РХИйы Хицауады Сæрдар Пухаты Эрик профилон структурæты разамонджытимæ ауагъта радон оперативон æмбырд, цыран æруынаффæ кодтой республикæйы уæлвæткон уавæрыл, республикæ æртыккаг суткæ æнæ электроэнерги кæй ис, уый фæдыл архæйдтыты координацийыл.

«Æнæмæнгхъæуæг у тагъдыл Дзомагъы комы электроадæттæн хæххыты авари аиуварс кæныны фæдыл куыстытæ сæххæст кæнын, афтæ ма стратегион æгъдауæй ахсджиаг объектты æнæкъуылымпы куыст сифтонг кæнын. Фыццаг рады кусæгон режимы хъуамæ уой хосгæнæн æмæ ахуырадон уагдæттæ, скъола-интернат æмæ Зæрæдты хæдзар», – банысан кодта Пухаты Эрик æмбырды райдианы.

Куыд банысанчындæуыд, уымæ гæсгæ æртыккаг суткæйы куыстытæ уагъд цæуынц Дзауы районы электроадæттæн бæрзондвольтон хæххыты авари аиуварс кæныны фæдыл.

«Бирæ рæстæджы дæргъы хуылыдз мит кæй уарыд, уымæ гæсгæ аваритæ æрцыдысты электроадæттæн хæххытыл. Мах ссардтам, телтæ кæм аскъуыдысты, ахæм æртæ бынаты æмæ сæ сцалцæг кодтам, фæлæ уæддæр электроифтонгад æндидзыд не ‘рцыд. Хъæуы Дзомагъы комы мидæмæ Цæгат порталы фарсырдæм бацæуын, цæмæй сбæрæг кæнæм иннæ авариты дæр. Фæлæ уырдæм бацæуын у зын стыр митуарды аххосæй, – бамбарын кодта паддзахадон унитарон куыстуат «Энергоресурс»-ы структурон дæлхайы директор Гæбæраты Анатоли. Фæндагон службæтæ Уæлвæткон уавæрты министрадимæ иумæ æххуыс кæнынц проблемæ аскъуыддзаг кæнынæн, кусæм æнæрлæугæйæ».

Профилон министрадтæ æмæ ведомствоты къухдариуæггæнджытæ Хицауады Сæрдарæн радзырдтой уæвæг проблемæты тыххæй æмæ бакуыстой архайдтыты дарддæры план. Зæгъæм, дзырд цыд æнæкъуылымпыйæ республикон рынчындон æмæ гуырæн хæдзары хъæрмад æмæ электроэнергийæ сифтонг кæныныл, дон дæттыны график æрнывыл кæнын, сывæллæтты рынчындон æмæ дзулфыцæн комбинаты генераторты хъомысад æндæр ахсджиаг объекттыл адих кæнын, æхсæнадон æдасдзинад æмæ фæтк сифтонг кæнын, æртаг-сæрдæн æрмæджыты экономонæй хардз кæныны тыххæй.

Мидхъуыддæгты министр Наниты Игорь æрæмбырдуæвджытæн фехъусын кодта, зæгъгæ, мидхъуыддæгты министрады æппæт сæрмагонд сконд раконд æрцыд службæ хæссыны фæтыхджындæргонд режиммæ, æппæт республи-кæйы фæфылдæр патрулон экипажты нымæц.

Республикæйы фыццаг æнæмæнгхъæуæг продукт – дзулæй сифтонг кæныны фæдыл Цхинвалы дзулфыцæн комбинаты директор Цхуырбаты Вадим загъта, зæгъгæ, рауадзгæ продукцийы бæрц фæфылдæр æмæ дзулæй сифтонг кæныны проблемæ цæрджытæн нæй.

Уæлвæткон уавæрты министры хæдивæг Бестауты Ацæмæз фехъусын кодта, зæгъгæ, хуссар фарсырдыгæй тъунелы онг ТРАНСКАМ-ы фадыг сæрибар у, æмæ цæгат хаймæ та æрмæстдæр абон бацис сæ бон æрæвналын зæйтæ асыгъдæг кæнынмæ. «Иууыл оптимистон прогнозмæ гæсгæ гæнæн ис æмæ изæрмæ сæ бон суа æппæт куыстытæ сæххæст кæнын, кæд æмæ мит ногæй уарын нæ райдайа, уæд», – бамбарын кодта уый.

Æмбырды фæстæ Пухаты Эрик фæндагон службæимæ ацыд Дзомагъы коммæ аварийы бынатмæ.

РХИ-йы Хицауады

пресс-службæ

Comments are closed, but trackbacks and pingbacks are open.