Нæ горæты Леуахийы цæугæдоны сæры цы ног хид аразынц, уый фæхæццæ кæны йæ кæронмæ. Тагъд ацы хид нымад æрцæудзæн Цхинвалы визитон карточкæтæй сæ иуыл.
Зæронд хиды районы цæрджыты фæндон бахынцгæйæ, ног хидæн йе’ддаг хуыз бахъахъхъæдтой. Ныр æй сфæлындздзысты бынæттон дурæй. Зынгæ ирон скульптор Дзанайты Славик цъæхбын диабазæй скæндзæн Нарты эпосы нывтæ.
Куыд горæты цæрджытæ, афтæ æрцæуæг туристтæ æмæ уазджытæ дæр цæудзысты йæ уынынмæ, афтæ зæрдæмæцæугæ уыдзæн. Уыцы иурæстæджы хæрзарæзт æрцæудзысты хидмæ бахизæны территоритæ дæр. Уыдзысты иугонд стилыл, цæмæй ацы бынат суа улæфæн комплексон зонæ. Уымæй хъахъхъæд цæудзæн горæты зæронд къуым æмæ уый перспективонæй ратдзæн хорз фæстиуæг.
Зæронд хидыл ныртæккæ кæд машинæтæ нæ цæуынц, уæддæр гом у фистæгæй цæуджытæн.
«Чысыл сулæфыдыстæм, хид кæд кæронмæ арæзт нæма у, уæддæр нын бар радтой, цæмæй йыл цæуæм, хъæуы ма йæ срæсугъд кæнын, перилæтæ æвæрд дæр ыл æрцыд, æндæр дзы ницыуал цухдзинад уынæм. Хид цалынмæ æхгæд уыд, уæдмæ нæ фæндаг уыд дæрддыл æмæ адæм тыхстысты. Ныр æй афтæ хорз аразгæ кæй уынæм, уый тыххæй райы нæ зæрдæ», – загъта зæронд хидыл цæуæг, Фаллагфарсы микрорайоны цæрæг Пухаты Алинæ.
УАЗÆГТЫ Марфа
