Стыр Фыдыбæстæйон хæсты уæлахизы боныл 78 азы сæххæсты цытæн уагъд æрцыд турнир шахмæттæй. Ерыстæ систы традицион. Ныр дæр та дзы хайад райстой бирæ шахматисттæ. Æдæппæтæй майдантыл тох кодтой 34 адæймаджы. Ерысты хайад райсыны тыххæй та Цæгат Ирыстонæй æрцыдысты къорд шахматисты. Сæ хайадист ноджы тынгдæр фæцымыдисондæр    кæнынц   ерысты.

Ерысты байгом кодта Шахматты федерацийы президент Саулохты Георги. Уый цыбыртæй радзырдта ацы бæрæгбоны историйы тыххæй. Афтæ ма бузныг загъта Россотрудничествойы къухдариуæгадæн, уымæн æмæ уыдоны фæрцы ныр турнир уагъд цæуы фæндзæм аз.

Æрæмбырдуæвджытæн раарфæ кодта президенты администрацийы сæргълæууæг Джиоты Алан æмæ РХИ-йы Россотрудничествойы минæварады сæргълæууæг Сергей Скворцов.

Ерыстæ уагъд цыдысты швейцариаг системæмæ гæсгæ. Азæй-азмæ йæ хайадисджыты цæттæдзинад кæны бæрзондæй бæрзонддæр. Уымæ гæсгæ фылдæрæй фылдæр кæны  фаворитты нымæц дæр. Ныр дæр сæйраг призтыл цыд карз спортивон тох.

Партитæ иууылдæр акæнгæйæ, ерысты уæлахиздзау ссис Къодоты Андрей, дыккаг бынат æмæ æртыккаг бынæттæ та адих кодтой цæгатирыстойнаг шахматисттæ Къораты Хъазбег æмæ Николай Рязанов.

17 азы онг кæуыл цæуы, уыцы спортсменты ‘хсæн фыццаг бынат бацахста Джыгкайты Артур, дыккаг ссис Михаил Логачев æмæ æртыккаг бынатыл та ацыд Тыбылты Аланæ.

12 азы онг кæуыл цæуы, уыцы шахматистты ‘хсæн фæуæлахиз Плиты Бибо, æвзист майдан рамбылдта Гæззаты Леонид æмæ бронзæйон призер та ссис Ходты Валери.

Чызджыты ‘хсæн иууыл цæттæдæр разынд Уанеты Валерия, дыккаг бынат бацахста Плиты Александра æмæ æртыккаг та ссис Къæбулты Елизаветæ.

Сæрмагонд призæй хорзæхджын æрцыдысты Къæбулты Гриша æмæ Тыбылты Ирбег.

Банысан кæнын хъæуы уый, æмæ та ерысты хайадисджытæй иу дæр кæй нæ баззад æнæ лæварæй.

Хуриты Батрадз

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.