Спорт

ФУТБОЛ

Цхинвалы футболон скъола «Фæранк»-ы уагъд æрцыд 2004-2005 азты гуырд футболистты ‘хсæн хæларадон хъазт. Хъазæн фæзыл фембæлдысты бынæттон командæ «Ир» æмæ Дзæуджыхъæуы «Юность». Хъазты фыццаг æмбисы хуыздæр архайдтой цхинвайлæгтæ. Уыдон ныхмæлæууæг командæйы кулдуары бакодтой  3 пуртийы. Уазджытæн сæ бон ссис æрмæстдæр иу пурти бакæнын. Фембæлды дыккаг хайы дæр æнтысджындæрæй  архайдтой фысымтæ. Бакодтой ма ноджы иу пурти æмæ фæуæлахиз сты 4:1 хыгъдæй.

«Хорз ахъазыдыстæм. Райгонд дæн мæ хъомылгæнинæгты архайдæй. Бузныг зæгъын мæ фæнды нæ ныхмæлæууæг командæйæн, кæй нæм æрцыдысты, уый тыххæй. Хорз уаид æмæ нæм арæхдæр куы цæуиккой цæгатирыстойнаг командæтæ», – банысан кодта Цхинвалы «Ир»-ы командæйы сæйраг тренер Бекъойты Ацæмæз.

«Куыд æрвылхатт, афтæ та цхинвайлаг футболисттæ ныр дæр удыхъæдæй уыдысты фидардæр,  æмæ уымæ гæсгæ фæулæахиз сты. Æрвылхатт дæр стыр æхсызгонимæ æрцæуын Хуссар Ирыстонмæ. Фарон аз ма федтам историон бынæттæ дæр. Ам сывæллæттæн тренировкæтæ кæнынæн ис хорз уавæртæ», – загъта Дзæуджыхъæуы командæ «Юность»-ы сæйраг тренер Валерий Семенов.

 

ЧЕМПИОНАТ ЛЕНК КÆНЫНÆЙ

Цыппæрæм хатт уагъд æрцыд республикæйы чемпионат ленк кæнынæй. Ныр та æвзонг спортсментæ ерыс кодтой ленк кæныны ахæм стилы, куыд брасс. Раздæр та ерыстæ уагъд æрцыдысты фæсонтыл ленк кæнынæй, сæрибар стилæй æмæ баттерфляйæ.  Ерысты хайад райстой 190 спортсменæй фылдæр. Ерыстæ уагъд цыдысты спортивон комплекс «Олимп»-ы æмæ стыр цымыдисдзинад сæвзæрын кодтой спортуарзджытæм. Трибунæтæм фыццаг рады æрбацыдысты æвзонг спортсменты ныййарджытæ æмæ хиуæттæ. Уыдонæн раарфæ кæнын-мæ æрбацыдысты РХИ-йы Хицауады Сæрдары хæдивæг Пухаты Эрик, спорты фарстыты фæдыл президенты æххуысгæнæг Джиоты Руфин æмæ Фæсивæдон политикæ, спорт æмæ туризмы комитеты сæрдар Зассеты Сергей.

«Ленк кæныны спорты фæрцы республикæйы схъомыл уыдзæн ног, æнæниз фæлтæр. Кæд дарддæр дæр спорты ацы хуыз ахæм стыр темптæй размæ цæуа, уæд мæ фидарæй уырны æмæ нæм цалдæр азы фæстæ  кæй фæзындзысты æвзæнгты ‘хсæн УФ-йы чемпионаты уæлахиздзаутæ», – банысан кодта Зассеты Сергей.

Спортæй ацы хуызы дзыллон æгъдауæй республикæйы архайын райдыдтой ивгъуыд аз. Уæд республикæмæ æрцыд уæрæсейаг специалист Евгения Терлеева. Йæ архайдæй спорты ацы хуыз ссис республикæйы иттæг популярон. Ныр секцитæм цæуынц 700 ахуырдзауæй фылдæр. Тренеры  къухдариуæгады бын ерыстæ цæуынц бæрзонд организацион æмвæзадыл.

«Æнтыстджынæй ацыд ерыстæм цæттæгæнæн процесс. Брассы стилыл сывæллæтты сахуыр кæнын у зын. Алчи йыл нырма нæ фæцайдагъ, фæлæ сæйраг  уый у, æмæ кæй æмбарынц, ацы стиль зын кæй у, уый.  Уыцы хъуыддаг та хорз у фыццаг ахуыры азы кæронæн», – загъта Евгения Терлеева.

Ерысты фæстиуджытæм гæсгæ йæ уæлахиздзаутæ систы Тыджыты Дианæ, Быценты Арсен, Тедеты Сабинæ, Плиты Аслан, Бежанты Кристинæ, Багаты Инал, Алиса Жаркова, Хетæгкаты Инал, Æлборты Аннæ, Гæбæраты Георги, Джиоты Катеринæ æмæ Тъехты Ибрагим.

Радон ерыстæ уагъд цæудзысты иу мæйы фæстæ, 21 майы. Уæд та йæ хайадисджытæ ерыс кæндзысты  ленк кæныны комплексон хуызæй.

Хуриты Батрадз