Газет «Дзау»-ы фыццаг номыры рацыдыл сæххæст 85 азы

 

Ацы аз майы мæйы Дзауы  районон газет «Дзау»-ы фыццаг номыры рацыдыл сæххæст 85 азы. Фæлæ газеты юбилей  йæ кусджытæй чи хъуамæ банысан кодтаид, уыдонæй ма абон сæрæгас  стæм  æз æмæ Гасситы Мойсей.

Мæхæдæг газетмæ кусынмæ бацыдтæн 1959 азы кæрон, Советон æфсады рæнхъыты Германы Демократон Республикæйы баслужбæ кæныны фæстæ. Æфсады службæ кæнгæйæ,  мæ уацтæ мыхуыр цыдысты, уым цы æфсæддон газеттæ цыд, уыдоны фæрстыл, уыдтæн сæ иуы æнæштатон уацхæсæг. Мæ уацты æмбырд кодтон æмæ сæ мемæ æрхастон. Газет «Дзау»-ы редакцимæ куыстагур куы бацыдтæн, уæд сæ равдыстон уæды «Социалистон фосдард»-ы редактор Козаты Данелæн. Уый сæм æркаст æмæ мын загъта, зæгъгæ, ды цæттæ æцæг журналист куы дæ æмæ мæ айста куыстмæ литературон кусæгæй. Джиоты Резо та дзы уыд бæрнон нымæрдар. Фæлæ мæ цин бирæ нæ ахаста – районон газеттæ æхгæд æрцыдысты. Ногæй сæ бакодтой æрмæстдæр æхсæз азы фæстæ. Уæд газет раздæрау дыууæ фарсыл нæ, фæлæ цæуын райдыдта цыппар фарсыл.

Кусджыты нымæц дæр дзæвгар фæфылдæр. Редакторæй йын снысан кодтой журналист, фыссæг æмæ хорз адæймаг Голоты Владимиры. Уый йæ рæстæджы цалдæр хатты фембæлд Максим Горькиимæ, Мæскуыйы куы ахуыр кодта, уæд. Владимирæй бирæ цыдæртæ базыдтон куыд журналист æмæ куыд адæймаг, афтæ дæр. Йæ хæдивæг та уыд Козаты Данел. Уыцы рæстæджы редакцимæ кусынмæ æрбацыдысты бирæ номдзыд адæймæгтæ. Сæ иу уыд  зынгæ драматург, зонадон кусæг Уанеты Владимир. Цасдæр рæстæджы дзы акуыста зынгæ поэт Козаты Исидоры æфсымæр, литературон критик Хазби дæр.

Радиокомитетмæ барвыстой  фыссæг Нартыхты Михалы. Мах æй нымадтам нæ коллективы уæнгыл, уымæн æмæ фылдæр нæ редакцийы бадтис, йæ æрæмджытæ дæр махмæ цæттæ кодта. Йæ фæстæ та уыцы куыст æххæст кодта Абайты Созыр. Мæнæн та бахæс кодтой бæрнон ным æрдары куыст. Коллективы уыд  Джиоты Резо дæр.

Голоты Владимиры фæстæ  редакторæй снысан кодтой Козаты Данелы. Æз та уыдтæн йæ хæдивæг. Фæлæ юридикон институт каст кæй фæдæн, уымæ гæсгæ мæ кусынмæ рарвыстой  милицимæ æмæ уæд редакторы хæдивæгæй кусын  райдыдта Джиоты Сослан æмæ Данел пенсийы куы ацыд, уæд та йæ бынатмæ нысан æрцыд Сослан йæхæдæг. Уæдмæ æз милицийы куыст ныууагътон æмæ фæстæмæ редакцимæ æрбаздæхтæн культурæйы хайады сæргълæууæгæй. Уыцы рæстæджы ма редакцийы куыстой Битеты Чермен, Гасситы Мойсей, Хæныкъаты Зоя, Тедеты Маир, Бежанты Вадим, Сиукъаты Митя, Багаты Владимир, Гасситы Вася, Кæркуысты Залихан, Тыбылты Назирæт æмæ Хадизæт. Цъус рæстæг редакцийы бакуыстой Джыгкайты Леонид, абон газет «Хурзæрин»-ы журналист Гæззаты Иван æмæ журнал «Фидиуæг»-ы бæрнон нымæрдар Остъаты Алан.

Дзауæгтæ сæ газеты уарзтой æмæ йын кад кодтой. Иннæ районты уагъдцæуæг газеттæй хъауджыдæр уым æрмæджытæ иууылдæр мыхуыр цыдысты ирон æвзагыл. Фæлæ йæ ном бирæты зæрдæмæ нæ цыд. Дзауы районы фосдарды куыстæй дарддæр уыдис сæудæджерадон куыстуæттæ дæр. Нæ уæды автономон областæн Къуайсайы æрзæткъахæн управлении уыдис иууыл егъаудæр сæудæджерадон куыстуат. Бирæтæ йæм кусынмæ цыдысты раздæры Советон Цæдисы æндæр республикæтæй дæр.

Уымæй дарддæр ма Дзау нымад цыд курортон бынатыл. Нæ санаторимæ улæфынмæ цыдысты уæды Советон Цæдисы алы регионтæй. Районы бирæнымæц скъолаты куыстой сæдæгай ахуыргæнджытæ, уыдис нæм дохтыртæ, ахуыргæндтæ… Æмæ афтæмæй уыдоны  ном не ‘вдыста газет «Социалистон фосдард». Æппæт уыдæттæ фæдзырдтон Голоты Воладимирæн. Уый мæ хъуыдыйыл сразы æмæ мæ афарста, цы номæй йæ схонæм, зæгъгæ. Æз ын загътон, зæгъын, нæ æппæт Уæрæсейы зонынц Дзауы номæй æмæ йæ афтæ схонæм. Уый фæдыл фыстæг арвыстам Советон Гуырдзыстоны централон комитетмæ. Афтæ нæ газет цæуын райдыдта «Дзау»-ы номимæ.

