Владимир Путин йæ къух æрфыста медицинон фæдзæхстады тыххæй Хуссар Ирыстонимæ сразыдзинадыл

Знон, Республикæйы æдзух цæрæг уæрæсейаг æмбæстæгты фæдзæхстады организацийы фадыджы, Уæрæсейы Федерацийы æнæмæнгхъæуæг медицинон фæдзæхстады системæйы Уæрæсейы Федераци æмæ Республикæ Хуссар Ирыстоны ‘хсæн сразыдзинадыл йæ къух æрфыста Уæрæсейы Президент Владимир Путин. Уый тыххæй фехъусын кодта РИА Новости.

Зæрдыл æрлæууыны тыххæй хъусын кæнæм, æхсæнведомствойон сразыдзинадыл къухтæ фыст кæй æрцыд Уæрæсейы Федерацимæ Хуссар Ирыстоны Президент Бибылты Анатолийы официалон балцы рæстæджы. Уæд дыууæ паддзахады сæргълæуджыты хайадистæй документыл сæ къухтæ æрфыстой Уæрæсейы Федерацийы æмæ Республикæ Хуссар Ирыстоны æнæниздзинад хъахъхъæныны министртæ Вероника Скворцова æмæ Тотчиты Георги.

Сразыдзинадмæ гæсгæ Æнæмæнгхъæуæг медицинон фæдзæхстады Федералон фонды руаджы æдзух Хуссар Ирыстоны чи цæры, уыцы уæрæсейаг æмбæстæгтæ хаст æрцæудзысты Æнæмæнгхъæуæг медицинон фæдзæхстады фæдыл фæдзæхстæрцæуæг адæймæгты реестрмæ. Сразыдзинадмæ гæсгæ уыцы æмбæстæгтæн Уæрæсейы Федерацийы медицинон организациты æххуыс сорганизаци кæныны функцитæ æххæст кæны Цæгат Ирыстон. Уый фæстиуæгæн сразыдзинады реализацийы фæлгæтты Республикæ Цæгат Ирыстон – Алани федералон бюджетæй райсдзæн уæлæмхас æфтиæгтæ.

«Фæнд цæуы Республикæ Цæгат Ирыстон – Аланийы Æнæмæнгхъæуæг медицинон фæдзæхстады Федералон фонды территориалон бюджетмæ Æнæмæнгхъæуæг медицинон фæдзæхстады Федералон фондæй субвенцитæ фæфылдæр кæнын æмæ федералон бюджеты бюджетон ассигнацитæ РЦИ – Аланийы бюджетæн рахицæн кæнын банысангонд æмбæстæгты фæдзæхстон бавæрдтыты финансон ифтонгадæн», – нысан æрцыд, сразыдзинадимæ цы æмбарынгæнæн фыстæг уыд, уым.

Йæхи рады Хуссар Ирыстон Æнæмæнгхъæуæг медицинон фæдзæхстад дæттыны пункттæ араздзæн республикæйы æдзухæй цæрæг Уæрæсейы Федерацийы æмбæстæгтæн.