Афæдзы дыккаг æмбисæн газеттæ æмæ журналтæ рафыссыны кампани нæ республикæйы дæр ис йæ тæмæны. Æмбæстæгтæ фыссынц, иууыл тынгдæр цæмæ цымыдис кæнынц, сæ зæрдæмæ тынгдæр цы периодикон мыхуыр цæуы, уыдон. Ацы ахсджиаг æмæ æнæаргъæвгæ куыст куыд цæуы, уый базоныны тыххæй бахатыдтæн «Югосетпечать»-ы агентаты хистæр Саулохты Зоямæ æмæ мын уый зонæнтæ радта горæтæй. Куыд банысан кодта, афтæмæй 4 июнмæ газет «Хурзæрин» рафыстой 25 иуæджы, «Южная Осетия» – 79, «Республика» – 215 æмæ журнал «Фидиуæг» та – 45. Дарддæр банысангонд рæстæгæй 19 июнмæ та зонæнтæ сты ахæм: «Хурзæрин» – 46, «Южная Осетия» – 62, «Республика» – 162 æмæ «Фидиуæг» та – 42.
Периодикон мыхуыр рафыссыны куыст цæуы районты посты хайадты дæр суанг 15 июлмæ æмæ уæд фæбæрæг уыдзысты кæройнаг фæстиуджытæ. Æнæуый та, Саулохты чызг куыд загъта, уымæ гæсгæ мыхуыр рафыссыны хъуыддаг фароны азимæ абаргæйæ, нæу зæрдæйы фæндиаг æмæ ацы ахсджиаг фарстмæ хъуамæ сæ хъусдард аздахой æмбæлон органтæ. Раздæр азты уыд афтæ: куыстуæттæ, организацитæ æмæ ахуыргæнæн уагдæтты разамонджытæн хæсгонд уыд, цæмæй æмбæлон куыст кодтаиккой сæ дæлбар уæвæг кусджыты ‘хсæн периодикон мыхуыр рафыссыныл æмæ дзы кæддæриддæр уыд æвæрццаг фæстиуджытæ. Ныртæккæ уыцы хъуыддаг фæцудыдта æмæ йæм ногæй æркæсын хъæуы. Уæддæр зæгъын хъæуы, иуæй-иу разамонæг органтæй ацы фарст рох нæу æмæ æмбæлон куыст бакæнынц алы аз дæр, уыцы нымæцы сты Цхинвалы районы Мидхъуыддæгты управлени, бастдзинады хайад æмæ æндæртæ. Фæлæ афтæ зæгъæн нæй Знауыры районæй, ам ацы куыст алы аз дæр айрох вæййы.
Саулохты чызджы кусæн хатæнæй рахизгæйæ, хæрхæмбæлд фæдæн мæ хорз зонгæ Чехойты Васяйыл, уый рагæй фæстæмæ иузæрдион у ирон мыхуырыл. Æмæ ныр дæр цыд газет «Хурзæрин» рафыссынмæ. Уый йæхæдæг дæр рагæй фыссы ацы газетмæ уацтæ. Зæгъын хъæуы, Чехойы фырты хуызæн æнувыд хæлæрттæ нырма дзæвгар сты мыхуыры дзырдыл æмæ дызæрдыггаг нæу, дарддæр дæр кæй æрхъуыды кæндзысты сæ уарзон газеттæ æмæ журналты.
Хуыбиаты Никъала
