Рæдауæй кусы ахуыргæнинæгтимæ

Ивгъуыд къуыри Колыты Аксойы номыл Аивæдты паддзахадон лицейы уагъд ӕрцыд гом урок ирон литературӕйӕ.

«Брытъиаты Елбыздыхъойы цард, сфӕлдыстад ӕмӕ йӕ уацмыс «Амыран» – ахӕм темӕйы сусӕгдзинӕдтӕ раргом кодтой 9-ӕм къласы ахуыргӕнинӕгтӕ. Гом урок уагъта РХИ-йы – Паддзахад Аланийы сгуыхт ахуыргӕнӕг Гӕбӕраты Фатимӕ.

Гом урок ауадзыны нысан уыд ирон ӕвзаджы ӕвзонг ахуыргӕнджытӕн мастер-класс фенын кӕнын, ирон литературӕйы урок уагъд цы методмæ гӕсгӕ хъуамӕ цӕуа, уымӕй.

Куыд зонӕм, афтӕмӕй Ахуырады министрады ирон литературӕ ӕмӕ ӕвзагӕй цы аттестацион къамис ис, уый эксперттӕй иу у Гӕбӕраты Фатимӕ. Уымӕ гӕсгӕ ахсджиаг уыд, уый йæ урок цы ног анимацион методтӕй уагъта, уымӕ байхъусын. Урокы цыды рӕстӕджы ахуыргӕнӕг цы ӕууӕлтӕй хъуамӕ пайда кӕна, уымӕ байхъусынмӕ æмæ хицӕстӕй фенынмӕ ӕрбацыдысты нӕ республикӕйы скъолаты ирон ӕвзаг æмæ литературæйы ахуыргӕнджытӕ, ӕдӕппӕт 24-ӕй.

Зӕгъын хъӕуы уый ӕмӕ Гӕбӕраты Фатимӕйы чи зоны, уыдон ӕй зонынц йӕ дӕсныйады иттӕг хорз специалистӕй. Уымӕн ӕвдисӕн, цы бирӕ Кады грамотӕтӕ ӕмӕ йын хорзӕхтӕ лӕвӕрд ӕрцыд республикæйы  хицауады ‘рдыгӕй, уыдон. Йӕ  уроктӕ уагъд фӕцӕуынц ногдæр методикон технологитӕм гӕсгӕ. Йӕхӕдӕг куыд зӕгъы, афтӕмӕй: «Ирон адӕмӕн ис хъӕздыг ӕмӕ цымыдисон литиратурон бынтӕ. Уыдон дзурӕг сты нӕ адӕмы историйыл, не ‘взаджы рӕсугъд хъӕздыгдзинадыл, ӕвдыст цӕуынц адӕмон дзыхӕйдзургӕ сфӕлдыстады ӕмӕ нӕ курдиатджын фысджыты алыгъуызон уацмысты руаджы. Сӕ арф, хъуыдыджын уацмысты  адӕймаг банкъары райгуырӕн бӕстӕмæ уарзондзинад, йӕ цӕстыты раз февзæры хицӕн дуджы цардуаг, ӕхсӕнады, адӕмы ахастытӕ.

Уый ма куыд загъта, афтӕмӕй гом урок сӕрмагондӕй бацӕттӕгонд ӕрцыд 15-ӕм майы Мадӕлон ӕвзаджы бон нысан кӕй цӕуы, уый цытӕн. Стӕй Брытъиаты Елбыздыхъойы уацмыс «Амыран» дӕр хуымӕтӕджы не ‘рцыд ӕвзӕрст. «Адӕймаджы сӕрибардзинад куыд хъӕуы, афтӕ йӕ хъӕуы ӕвзаг дӕр. Цӕмӕй нывӕндын хъом уа. Нӕ фысджытӕй кӕйфӕнды уацмыстӕм ма ӕркӕсай, уӕддӕр дзы алкӕцыдӕр нӕ литературӕйы ахсы зынгӕ бынат, уымӕн ӕмӕ уыдон дзурӕг вӕййынц ирон фыссӕджы зӕрдӕйы, кӕнæ та йӕ адӕмы цардуагыл. Уый тыххӕй та кӕстӕр фӕлтӕры лӕмбынӕг зонгӕ кӕнын фӕхъӕуы фыссӕджы царды хабӕрттимӕ ӕмӕ йе сфӕлдыстадимӕ, цӕмӕй нӕ фидӕны фӕлтӕр аргъ кӕной ирон литературӕйӕн», – дзырдта йӕ хъуыдытӕ Гӕбӕраты Фатимӕ.

Гом урокъы райдиан уал Гӕбӕраты Фатимӕ йӕ ахуыргӕнинӕгтимӕ ӕрдзырдта фыссӕджы цард ӕмӕ сфӕлдыстадыл. Мадӕлон ӕвзаджы нысаниуӕгыл дзургӕйӕ, сабитӕй домдта, цӕмӕй аргъ кӕной ирон ӕвзагӕн, нӕ адӕмы историйӕн.

Ахуыргӕнинӕгтӕ ӕмӕ ахуыргӕнæджы фæлмæн ахастæй ӕрӕмбырдуӕвджытӕ истой ӕхцондзинад. Темӕйы фӕдыл арӕзт ӕрцыд презентацитӕ. Сывӕллӕттӕ бакуыстой  рефераттыл, уацмысы алы фӕлгондзмӕ гӕсгӕ дӕр арӕзт ӕрцыд класстертӕ. 9-ӕм къласы ахуыргӕнинаг Зӕгъойты Элинӕ та бакаст ӕмдзӕвгӕ «Амыран»-ы тыххӕй, ныффыста йæ йӕхӕдӕг.

