Цӕмӕй рӕзинаг кӕстӕр ӕнӕниз уа, йӕ алфӕмбылай дунемӕ кӕса цинзӕрдӕйӕ, йӕ хъуыдыкӕнынад уа ноджы нывылдӕр, спортивон ерысты архайа арӕхстджынӕй, скъолайы ӕхсӕнадон царды иса активон хайад, уый тыххæй стыр ахадындзинад ис, хӕлцӕй рӕстӕгыл куыд ифтонг уа, уымӕн. Уыцы ахсджиаг ӕмӕ ӕнӕмӕнгхъӕуӕг хӕс зӕрдыл даргӕйӕ, хистӕр кары адӕймӕгтӕ ӕппӕт дӕр аразынц, цӕмӕй кӕстӕртӕ хӕрдӕй хъуагдзинад ма ӕййафой. Ацы хъуыддаджы раппӕлинаг сты адӕмон ахуырады органты кусджытӕ, уыдон уавӕртӕ ӕмӕ фадӕттӕй пайда кӕнгӕйӕ, ӕппӕт дӕр аразынц рӕвдауӕндӕттӕ ӕмӕ иумиагахуырадон скъолаты кӕстӕрты хӕлцӕй ифтонг кӕныны хъуыддаджы. Афтæ у Цхинвалы районы скъолатӕ ӕмӕ сывӕллӕтты дыууӕ рӕвдауӕндоны дӕр. Бафӕндыд мӕ, ацы хӕрӕндӕттӕй иуы уавӕримӕ базонгӕ уӕвын ӕмӕ уый тыххӕй бацыдтӕн Къостайыхъӕуы астӕуккаг скъоламӕ. Ӕрбацӕуӕг ӕнӕ фӕхатгӕ нӕ фӕуыдзӕн, ацы ахуыргӕнӕн уагдоны фӕтк ӕмӕ ӕгъдау сӕ бынаты кӕй сты, гигиенӕйы ӕппӕт фӕткойтӕ дзы хъахъхъӕд кӕй цӕуынц, уыдӕттӕ. Хӕрӕндоны йӕ бакондӕй фӕстӕмӕ цӕсгомджынӕй кусы Бестауты Рая, уый йӕ куыстмӕ кӕсы бӕрндзинады цӕстӕй, архайы, цӕмӕй дзы уой райгонд ӕмӕ йын ӕнтысгӕ дӕр кӕны. Бестауты чызгӕн ма ӕххуыс кӕнынц Тохъмайты Беллӕ ӕмӕ Къӕбысты Маринӕ. Хӕринӕгтӕ та цӕттӕ кӕнынц, æрбалæууинаг къуырийӕн цы меню бацӕттӕ кӕнынц, уымӕ гӕсгӕ. Хӕлцӕй ифтонг кӕнынц куыд астӕуккаг скъолайы ахуыргӕнинæгты, афтæ сывӕллӕтты рӕвдауӕндоны хъомылгæнинæгты дæр. Сӕ хӕринӕгты вӕййы стуры ӕмӕ карчы дзидза, алыгъуызон дыргътӕ ӕмӕ ӕндӕр ахӕмтӕ ӕмӕ сӕ сӕ чысыл фæлхасгæнджытæ кӕддӕриддӕр баззайынц райгондӕй.
Хуыбиаты Никъала
Comments are closed, but trackbacks and pingbacks are open.