Республикæ Хуссар Ирыстоны паддзахадон драмон театры сценæйыл æвдыст æрцыд сывæллæтты спектакль «Бирæгъ æмæ тæрхъустæ». Пьесæйæн сценари ныффыста æвзонг æвæрæг-режиссер Хъотайты Сæрмæт. Уый спектакль бацæттæ кодта дыууæ аргъауы – Гаглойты Владимиры «Фаззæттæ» æмæ Дзугаты Георгийы «Хуры байзæддаг»-ы мидисмæ гæсгæ. «Мæхæдæг инсценировкæ сарæзтон ацы аргъауæн. О, ис нæм тынг хорз аргъæуттæ, фæлæ уыдон сты скъолайы кары сывæллæттæн, ома, 4-5-æм кълæсты ахуырдзаутæн. Ацы аргъау та æвæрд æрцыд сабидæтты сывæллæттæн. Аргъауы, сæйраджыдæр, дзырд цæуы ирондзинадыл», – банысан кодта Хъотайты Сæрмæт.
Йæ ныхæстæм гæсгæ йын ацы аргъау ныр у дыккаг куыст. Йæ фыццаг режиссерон куыст та уыд азербайджанаг фыссæг Меджид Шанхаловы «Æфсин». Уый уыди йæ дипломатон куыст. Ныр та фæнд кæны спектакль сæвæрын æфсæддон тематикæйыл.
Спектакль «Бирæгъ æмæ тæрхъустæ»-йы хайад райстой Республикæ Хуссар Ирыстон æмæ Цæгат Ирыстон-Аланийы сгуыхт артист Наниты Витали, РХИ-йы сгуыхт артисткæ Таугазты Дзерассæ, æвзонг артисттæ Цоциты Андрей, Бекъойты Заринæ æмæ æндæртæ.
Сывæллæтты зæрфдæмæ тынг фæцыд спектакль. Уыдон стыр цымыдисимæ кастысты аргъаумæ æмæ дзы райстой стыр æхцондзинад. Хорз уаид æмæ сабитæн арæхдæр æвæрд куы цæуиккой ахæм аргъæуттæ.
Кокайты Зæринæ
Comments are closed, but trackbacks and pingbacks are open.