Хуссар Ирыстоны кæстæр фæлтæры ‘хсæн иууыл æнтыстджындæр уæгъдибар хъæбысæйхæцæгыл нымад цæуы Бикойты Вадим. Архайы 58 килограммы уæзы æмæ йе ‘взонг кармæ нæ кæсгæйæ, Вадимæн ныридæгæн бантыст рамбулын бирæнымæц ерыстæ.  У 2014 азы дунеон ерысты æвзист майданы хицау æмæ бирæ алыгъуызон регулярон ерысты уæлахиздзау.

Спорты бæрзæндтæм Вадим йæ фæндаг айгæрста Цхинвалы спорты гауызтæй. Фыццаг уæлахизтæ йæ къухы бафтыдысты регионалон турнирты. Фæстæдæр та фæуæлахиз ис æхсæнадæмон турнирты.

Ныр та дыккаг хатт ирон спортсмен йæ физикон цæттæдзинад æмæ спортивон амонд фæлвæрдта дунейы ерысты. Ацы хатт чемпионат уагъд цыд Гуырдзыстоны республикæйы. Бикойты Вадим уым архайдта 58 уæзы категорийы. Ауагъта фондз тохы. Йæ тренер Коцты Тамерланы ныхæстæм гæсгæ йæ уæзы категорийы Бикойты Вадим уыд иууыл цæттæдæр спортсмен. Йæ ныхмæлæууæг богалæй уыд хуыздæр цæттæ, фæлæ йæ фæндыд тох аивдæр саразын æмæ йын уыцы рæдыд къахдзæф йæ сыгъзæрин майдан байста.

4-æм октябры Тыбылты Леонид йæхимæ фæхуыдта æвзонг спортсмен Бикойты Вадимы, цæмæй йын раарфæ кæна йе ‘нтыстыты тыххæй. Фембæлды ма хайад иста Хицауады Сæрдары хæдивæг Пухаты Эрик.

Паддзахады сæргълæууæг зæрдиагæй раарфæ кодта Бикойы фыртæн, нырма æвзонг уæвгæйæ йæ къухы афтæ стыр æнтыстытæ кæй æфты, уый тыххæй. Загъта йын: «Мах иууылдæр лæмбынæг нæ хъус дардтам æвзæнгты ‘хсæн дунейы фыццагады ерысты дæ архайдмæ. Ды нырма æвзонг дæ, разæй дæм æнхъæлмæ кæсы стыр спортивон фидæн. Ныр дæр дунейы ерыстæй бронзæ æрхæссын стыр хъуыддаг у. Мæн фæнды, цæмæй де ‘мцахъхъæнтæ дæуæй дæнцæг исой. Уыдон дæр архайой спорты алы хуызты. Мах, хицауад та архайдзыстæм, цæмæй уын уый тыххæй аразæм уавæртæ. Ныртæккæ цы программæйыл бындуриуæг кæнæм, ома, «Спорт в шаговой доступности», уымæ гæсгæ нæ республикæйы бирæ спортивон залтæ æмæ фæзуæттæ фæзынд. Уыдон иууылдæр арæзт цæуынц нæ адæмы хæрзиуæгæн. Мæн фидарæй уырны, уый фадат кæй ратдзæнис фидæны æнæниз, фидар фæлтæр схъомыл кæнынæн. Æрыгон хъæбысхæцæджы стырдæр бæллиц, æвæццæгæн, куыд алы спортсменæн дæр, афтæ у Олимпаг хъæзтыты уæлдæр пьедесталмæ схизын. Æвæццæгæн дæ ацы бæллиц-мæ ноджы сразæнгард кодта Рæмонты Сослан», — дзырдта æрыгон спортсменæн Президент Тыбылты Леонид.

Бикойты Вадим загъта æфсæрмыгæнгæ: «Кæй зæгъын æй хъæуы, мæ бæллиц у Олимпаг сыгъзæрин райсын, уыцы бæллицыл мæ зæрдæ никуы сивдзынæн. Травмæтæ æмæ мын чысыл къуыхцытæ никуы басæтдзысты ме стыр бæллиц. Рæмонты Сосланæй дарддæр спорты мæ кумиртæ сты Богъиты Вадим æмæ Къудухты Бесик», — загъта æрыгон спортсмен.

Президент зæрдылдарæн лæвар бакодта Бикойты Вадимæн æмæ йын зæрдиаг арфæтæ фæкодта йæ дарддæры спортивон фæндагыл.

Уазæгты марфæ

Comments are closed, but trackbacks and pingbacks are open.