Ахуыргæнæджы кадджын ном сæрыстырæй чи хæссы, æдзухдæр кæстæрты раст фæндагыл чи æфтауы, сæ зонындзинæдтæй сæ чи хотыхджын кæны, ахæм фæлтæрд æмæ раззагон ахуыргæнджытæ бирæ ис Цхинвалы районы иумиагахуырадон скъолаты. Сæ иузæрдион куыст æмæ архайды тыххæй бахатыдтæн районы адæмон ахуырады хайады методкабинеты сæргълæууæг Шахпаронов Алыксандрмæ æмæ уый афтæ радзырдта:
– Æхсызгон у уый банысан кæнын, æмæ азæй азмæ не скъолаты ахуыр-хъомыладон куыст кæй хуыздæр кæны, ахуыргæнджытæ тынг зæрдиагæй кусынц сæхиуыл æмæ уый фæстиуæгæн фылдæр кæнынц сæ зонындзинæдтæ, ахуыры гъæд та кæны хуыздæр. Нæ ахуырады хайад Ахуырады министрадмæ бавдыста цалдæр ахуыргæнæджы, цæмæй сæ Ахуыргæнæджы боны цытæн схорзæхджын кæной Кады грамотæтæй. Уыдон ‘хсæн номхуындæй сты Къостайыхъæуы астæуккаг скъолайы райдиан кълæсты ахуыргæнæг Козаты Валентинæ, адæмон ахуырады минæвар Хетæгкаты Анатоли (уый 40 азы бæрц намысджынæй фæллой кæны ахуырады къабазы), Дменисы скъолайы директор Дудайты Земæ, Тъбеты æнæххæст астæуккаг скъолайы ирон æвзаг æмæ литературæйы ахуыргæнæг Хъуылымбегты Евразия æмæ æндæртæ. Цæмæй ахуыргæнæг рæстæджы домæнтæн дзуапп дæтта, уый тыххæй нæ ахуырады хайад бацархайы уыдон зонындзинæдтæй схотыхджын кæныныл. Уымæ гæсгæ рæстæгæй рæстæгмæ уыдон вæййынц сæ квалификаци бæрзонддæргæнæн курсыты. Цæвиттон, ивгъуыд аз ахуыргæнджыты иу къордæн ахæм аттестаци æрцыд уагъд æмæ сын уый фæахъаз сæ дарддæры хæрзиуæгон куысты. Фæлæ зæгъын хъæуы, иуæй-иу ахуыргæнджытæ аттестацийы рæстæджы не ‘ртымбыл кодтой фаг баллтæ, уыдон сæхиуыл хъуамæ бакусой æмæ аттестацийы ногæй рацæудзысты ацы ахуыры азы кæрон.
Ахуырады хайады методисттæ æмæ инспектортæ рæстæгæй рæстæгмæ цæуынц скъолатæм æмæ ахуыргæнджытæн бынаты бакæнынц алыварсон æххуыс, уыцы нымæцы ахуырадон-тематикон плæнттæ цæттæ кæныны, æмбарын сын кæнынц иумиага-хуырадон ног стандарттæ. Нæ ахуыргæнæн уагдæттæ дæр æввахс рæстæджы сæ куыст хъуамæ кæной уыцы ногдзинæдтæм гæсгæ.
Канд ахуыры рæстæджы нæ, фæлæ ма нæ ахуыргæнджытæ активон сты скъола æмæ къласæн æдде алыгъуызон мадзæлтты дæр, ахуыргæнинæгты ‘хсæн кæ-нынц хъомыладон куыст. Цæвиттон, уыдон сæ ахуыргæнинæгтимæ хайад райстой Республикæ Хуссар Ирыстон расидыны бæрæгбонон мадзæлтты куыд горæт Цхинвалы, афтæ Къостайыхъæуы дæр. Алы къуырисæры дæр скъолаты директортæн уагъд æрцæуы æмбырд æмæ уым æрдзурынц иууыл ахсджиагдæр фарстаты тыххæй, базонгæ дзы вæййынц ахуырады æрцæугæ цаутимæ. Сæхи рады скъолаты директортæ уыдон фæхæццæ кæнынц сæ коллективтæм. Кæй зæгъын æй хъæуы, алы ахуыргæнæгæн дæр йæ куысты бæрæггæнæн у йæ ахуыргæнинæгты ахуырфæразон-дзинад. Ис нæм, хорз æмæ иттæг хорз нысæнттыл чи ахуыр кæнынц, сæ уагахастæй цæвиттойнаг чи сты, ахæм кæстæртæ æмæ сæ кæддæриддæр стæм буц æмæ сæрыстыр. Фæлæ уæддæр уый фаг нæу, хъæуы нæ ахуыргæнджыты фылдæр кусын ахуыргæнинæгтимæ зонындзинæдтæй сæ схотыхджын кæныны фæдыл. Уымæ гæсгæ адæмон ахуырады метод-кабинеты сæйраг хæс у, цæмæй ахъаз кæнæм ахуыр-хъомыладон куысты æмвæзад бæрзонддæр кæныныл. Зæгъдзынæн, нæ районы æдæппæт кæй ис 11 иумиагахуырадон скъолайы, Дменисы хъæуы сывæллæтты рæвдауæндон æмæ Къостайыхъæуы скъола-сывæллæтты рæвдауæндон, кæцы Хуссар Ирыстоны у иунæг ахæм. Дменисы сывæллæтты рæвдауæндон уæвынад кæны цыппæрæм аз æмæ йæхи хуызæн æндæр коллективты ‘хсæн ис раззаг рæнхъыты. Уый тыххæй бузныг зæгъын æмбæлы йæ сæргълæууæг Джиоты Мананæ æмæ рæвдауæндоны коллективæн.
Фæлæ ахуырадон коллективты тыхсын кæны, скъолатæн сæ фылдæр кæй сты чысылкомплектон, кæй сæ ахуыр кæны цъус сывæллæттæ. Ис ма дзы æндæр къуылымпытæ дæр æмæ сæ бахъæудзæн æрбæстон кæнын. Ноджы ма иу ахсджиаг фарсты тыххæй. Раздæр азты Цхинвалæй рейсон автобус цыд Дампъалет, Зар, Рустауы хъæутыл æрвылбон дæр. Ныртæккæ фæндæгты уавæр кæд фæхуыздæр, уæддæр горæтæй 6-7 ахуыргæнæджы хъæутæм ласæм таксийыл.
Цухдзинæдтæм нæ кæсгæйæ нæ районы ахуыргæнджыты коллективтæ æнкъарынц бæрндзинад æмæ архайынц, цæмæй уой раззагдæрты рæнхъыты, цы кæстæрты хъомыл кæнынц, уыдон та сæ ахуыр æмæ уагахастæй уой кæддæриддæр цæвиттойнаг.
Хуыбиаты Никъала
Comments are closed, but trackbacks and pingbacks are open.