Владимир Путин 18 июны кусӕгон балцы фӕуазӕг Корейы адӕмон демократон республикӕмӕ. Уӕрӕсейы президенты хӕдтӕхӕг Пхеньяны аэропорты ӕрбадт ӕхсӕвы ӕртӕ сахатыл, фӕлӕ йӕм ахӕм ӕнафоны дӕр трапы раз ӕнхъӕлмӕ кастысты Корейы разамынад Ким Чен Ыны сӕргълӕудӕй. Стыр кадимӕ кӕй сӕмбӕлдаиккой Путиныл, ууыл ничи дызӕрдыг кодта. Политологтӕ ӕмӕ аналитиктӕ куыд ӕмбарын кӕнынц, афтӕмӕй Цӕгат Корейӕн ныридӕгӕн иууыл хъармдӕр ахастытӕ ис Уӕрӕсеимӕ.
Путины паддзахадон визитмӕ бацӕттӕ кодтой масштабон мадзӕлттӕ. Пхеньяны уынгты бакодтой Путины нывтӕ ӕмӕ Уӕрӕсейы тырысатӕ, бацӕттӕ йын кодтой сӕрмагонд ӕфсӕддон парад, фӕхуыдтой йӕ цытджын концертмӕ ӕмӕ веноктӕ сӕвӕрдтой Цӕгат Корейы ссӕрибар кӕныны сæраппонд фӕмардуӕвӕг сырхӕфсӕддонты монументмӕ. Бынӕттон цӕрджытӕ ӕрӕмбырд сты Уӕрӕсейы лидеры ӕввахсмӕ фенынмӕ ӕмӕ цин кодтой цытджын уазӕгыл. Фӕстаг хатт ма Путин Кореймӕ кусӕгон балцы ныццыд 2000 азы ӕмӕ фембӕлд ныры лидеры фыд Ким Чен Иримӕ. Ким Чен Ынимӕ та 2019 азӕй фӕстӕмӕ фембӕлд ӕртыккаг хатт.
Ким Чен Ын ӕмӕ Путин хицӕнӕй фембӕлдысты ӕмӕ сын ахаста иу сахат ӕмӕ ӕрдӕгӕй фылдӕр. Дыууæ лидеры ӕрдзырдтой дыууӕ бӕстӕйы ӕмахастытӕ фӕхуыздӕр кӕнынӕн ахъаз цы уыдзæн, уыцы ахсджиаг фарстатыл. Экспертты хъуыдымӕ гӕсгӕ дыууӕ лидеры баныхас кодтой ног бирӕполярон дуне саразыны хъуыддагыл дӕр.
Путинимӕ егъау делегаци ацыд Цӕгат Кореймӕ – Фӕсарӕйнаг хъуыддӕгты министр Сергей Лавров, Хъахъхъӕнынады министр Андрей Белоусов, Ӕнӕниздзинад хъахъхъӕныны министр Михаил Мурашко, Транспорты министр Роман Старовойт, вице-премьер Александр Новак, «Роскосмос»-ы сӕргълӕууӕг Юрий Борисов, РЖД-йы сӕрдар Олег Белозеров ӕмӕ ӕндӕр бӕрнон кусджытӕ ӕмӕ бизнесы минӕвӕрттӕ. Бӕстонӕй цӕуыл дзырд цыд дыууӕ делегацийы фембӕлды рӕстӕджы, уый бӕрӕг нӕу. Фӕлӕ Путин йӕхӕдӕг куыд фехъусын кодта, афтӕмӕй бацӕттӕ кодтой фундаменталон документ, кӕцы фидӕны суыдзӕн дыууӕ бӕстӕйы ӕнгом ахастыты бындур. Дзырд цӕуы ӕппӕтыл ӕххӕссæг стратегион партнердзинады бадзырдыл.
