УФ Æдасдзинады советы сæрдары хæдивæг Дмитри Медведевы ныхæстæм гæсгæ, Уæрæсейы Федерациимæ Хъырымы баиуы тыххæй Скæсæны истерион реакци, æмæ Хуссар Ирыстоны ныхмæ Гуырдзыстоны агрессийы рæстæджы ныгуылæйнаг бæстæты фарсхæцынад æркодта специалон хæстон операцимæ, уыцы бонтæ та сæхæдæг систы æнæраздахгæ.

«Раздахæн цы бонтæн нал ис, уыдон дыууæ сты: фыццаг – 2008 азы фæззæг, хуссарирыстойнаг адæмы ныхмæ Гуырдзыстоны агрессийы фарс ныгуылæйнаг дуне куы рахæцыд æмæ сæрхъæн, наркоман æмæ авантюристы уæларвмæ куы систой, кæцыйы фæстæдæр йæхи бæстæйæ фæсырдтой æмæ, æцæгæлон бæстæмæ тæппудæй куы фæлыгъд, уæд æй уырдыгæй дæр ратардтой. Дыккаг та у 2014 азы уалдзæг, Хъырымы адæм закъонон референдумы рæстæджы барвæндонæй æмæ фæндвидарæй куы загътой, Хъырым æнустæм йæ историон Райгуырæн бæстæмæ кæй раздæхт, уый», –  «Известия»-йы ныффыста Медведев.

Уый банысан кодта, зæгъгæ, уыцы цаутæ ныгуылæйнаг дунемæ сæвзæрын кодтой  æрра, æдых истери, кæцыйæн нырма дæр йæ кæрон нæ зыны.

«Уыцы дзæнгæдаимæ баиу ис русофоби æмæ Украинæйæ «Антиуæрæсе» – Франкенштейн саразыны фæндондзинад.  Уый тыххæй президент Владимир Путин фыста. Цы ма бафтауæн ис? Æрмæстдæр уый, æмæ ныгуылæйнаг бæстæты ныры æнæзонд политикты размæ цы куырыхон политиктæ уыд, уыдон афтæ дзырдтой: «Deus quos vult perdere dementat prius», ома, Хуыцау бафхæрынвæнд кæмæн скæны, уымæн уал раздæр йæ зонд фесафы», – банысан кодта Æдасдзинады советы сæрдары хæдивæг.

Уый куыд ныффыста, афтæмæй уыцы «æнæсæрфат истери» æмæ Уæрæсейы ныббызгъуыртæ кæныны æрра фæндтæ, куыдфæстагмæ, æркодтой  специалон хæстон операцимæ.

Медведевы хъуыдымæ гæсгæ, империйы уæвынады  историон логикæмæ гæсгæ, хæст хъуамæ райдыдтаид ивгъуыд æнусы 90-æм азты, фæлæ «райдыдта ныр».

«Ахæм цаутæ баст сты дунеон историйы æгъатыр æмæ карз архайдимæ. Стыр паддзахад амæлы – хæст райдайы. Тынг тыхджын сты мидæггагон ныхмæдзыдтæ æмæ хъыгтæ. Афтæмæй сæвзæры æгæйнаг национализм, примитивон хæлæгдзинад æмæ кæрæфдзинад. Кæй зæгъын æй хъæуы, империйы амæлæты фæстæ сæ сæртæ сдарынц, йæ алыварс цы бæстæтæ ис, уыдон, цæмæй йæ сæхиуыл ныддихтæ кæной, уый тыххæй. Ныр дæр ахæмтæ сты ныгуылæйнаг дунейы циникон позици æмæ англосаксойнаг цивилизацийы позици, кæцы йæ зонд фесæфта æрымысгæ миссионизмы идеяйы бындурыл», – загъта Медведев.

Comments are closed, but trackbacks and pingbacks are open.