Тематикон изæр
1960-1980 азты Советон Цæдисы интеллигенцийы минæвæрттæй адæмы ‘хсæн йæхицæн æнусон кад чи скодта, уыдонæй иу уыд Владимир Высоцкий. Уарзгæ та йæ бакодтой йæ хъæздыг курдиат æмæ адæммæ йæ хорз ахасты тыххæй. Уый йе ‘мдзæвгæты сæйраджыдæр æвдыста рæстдзинад. Фыста сыл музыкæ æмæ сæ зарыд. Советон Цæдис куы фехæлд, уæд адæмтæн сæ сæйрагдæр аразинæгтæ систы, цæмæй уæззау дуджы сæхи рахæссой. Уавæр ахæм кæй уыдис, уый тыххæй зындгонд адæймæгты номарæн изæртæ арæзт цыдысты къаддæр. Уæд къаддæр кодтой В.Высоцкийы кой, фæлæ уавæр куыддæр фæхуыздæр, афтæ йæ мысын райдыдтой арæхæй-арæхдæр.
25 январы В.Высоцкийы райгуырдыл 80 азы кæй сæххæст, уый сæраппонд информацион агентад «Спутник»-ы ауагъд æрцыдис мысæн изæр. Ардæм æрбацыдысты ахуыргæндтæ, студенттæ, В. Высоцкийы сфæлдыстад чи уарзы, стыр аргъ ын чи кæны, уыдон. Фембæлд байгом кодта æмæ йæ уагъта информацион агентад «Спутник»-ы нымæрдар Гæджиты Аидæ. Уый банысан кодта, зæгъгæ, В. Высоцкийы алчи дæр уарзта, фæлæ йын йе сфæлдыстадæн стырдæр аргъ кæнынц, йæ рæстæджы чи цард, уыдон, æмæ адæмы размæ рахуыдта Хуссар Ирыстоны сгуыхт артист Гугкаты Эвелинæйы. Уый банысан кодта, зæгъгæ, мын æхсызгон у Владимир Высоцкийы мысæн изæрмæ мæ кæй æрбахуыдтат æмæ дзы хайад кæй исын, уый. Ирыстоны В.Высоцкийы хорз чи зоны, уыдонæй иу дæн æз. Мæскуыйы театралон ахуыргæнæндоны ахуыр кодтам иумæ. В.Высоцкий ма сæрæгас куы уаид, уæд уæлдай цин бакæнид, абон ын Ирыстоны йæ гуырæнбон кæй нысан кæнæм, уый тыххæй. Уымæн æмæ театралон ахуыргæнæндоны В.Высоцкийы алыварс уыдысты уыцы ахуыргæнæндоны ирон студенттæй бирæтæ. Уыдонимæ йын уыд стыр хæларадон ахастытæ. В.Высоцкий стыр аргъ кодта Къостайы сфæлдыстадæн. Арæх зарыд уый æмдзæвгæтыл фыст зарджытæ, каст сæ æхсызгонæй», – дзырдта Эвелинæ.
В.Высоцкий йæ ахуыр куы фæцис, уæд бирæ рæстæджы уыд æгуыст æмæ æвзæрста къорд зындзинæдтæ. Фыццаг уый, æмæ йе ‘мдзæвгæты фылдæр хай рæстдзинад æмæ хуымæтæг адæмы бартыл фыст кæй уыдысты, уый тыххæй нæ цыдысты иуæй-иу адæймæгты зæрдæмæ. Аннæмæй та В.Высоцкийæн бастдзинæдтæ уыд фæсарæйнаг бæстæты хицæн æмбæстæгтимæ æмæ йын уый дæр дардтой йæ цæстмæ. Йæ царды æнтыст куы фæзынд, уæд йæ царды уавæртæ бæстон фæхуыздæр сты, æмæ йæ уæд адæм дæр банымадтой, ссис зындгонд.
Ахæм уыди изæры хайадисджыты хъуыды.
Изæры ма раныхас кодтой æмæ цалдæр зарæджы сæххæст кодтой зарæггæнджытæ, не ‘мзæххон Авагимов Валери æмæ нæ горæты уазæг, горæт Геленджикы цæрæг Андрей Курила. Уыдонæй алчи дæр азарыд йæхи фыст зарджытæ, стæй дзырдтой сæ уарзондзинадыл В. Высоцкимæ, куыд поэт, зарæггæнæг æмæ æмбæстаг, афтæ.
Гæззаты Иван
Comments are closed, but trackbacks and pingbacks are open.