РÆСУГЪДДЗИНАДÆЙ ИСГÆ АМОНД ÆМÆ ЦИНДЗИНАД

Хетæгкаты Къостайы номыл Хуссар Ирыстоны паддзахадон драмон театры уагъд ӕрцыдис Уӕрӕсейы Федерацийы сгуыхт артисткæ Нонна Гришаевайы сфӕлдыстадон изӕр «Падаю вверх», зӕгъгӕ, ахӕм номимӕ. Мадзалмӕ ӕрбацыдысты Паддзахады сӕргълӕууӕг Бибылты Анатоли, Уӕрӕсейы Федерацийы ӕххӕстбарджын минӕвар Хуссар Ирыстоны Марат Кулахметов, нӕ Республикӕйы «Россотрудничество»-йы минӕварады сӕргълӕууӕг Сергей Скворцов ӕмӕ ӕндӕртӕ.

Мадзалы райдианы Нонна Гришаева загъта, зӕгъгӕ, йын тынг ӕхсызгон у хуссарирыстойнаг театры сценӕмӕ рахизын, «уӕлдайдӕр та ам ис Хуссар Ирыстоны Президент Бибылты Анатоли. Ӕз ӕнӕкӕрон бузныг дӕн «Россотрудничество»-йы организацийӕ, уӕлдайдӕр та Сергей Скворцовӕй Хуссар Ирыстонмæ мӕ кӕй фæхуыдтой, уый тыххӕй», – загъта Нонна Гришаева.

Уый залмӕ ӕрбацӕуджытӕн цыбыртӕй радзырдта йӕ тӕлмӕнты тыххӕй Хуссар Ирыстонмӕ цӕугӕйӕ. «Ардӕм  цӕугӕйӕ, ӕз цы рӕсугъддзинад федтон, ууыл сымах сахуыр стут, фӕлӕ махӕн та хӕссы амонд ӕмӕ циндзинад. Кӕддӕр Владимир Высоцкий куыд загъта, зӕгъгӕ, «Лучше гор могут быть только горы» раст афтӕ. Ӕмбарын ӕй бирӕ зындзинӕдтӕ кӕй бавзӕрстат, фӕлӕ горӕтыл азилгӕйӕ, ӕз федтон – республикæ кæй æндидзы, арæзт кæй цæуынц скъолатæ ӕмӕ ӕндӕртӕ, уыдон дзурӕг сты, цард дарддӕр кӕй кӕны», – банысан кодта актрисӕ.

Сфӕлдыстадон изӕр рауад тынг цымыдисон ӕмӕ хъӕлдзӕг, актрисӕ сӕххӕст кодта цалдӕр зарæджы, бакаст йӕ уарзон фысджыты ӕмдзӕвгӕтӕй. Сценӕйы стыр экраныл ӕвдыст ӕрцыд зарӕг «Танго»-йы клип, кӕцыйы автор у Нонна Гришаева йӕхӕдӕг. Ӕвдыст ма дзы ӕрцыдысты кинофильмтӕ ӕмӕ спектаклтӕй скъуыддзӕгтӕ Нонна Гришаевайы хайадистӕй, куыд зӕгъӕм «Служу Советскому Союзу», «День радио», «Zолушка», «Тот еще Карлсон», «Непридуманная жизнь» ӕмӕ ӕндӕртӕй. Уӕлдай зӕрдиагдӕрӕй актрисӕ бакаст Валентин Гафты чиныгӕй ист номарӕнтӕ Высоцкий ӕмӕ Раневскийы тыххӕй.

Нонна Гришаева мадзалмӕ ӕрбамбырдуӕвджытӕн дзырдта кинематографийы тыххӕй, афтӕ ма сын дзуаппытӕ лӕвӕрдта сӕ фарстытӕн дӕр.

«Мӕн арӕх бафӕрсынц, зӕгъгӕ, артист суӕвын кӕй фӕнды, уый йӕхи куыд бацӕттӕ кӕна? Мӕ дзуапп сын кӕдфӕнды дӕр вӕййы афтӕ – артист суӕвын кӕй фӕнды, уый фидарӕй хъуамӕ зона ӕнӕ уымӕй дын цӕрын ӕмӕ улӕфын зын кӕй уыдзӕн. Афтӕ чи хъуыды кӕны, зӕгъгӕ, артист суӕвын ӕнцон професси у, уыдон тынг рӕдийынц. Уый афтӕ нӕу, ӕцӕг артисттӕ чи свӕййынц, уыдон нымӕц бирӕ нӕ вӕййы. Хуыцауӕй ратгӕ курдиат кӕмӕн ис, уыдон хӕрзчысыл сты, уымӕй дарддӕр ма хъӕуы тынг бирӕ фыдӕбон кӕнын, кусын. Кӕд ӕй аскъуыддзаг кодтат, уӕд уӕ программӕ хъуамӕ уа алыварсон, ирд», – банысан кодта Гришаева.

Мадзалы фӕстӕ паддзахады сӕргълӕууӕг Бибылты Анатоли бузныджы ныхӕстӕ загъта «Россотрудничество»-йы минӕварадӕн Хуссар Ирыстоны уавӕртӕ кӕй аразынц ӕмӕ сæ фæрцы кæй ӕмбӕлӕм ахӕм курдиатджын артисттыл куыд Нонна Гришаева. «Стыр бузынг уын зӕгъын, ахӕм сфӕлдыстадон изӕр кӕй бацӕттӕ кодтат, уый тыххӕй. Культурӕ у змӕлд, кӕцы домы иугæндзон рæзт æмæ кæрæдзийы фæлтæрддзинадыл ахуыр кæнын.

Кокайты Зæринæ