Республикæ Хуссар Ирыстоны фæсарæйнаг хъуыддæгты министр Джиоты Æхсар æмæ Никарагуайы Хуссар Ирыстоны минæвар Козаты Нариман æрæджы хайад райстой Никарагуайы бæстæйы Сандинистон революцийы уæлахизыл 45 азы сæххæсты цытæн бæрæгбонон мадзæлтты.
Президент Гаглойты Аланимæ фембæлды рæстæджы Джиоты Æхсар радзырдта Никарагуайы хæларадон бæстæмæ балцы тыххæй, куыд сæ райстой, уый тыххæй.
«Дæ бахæсмæ гæсгæ æмæ Никарагуайы президент Даниель Ортегайы фæхуындмæ гæсгæ хайад райстам бæрæгбонон цытджын мадзæлтты.
Хæларадон бæстæйы историйы ацы нысаниуæгджын бонæн ис егъау нысаниуæг. Бирæ бæстæтæй делегацитæ, уыцы нымæцы Уæрæсейы Федерацийæ, Белорусийæ, Латинаг Америкæйæ, Кубæйæ, Африкæйы бæстæтæй хайад истой мадзæлтты», – банысан кодта министр.
Уæрæсейы делегацийы сæргъ уыд Паддзахадон Думæйы сæрдар Вячеслав Володин. Минæварджын делегацийы сконды уыдысты къорд депутаттæ.
Джиоты Æхсар куыд банысан кодта, уымæ гæсгæ Хуссар Ирыстоны делегацимæ егъау хъусдард здæхт уыд. Йæхимæ сæ райста Никарагуайы президент Даниель Ортега æмæ бæстæйы вице-президент Росарио Мурильо. Фембæлдтытæ ма уыд Никарагуайы Фæсарæйнаг хъуыддæгты министр Денис Монкада æмæ инвестициты фæдыл президенты уынаффæгæнæг Лауреано Ортега Мурильоимæ. Лауреано Ортега сæ лæмбынæг базонгæ кодта Никарагуайы экономикон уавæр, экспортон потенциал, инвестицитæ æмæ бизнесы куысты уавæртимæ.
Арфæйы ныхæстæ загъта министр Никарагуа æмæ Венесуэлæйы Уæрæсейы дипломатон минæварадтæн, сæ егъау хъусдард æмæ сæ хъарм райсты тыххæй, зæрдиаг арфæ ракодта Хуссар Ирыстоны Уæрæсейы Федерацийы минæвар Марат Кулахметовы номыл – сæ балцæн сын кæй баххуыс кодта, уый тыххæй.
Кæронбæттæны министр загъта, зæгъгæ, æппæт фембæлдтытæ дæр уыдысты мидисджын.
Уæрæсейы Федерацийы фæстæ Хуссар Ирыстоны паддзахадон хæдбардзинад банымайæг бæстæтæй Никарагуа уыд дыккаг. Уымæ гæсгæ мах стыр аргъ кæнæм сæ хæрзиуæгон архайдæн æмæ къахдзæфæй-къахдзæфмæ рæзын кæндзыстæм хæларадон бæстæимæ нæ ахастытæ.
Джиоты Æхсары ныхæстæм гæсгæ, никарагуайаг бæстæ цымыдис кæны нæ республикæимæ алы фадгуыты æмгуыстад рæзын кæныны хъуыддагмæ.
Уавæрæй пайдагæнгæйæ, Джиоты Æхсар бæстæйы разамонæгæн загъта Никарагуайы президент Даниель Ортегайы хъарм ныхæстæ æмæ зæрдиаг арфæтæ.
Никарагуайы разамонæг Даниель Ортегайы номæй Хуссар Ирыстоны Фæсарæйнаг хъуыддæгты министр цытджын уавæрты Гаглойты Аланæн бакодта чысыл лæвар дæр.
КЪÆБУЛТЫ Маринæ