Ӕрмӕст ахуыргӕнинӕгтӕм нӕ, фӕлӕ ма гом урокмæ цы ахуыргӕнджытӕ фæуазæг сты, уыдон дӕр иттӕг лӕмбынӕгӕй хъуыстой Гӕбӕраты Фатимӕ Брытъиаты Елбыздыхъойы бинонты тыххӕй цы ног зонӕнтӕ ссардта интернет ресурсты  фӕрцы, уыдонмӕ: «Кӕд Елбыздыхъойы фӕнд уыд, цӕмӕй йӕ фырт Хадзырӕт ӕфсӕдтон лӕг рацӕуа, уӕддӕр уый ацыд ӕндӕр хаххыл. Ӕфсӕнвӕндӕгты специалист уӕвгӕйӕ, уый сыгъдӕг кодта минӕтӕй фӕндӕгтӕ. Ӕмӕ цы хъуамӕ уа уымӕй хуыздӕр! Адӕймӕгты удтӕ ӕвирхъау цаутӕй хиз…»

Афтӕ аив ӕмӕ зӕрдӕхъаргӕйӕ дзырдта ахуыргӕнӕг ӕмӕ кӕд ӕрӕмбырдуӕвджытӕ зонгӕ уыдысты Брытъиаты Елбыздыхъойы уацмысимӕ, уӕддӕр сӕм  афтӕ каст, цыма фыццаг хатт хъусынц уыцы ныхӕстӕ.

Ахуыргӕнинӕгтӕ се ‘ппӕт дӕр уыдысты активон. Урокы рӕстӕджы арӕзт ӕрцыд параллелтӕ дӕр. Ӕндӕр фысджытӕй сӕрибар темӕйыл уацмыстӕ чи ныффыста, уыдоныл та дзырдта ӕмӕ абарстытæ сарӕзта Цхуырбаты Кристинӕ. Уацмысы фӕрцы ахуыргӕнинӕг-тӕм сӕрибардзинады ӕнкъарӕнтӕ кӕй сӕвзӕрд, уый бӕрӕг уыд сӕ ӕнӕхин цӕсты-тӕм кӕсгӕйӕ.

Гӕбӕраты Фатимӕ нын куыд загъта, афтӕмӕй урочы хъомыладон хӕс уыд: ахуыргӕнинӕгтӕм райгуырӕн зӕхмӕ уарзондзинады ӕнкъарӕнтӕ райхъал кӕнын. Стӕй ма дзургӕ-дзурын ныхасы стилыл бакусын.

Урочы кӕрон сӕ тӕлмӕнтӕ нӕ бахӕлӕг кодтой ӕмӕ ныхасы рацыдысты Ахуырады министрады аттестацион къамисы эксперттӕ, 6-ӕм скъолайы ахуырады хайады сӕргълӕууӕг Дыгъуызты Лианӕ ӕмӕ 9-ӕм скъолайы директор Зассеты Зарӕ, Колыты Аксойы номыл лицейы ахуыры хайады сӕргълӕууӕг  Плиты Нелли

«Тынг мидисджын гом урок ауагъта Гӕбӕраты Фатимӕ. Уый йӕ ахуыргӕнӕджы  дӕсны-йад райдыдта Аивӕдты лицейы ирон ӕвзаг ӕмӕ литературӕйы ахуыргӕнӕгӕй. Лицейы бакондӕй ныры онг Фатимӕ цӕсгомджынӕй кусы суинаг фӕлтӕры хӕрзӕбонӕн. Йӕ разы ӕвӕрд хӕстӕ ӕппынӕдзух ӕххӕст кӕны цӕсгомджынӕй. У Колыты Аксойы номыл премийы фыццаг лауреат. 2002 азы та йын РХИ-йы президенты указӕй лӕвӕрд ӕрцыд Кады нысаны гӕххӕтт. 2009 азы та йӕ уӕды Ахуырады министр Кусраты Анатоли схорзӕхджын кодта Кады грамотӕйӕ. Ахӕм кады гӕххӕттытӕй ма йæ схорзӕхджын кодтой Дзӕуджыхъӕуы президиумы хицауады Зонадон центр ӕмӕ нӕ горӕты Централон  библиотекӕ. 2011 азы та Фатимӕ райста сгуыхт ахуыргӕнӕджы ном. Йӕ ахуыргӕнинӕгты предметон олимпиадӕтӕм ны афтӕ хорз бацӕттӕ кӕны ӕмӕ ӕрвылхатт дӕр свӕййынц призертӕ. Ӕппӕт уыдӕттӕ дзурæг сты йӕ фæлтæрддзинадыл.

Фатимӕ, кӕд уыцы хъуыддаг ӕнцон нӕу, уӕддӕр ахуыргӕнинӕгтӕн саразы культмассон экскурситӕ. Нӕ драмон театры иу ахӕм премьерӕ дӕр нӕ ацӕуы, цӕмӕй йӕм ацы  фӕрнджын ахуыргӕнӕг сывӕллӕтты ма скӕна. Йӕхӕдӕг афтӕ зӕгъы: «Сценӕйӕ ирон аив дзырд хъуысы ӕхцонӕй. Уадз, ӕмӕ сабитӕ ахсой ӕвзаджы сусӕгдзинӕдтӕ». Абон цы мастер-класс фенын кодта Гӕбӕриан, уый канд аив ӕмӕ зӕрдӕмӕхъаргӕ нӕ уыд, фӕлӕ ма уыд бӕрзонд ӕмвӕзадыл. Уадз, алы ӕвзонг ахуыргӕнӕг дӕр бафӕзмӕд Фатимӕйы. Урок уадзыны рӕстӕджы архайӕд уый методтӕй», – загъта Плиты Нелли.

Уазæгты Марфа