ПУХАТЫ Эрик: «Республикæйы газификацийæн уыдзæн стыр æвæрццаг ахадындзинад»

Республикæ Хуссар Ирыстоны Хицауады Сæрдар Пухаты Эрик фембæлд РХИ-йы Сæудæджерад, транспорт æмæ энергетикæйы комитеты сæрдар Бекъойты Геннади æмæ арæнгонд бæрндзинады æхсæнад «Газпром трансгаз Ставрополь»-ы генералон директоры хæдивæг Денис Стороженкоимæ.

Фембæлды рæстæджы уынаффæ цыд УФ-имæ республикæйы газификацийы фæдыл сразыдзинады реализаци кæныны дарддæры къахдзæфыл.

Сæйраджыдæр ныхас цыд, гом акционерон æхсæнад «Газпром-Южная Осетия»-йы куыстуат саразыны тыххæй, кæцы разамынд кæндзæн республикæйы территорийыл газы комплексæн.

Фембæлды рæстæджы Денис Стороженко фехъусын кодта, зæгъгæ, «Газпром трансгаз Ставрополь»-ы дæс кусæджы, кæцыты ‘хсæн сты экономисттæ, юристтæ, кадрон кусджытæ æмæ æндæртæ, ирон специалисты къордимæ иумæ, кусынц организацион фарстатæ æмæ техникон документацийыл.

Хуссар Ирыстоны фарсæрдыгæй кусæгон къорды къухдариуæггæнæг Пухаты Эрикы ныхæстæм гæсгæ, (уæрæсейаг фарсæрдыгæй – акционерон æхсæнад «Газпром»-ы правленийы сæрдары хæдивæг Алексей Голубев), хатдзæггонд документы уыдзæн республикæйы газæй пайдагæнæг ныры уавæры анализ, газæй пайдагæнæг объектты номхыгъд, капиталон цалцæг кæнын æмæ техникон æгъдауæй сифтонг кæнын, æмæ æндæр параметртæ. Афтæ ма уырдæм хаст æрцæудзысты ног объекттæ саразыны тыххæй фæндæттæ.

«Республикæйы газификацийæн уыдзæн стыр æвæрццаг ахадындзинад, кæцы ахъаз уыдзæн экономикæйы, социалон фадыджы рæзтæн, æрдзыл мæгуырау æндæвдад фæкъаддæр уыдзæн, фæбæрзонддæр уыдзæн республикæйы инвестицион химæлвасдзинад. Уымæй уæлдай ма, уый фæстиуæгæн фæзындзæн уæлæмхас куысты бынæттæ», – банысан кодта Пухаты Эрик.

Бæрæг куыд у, афтæмæй раздæр фидар  æрцыд план, цыран бæлвырд цæуы газотранспотртон хызæгты арæзтад, йæ дæргъ – 900 км æй фылдæр, аххæсдзæн Хуссар Ирыстоны 200 цæрæн пункттыл.

Хуссар Ирыстоны газификацийы куыстыты æппæт комплексæн «Газпром» хъуамæ рахицæн кæна 2, 5 миллиард сомы.