Спорт

ДЗЮДО

Италийы уагъд æрцыд æвызæнгты ‘хсæн дунейы чемпионат. Ерысты æвзист призер ссис Хуыбылты Ирэнæ. Уый хæцыд 48 кг уæзы категорийы. Финалы йæ ныхмæлæууæг уыд Италийы минæвар Ассунта Скутто.

«Афтæ мæ бон нæу зæгъын, æмæ дунейы чемпионат Европæйы чемпионатæй тыхджындæр у, цыран бацахстон фыццаг бынат. Ныр финалы кæй фæхæрд дæн, уый æрмæстдæр у мæхи рæдыд. Дыууæ хатты хæцыдтæн мæ ныхмæлæууæгимæ, уыцы нымæцы Люксембургы дæр æмæ дыууæ хатты дæр рамбылдтон. Уымæ гæсгæ йæм мæхи психологон æгъдауæй куыд æмбæлы, афтæ нæ бацæттæ кодтон. Афтæ мын стæм хатт вæййы», – загъта ерысты фæстæ Хуыбылты Ирэнæ.

Банысан кæнын хъæуы уый дæр, æмæ æдæппæтæй ерысты хайад кæй райстой 72 бæстæйæ 495 дзюдоисты.

ФУТБОЛ

«Челси», ÆЦСК, «Зенит» æмæ футболæй Уæрæсейы æмбырдгонд командæйы раздæры æрдæгхъахъхъæнæг Юрий Жирков, æвæццæгæн, йæ спортивонæ карьерæ адарддæр кæндзæн Дзæуджыхъæуы «Алани»-йы. Уый тыххæй хъусын кæны Sports.ru. Контракт фыст хъуамæ æрцæуа ацы сезоны кæронмæ. Æмæ кæд командæ уæлдæр къордмæ ахиза, уæд фадат уыдзæн футболистимæ контракт адарддæр кæнынæн.

Ацы информацийы фæдыл социалон хызæгты клубы фарсыл фыст æрцыд, ома, ацы информаци у кæйдæр бонджын фантазийы хуызæн, фæлæ, зæгъ, уадз æмæ ацы ног хабар баззайæт.

ХУРИТЫ Батрадз