныртæккæ УЗИ æмæ цы алыгъуызон биологон-химикон анализтæ арæзт цæуы, уый фæрцы сбæлвырд вæййынц онкологон низтæ, фыццаг, дыккаг стадийыл. Афтæмæй низы ныхмæ фæлæууын, йе сдзæбæх кæнын у æнцондæр. Фæлæ уæддæр бирæтæ зивæг кæнынц басгæрстмæ бацæуынмæ. Бирæпрофилон медицинон центр диспансеризаци фæуадзы дыууæ азы иу хатт. 2022 азы горæты поликлиникæйы дохтыртæ сарæзтой график. Фæлæ-иу поликлиникæйы фенæн уыд æрмæстдæр ацæргæ адæмы. Диспансеризаци рацæуыны нысанæн-иу дохтырты къорд æрзылдысты республикæйы районты дæр.
Медиктæ куыд зæгъынц, афтæмæй диспансеризаци уагъд цæуы Уæрæсейы Федерацийы Æнæниздзинад хъахъхъæныны министрады амындмæ гæсгæ. Сæ нысан у бæстæйы къуыстхъом адæмы æнæниздзинадмæ æркæсын, стæй зæрдæ æмæ онкологон низтæй рынчынтæ цас ис æмæ сæ уавæр куыд у, уый бæлвырдæй базонын. Уымæй дарддæр ма, канд низтæ сбæлвырд кæныныл нæ архайынц дохтыртæ, фæлæ сæ цы расайы, уый сбæлвырд кæныныл дæр. Уыдон та, бæрæг куыд у, афтæмæй сты тамако, карз нозт, иу ран бадгæйæ цардуаг, афтæ ма æнæмбæлон хæлц. Æппæт уыцы низтæ сбæрæг кæнынц диспансеризацийы рæстæджы æмæ дохтыртæ рынчынтæн бацамонынц, дарддæр сæ цы кæнын фæхъæуы, уый.
Æнæниздзинад хъахъхъæныны министрады пресс-службæ куыд зæгъы, афтæмæй дыууæ уагъд диспансеризацийы хатдзæг уыд, нæ республикæйы цæрджытæн се’мбисæй фылдæр æнæниз кæй не сты. Алы фæндзæм адæймагмæ дæр рабæрæг вæййы сæкæр æмæ зæрдæдадзинты низтæ. Æмæ ацы хабар та адæймаг рæстæгыл куы базона, уæд йæхи бахъахъхъæндзæн инфаркт æмæ инсультæй .
Вæййы афтæ дæр æмæ цыдæр аххосæгтæм гæсгæ адæймаджы нæ равдæлы дохтыртæм. Ахæмтæ хъуамæ зоной, Цæгат Ирыстон – Аланийы уой, æви Уæрæсейы искæцы регионы, уæддæр се’нæниздзинады уавæр базонынæн фадат ис, уым, бынаты, æнæниздзинады уагдонмæ бацæугæйæ æмæ диспансеризаци сараз гынæн. Дохтыртæн та сæ зæрдæ истæмæ куы фехсайы, уæд адæймаг кæм цæры, уыцы поликлиникæмæ арвитынц дзуапп.
2022 азы диспансеризаци уагътой нæ горæты сабидæттæ æмæ иумæйаг ахуырадон скъолатæй цалдæры. Медиктæ куыд зæгъынц, афтæмæй ахуыргæнинæгты ‘хсæн, сæйраджыдæр, сбæрæг сты фады низтæ, скалиоз æмæ ахсæны низтæ. Ныййарджытæ фæстæдæр дзырдтой, зæгъгæ, нæ зыдтам нæ сывæллæттæн ахæм низтæ кæй ис, уый.
УАЗÆГТЫ Марфа