1991 азы тыхджын зæххæнкъуысты фæстиуæгæн æппæты фыццаг ныккалдысты газет «Дзау»-ы редакци æмæ типографы дыууæуæладзыгон бæстыхæйттæ. Уыцы рæстæджы кусджытæн сæ фылдæр райцентры митинджы уыдысты, уым уыдтæн æз дæр. Редакцийы ма чи баззад, уыдонæй Тедеты Маир æмæ Джиоты Сослан уæлæнгай цæфтимæ аивæрзтысты, кæд сæ пырхæнты бынæй къахгæ скодтам, уæддæр.

Зæххæнкъуысты фæстæ рæстæг вазыгджын уыд. Иуæй, адæмыл æрцыд стыр зиæнттæ, Хахеты хъæу æнæхъæнæй дæр сыджыты бын фæцис. Иннæмæй та æхсæнадон-политикон уавæр дæр хорз нæ уыд. Уыцы рæстæджы хæлын райдыдта Советон Цæдис. Бæстæ схæццæ æмæ ма уыцы уавæрты газеты мæт чи кодта. Мæт кæнын та йыл æнæмæнгæй хъуыд. Йæ кусджытæ баззадысты æгуыстæй. Редакци финансгонд цыд Тбилисæй æмæ ма гуырдзиаг-ирон ныхмæлæуды æндыгъд рæстæджы махæн æхца куыд лæвæрдтаиккой? Стæй районы дæр газетыл хъуыдыгæнæг нæ уыд. Æгæрыстæмæй, нæхи кусджытæй дæр æввахс ничиуал æрбацыд æмæ уыцы æппæт фыдæбæттæ дæр райстон мæхимæ.

Дзауы типографы æппæт ифтонггæрзтæ дæр  пырхæнты бын фесты, цы ма дзы аивæрзт, уыдон дæр ныппаплой сты. Мæнæн баныфсæвæрдтой, зæгъгæ,  гуырдзиаг газетæн цы линотип уыд, уый дам, дын ратдзыстæм. Фæлæ, зæгъ, æй кæм сæвæрдзыстут бæстыхай уын куынæ ис, уæд? Æрæвнæлдтам уыцы фарст аскъуыддзаг кæнынмæ. Уæлдæрлæууæг органтæм бахатыдтæн, цæмæй амалиуæггæнæг  Санахъоты Гугулийы лимонадуадзæн цех нæ редакци æмæ типографæн балхæнынæн баххуыс кодтаиккой. Лимонад дзы нал уагътой. Иу ранæй-иу цыдæр бæлвырдгæнæн гæххæтт куы  райстон, уæд та-иу мæ æрдомдтой æндæр гæххæтт. Цæвиттон, уыцы рæстæджы Цæгат Ирыстоны аразын райдыдтой цахæмдæр арæзтадон компанитæ Хуссар Ирыстоны зæххæнкъуысты  фæстиуджытæ    аиуварс кæныны тыххæй æмæ уым скъуыддзаг кодтой хæдзар æлхæныны фарст, цыма ног хæдзар сарæзтой, афтæ.

Цыбыр дзырдæй, ацы формалондзинæдтæ куы фесты, уæд сцин кодтон, зæгъын, хæдзар ныр къухты бафтыд. Баласын ма хъуыд мыхуыргæнæн линотип. Фæлæ та хъуыддаг нæ рауад. Линотипæй-иу куы цы хай систой, куы та цы æмæ кусынæн нал бæззыд. Ног линотип балхæнынæн та уыцы уæззау рæстæджыты финанстæ кæм уыд? Гугулийы лимонадуадзæн цехы хъуыддаг дæр нал рауад. Уæд Гугули сфæнд кодта, йæхæдæг кæм цард, уыцы хæдзар стыр зæххы фадыгимæ ауæй кæнын. Æмæ уыцы хæдзар бафтыд мæ къухы. Бадзырдтон районы разамынадимæ æмæ æрæмбырд кодтон редакцийы ног коллективы сконд.  Бантыст мын нæ газетæй цалдæр номыры рауадзын.  Газет мыхуыр  кодтон Цхинвалы.

Уæдмæ районæн дæр фæивтой йæ разамынады, кæцытæн  бынтон æндæр ахаст уыд газетмæ. Æрурæдтой финанскæнынад æмæ мæ фыдæбæттæ дзæгъæлы фесты. Афтæ фæцис газеты царды уæды эпопея.

Ивгъуыд аз газет «Республика»-йы редакци сфæнд кодта уæлæмхасæн газет «Дзау» уадзын. Рауагътой дзы цалдæр номыры сæхи фæрæзтæй. Ацы хабар æхсызгон уыд алкæмæндæр, фæлæ «Республика»-йы редакцийæн дæр йæ бон кæцæй у уæлмæхас газеттæ мыхуыр кæнын. Газет хъæуы иугæндзон уадзын æмæ йын хъæуы бындур аразын.

Гъе, ахæм рауад йæ хъысмæт, Дзауы районы цæрджыты кæддæры уарзон газет «Дзау»-ы фыццаг номыры рацыдыл 85 азы сæххæсты бон.

ДЖИОТЫ Павел,

газет «Дзау»-ы фæстаг редактор

Къамы: Газет «Дзау»-ы раздæры коллектив

 

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.