Паддзахад Аланийы Президент Гаглойты Алан æрæджы ауагъта æмбырд бæстæйы тыхон структурæты къухдариуæггæнджытæ æмæ бæрнон скондимæ.
Тыхон æмæ барадхъахъхъæнæг органты разамонджытæ бæстæйы разамонæджы базонгæ кодтой, республикæйы оперативон уавæр æмæ Хуссар Ирыстоны территорийыл уголовон хъуыддæгтæ куыд бæлвырд цæуынц, уыимæ.
Президент æрсидт тыхон структурæты минæвæрттæм, цæмæй æнгом æмæ фæстиуæгджын æмархайд кæной. Зæрдыл æрлæууын кодта, Советон Цæдисы ныппырхы фæстæ 90-æм азты райдианы нæ паддзахаддзинад аразынмæ куы æрæвнæлдтам, æмæ нæ тыхон структурæтæ куыд арæзтам, уыцы рæстæг.
Уæд структурæты кусджыты æхсæн арæх уыд хъаугъатæ, фæлæ фæстаг рæстæджы уавæр бæрæг фæхуыздæр. Банысан кодта, кæй араздзæн æппæтдæр, цæмæй Хуссар Ирыстоны тыхон блокы кусджыты æхсæн уа æмбаргæ ахаст кæрæдзимæ, уæд куыстæн дæр уыдзæн эффективон фæстиуджытæ.
Президент карзæй бахæс кодта барадхъахъхъæнæг органты минæвæрттæн, нозтджынæй автотранспорт чи скъæры, цæмæй уыдон ныхмæ закъонон æгъдауæй карз мадзæлттæ исой. Кæд цасдæр рæстæджы хъаугъатæ æмæ бархалæн цаутæ нæ республикæйы столицæ æмæ районты хынцыд нæ цыдысты, уæд сын ныртæккæ бынат ис нæ бæстæйы.
«Фæндагон-транспортон уæззау æмæ æндæр бархалæн цаутæ, хъаугъатæ æрцæуынц, бирæтæ чындзæхсæвты рæстæджы куы фæнозтджын вæййынц, уæд. Хатт, хъыгагæн, уыдонæн вæййы æвзæр фæстиуæг», – дзырдта бæстæйы разамонæг.
Уымæ гæсгæ алы æмбæстаг дæр хæсджын у, цæмæй бæрндзинад хæсса, цы бынаты кусы, уымæ нæкæсгæйæ, цы бархалынад сарæзта, уый тыххæй. Закъонмæ гæсгæ раст нæу, цæмæй бæрæг бархалæн цауы тыххæй æрмæст хуымæтæг æмбæстæгтæ дзуапп дæттой. Уый комкоммæдæр хауы паддзахадон службæгæнджытæ æмæ барадхъахъхъæнæг органты кусджытæм.
«Æз бафæдзæхстон алкæй дæр, уымæн æмæ закъонмæ гæсгæ æмхуызон дзуапп хъуамæ кæнæм нæ архайдтыты тыххæй», – банысан кодта Президент.
Уый ма бахæс кодта, цæмæй карзæй æфхæрд цæуой, æнахъомтæм æмæ автотранспорт скъæрыны бары гæххæтт кæмæн нæй, уыдонмæ машинæ чи дæтты, уыдон. Хъусдард аздæхта паддзахадон номыртимæ автотранспорты шофыртæм, уымæн æмæ сыл фылдæр хатт чиновниктæ нæ вæййынц, фæлæ æндæр æмбæстæгтæ.
«Мах хæсджын стæм, цæмæй фæндæгтыл цы бархалæн цаутæ хынцыд цæуы, уыдон бæстон кæнæм. Дарддæр афтæ куы уа, уæд хъæуы закъонмæ ивындзинæдтæ бахæссын. Фæткхалджытæ ивар цæуынц, фæлæ уыдон уæддæр нозтджынæй сбадынц транспортыл æмæ уымæй сæхи æмæ æндæр адæмы цардæн хæссынц тæссагдзинад», – дзырдта Президент.
Бахатыд Паддзахадон автоинспекцийы къухдариуæгадмæ, цæмæй консультацитæ ауадзой сæ кусджытæн æмæ суагъæтæ аразыны рæстæджы рæдыдтытæ ма уадзой. Уымæн æмæ уыдон вæййынц фæткхалджыты административон кæнæ уголовон бæрндзинадмæ æркæныны тыххæй тæрхондоны уынаффæ аивыны аххосаг.
«Иумæ æмзонд æмгуыст куы нæ кæнæм, уæд нæ къухты хорз фæстиуджытæ нæ бафтдзæн», – дзырдта Гаглойты Алан.
Президент Мидхъуыддæгты министр Гуыцмæзты Аланæн бахæс кодта Дзауы районы Гуфтайы хъæуы фæндагонпатрулон посты фæдыл проблемон фарст æрбæстон кæнын, цæмæй кусджытæ оперативон куыст кæной. «Сæ хæстæ, чи нæ æххæст кæны, уыдон сæ бынæттæй арвитут æмæ сæ бахæс кæнут, чи рæхсы кусын, уыдонæн», – загъта Президент.
Мидхъуыддæгты министрады Фæдагурæн управленийы разамонæджы хæдивæг Козаты Олег Президентæн куыд радзырдта, афтæмæй нæ горæты 2024 азы 14 июлы æхсты фæстиуæгæн цы дыууæ æфсымæры фæцæф сты, уыдоны æввахс рæстæджы æрфæрсдзысты Цæгат Ирыстоны. Ныртæккæ фæдагурджытæ фæрсынц цауы æвдисæнты. Уымæй дарддæр ма æфхæрд чи баййæфта, уыдонмæ ахасты уагъд æрцæудзæн тæрхондонон экспертизæ.
Гаглойты Аланы бахæсмæ гæсгæ æввахс рæстæджы бæрæг æмæ бæрндзинадмæ конд хъуамæ æрцæуой уыцы цауы хайадисджытæ.