Цӕгаткорейаг прессӕ ацы фембӕлды фӕдыл фыссы: «Дыууӕ бӕстӕйы ӕмахастытӕ ныридӕгӕн банымайӕн ис тыхджын стратегион фидарыл ӕмӕ фӕахъаз уыдзысты ӕппӕтдунеон рӕстдзинадӕн, сабырадӕн ӕмӕ ӕдасдзинадӕн. Ацы фембӕлд фӕтагъд кӕндзӕн бирӕполярон дуне саразыны процесс. Радон хатт та йӕ ирдӕй равдыстам, нӕ бӕстӕты хӕларад ӕмӕ иудзинад кӕй тыхджындӕр кӕны, уый».
АИШ ӕмӕ йӕ сателлиттӕ тӕрсынц, оххай, Уӕрӕсе Цӕгат Корейӕн ракетон ӕмӕ ядерон программӕтӕй куы баххуыс кæна. Ныронг та Пхеньяны аххосджын кодтой, зӕгъгӕ, Уӕрӕсейӕн егъау гуырахсты дӕттынц баллистикон ракетӕтӕ ӕмӕ сармадзанты нӕмгуытӕ, кӕцытӕй пайда кӕнынц Украинӕйы ныхмӕ. Фӕлӕ сӕхӕдӕг Украинӕйы алыгъуызон бӕрзондтехнологон ӕхсӕнгарзӕй кӕй ифтонг кӕнынц, уый кой сӕ никуы ничи ракӕны.
Ацы фембӕлдӕй стыр ныфсытӕ ӕвӕрынц Цӕгат Корейы цӕрджытӕ. Йӕ нысаниуӕг егъау у нырыккон геополитикон уавӕры, уымӕн ӕмӕ Мӕскуы йӕ бон базыдта ныгуылӕнӕй ӕмӕ йӕ нал фӕнды семӕ ӕмгуыст кӕнын. Абоны бон Путин йӕ ахаст фӕивта АИШ ӕмӕ йӕ сателлиттӕм ӕмӕ ма Уӕрӕсе дӕр фӕивта куыд паддзахад, афтӕ. Ацы хъуыддаг ӕмбарынц корейӕгтӕ дӕр ӕмӕ зӕрдиагӕй цин кӕнынц ацы визитыл.
Владимир Путин 19 июны Цӕгат Корейӕ йӕ балц адарддӕр кодта Вьетнаммӕ – ам фӕстаг хатт кусӕгон балцы уыд 2017 азы. АИШ-ӕн ацы хабар тынг зын уыд – Путинӕн изоляци саразынмӕ хъавыдысты ӕмӕ уый та сӕрибарӕй аразы паддзахадон визиттӕ ӕндӕр бӕстӕтӕм. Ӕмӕ АИШ-ӕн кӕд Цӕгат Кореимӕ ницы бастдзинӕдтӕ ис ӕмӕ сӕм уый фӕдыл претензитӕ дӕр къаддӕр уыд, Вьетнам сæм нымад у базарадон-экономикон партнерыл. Фӕстаг азты Вьетнам уадзы прагматикон политикӕ. Хӕларадон ахастытӕ йын ис Китайимӕ, Уӕрӕсеимӕ, Хуссар Кореимӕ, АИШ-имӕ, Японимӕ, Австралиимӕ. Фӕлӕ ацы хъуыддаг АИШ-ы зӕрдӕмӕ нӕ цӕуы – ома, кӕд махимӕ дӕ, уӕд ӕндӕр макӕимӕ хъуамӕ уай.
Ӕрӕджы Вьетнам делегаци нӕ арвыста Украинӕйы тыххӕй Швецарийы цӕуӕг сабырадон конференцимӕ. Фӕлӕ уый хæдфӕстӕ БРИКС-ы фембӕлдмӕ ацыд сӕ фӕсарӕйнаг министры хӕдивӕг. Майы мӕйы та Вьетнамы разамынад не сразы сты америкӕйаг политик Дэвид О’ Салливанимӕ фембӕлынимӕ. Уымæн æмæ сæ уый хъуамӕ сразы кодтаид Уӕрӕсейы ныхмӕ санкцитӕ райсынмӕ. Политологты хъуыдымӕ гӕсгӕ Вьетнам йӕхи цӕттӕ кодта Путины визитмӕ ӕмӕ сӕ нӕ фӕндыд развӕлгъау негативон атмосферӕ саразын.
Джиоты Алыксандр
