Провокацитæм ма хъусæм

Куыд зонæм, афтæмæй фæстаг азты интенсивон куыстытæ цыд Республикæ Хуссар Ирыстон æмæ Уæрæсейы Федерацийы ‘хсæн пенсион ифтонгады фæдыл.

Цадæггай арæзт æмæ фидаргонд æрцыд нæхи пенсион фонд, йæ сæргъ та слæууыд, ацы куысты стыр фæлтæрддзинад кæмæ уыд, ахæм адæймаг.

Тасойты Азæйы гуырахстджын куысты фæстиуæгæн Уæрæсейы Федерацийы пенсион фондимæ Хуссар Ирыстоны пенсионертæн сæ пенситæ бæрæг фæфылдæр сты. Зæгъæм пенси кæд 500 сомы бæрц уыд, уæд ныр та у 2 900 сомы. Статистикæмæ гæсгæ пенси у 6 700 сомы. Ныртæккæ Хуссар Ирыстоны пенситæ чи исы, уыдоны нымæц у 3,500 адæймаджы бæрц, сæ нымæц бонæй-бон кæны фылдæр. Ныр не ‘мбæстæгты нал хъæуы Цæгат Ирыстонмæ цæуыны сæр æмæ уым тухитæ кæнын алы æмæ алыгъуызон гæххæттытæ æмбырдгæнгæйæ.

Фæлæ уымæ нæкæсгæйæ, уæддæр нæ адæмы ‘хсæн апарахат кæнынц дамдумтæ. Уæдæ æндæр куыд æмбарæн ис, æрæджы РХИ-йы Пенсион фонды сæргълæууæг Тасойты Азæмæ Ленингоры районы цæрæг куы æрбацыд æмæ йæм листовкæ куы равдыста: «Хуссар Ирыстоны пенсионертæн сæ бон у æрдомой пенсийы æмбырдгæнæн фондæй иурæстæгон фиддон райсын». Листовкæйы ма фыстæуы, зæгъгæ, хъæуы комкоммæ дæр Пенсион фондмæ бацæуын æмæ уым æрдомын ацы æхцайы фæрæзтæ. Ленингоры цæрæг куыд зæгъы, афтæмæй йæм уыцы листовкæ радта Дриаты Спартак.

Пенсион фонды сæргълæууæг Тасойты Азæйы ныхæстæм гæсгæ «Хуссар Ирыстоны нæй пенситы уæлæмхас æмбырдгæнæн системæ, уымæн æмæ ныллæг пенситæ фадат нæ дæттынц рахынцæнтæ саразынæн».

Уымæй дарддæр ма Тасойты Азæ куыд загъта, афтæмæй Уæрæсейы Федерацийы закъоны аналогийы фæстæ цæуын нæ хъæуы. Махæн ис нæхи Конституци æмæ закъæттæ. Уыдонмæ гæсгæ алы æмбæстаг дæр хъуамæ æмбара æрыгон Республикæ Хуссар Ирыстонæн уыцы фадат кæй нæй, уымæн æмæ Уæрæсейы Федерацийы Пенсион фонды фæдзæхстон фонды бæрц у  22 проценты æмæ уым æмбырдгæнæн хай цæуы 2 процентæй суанг 6 процентмæ, пенсиисджыты фæндонмæ гæсгæ.

«Махæн нæ фæдзæхстон фиддонтæ  сты куыстмызды  фондæй 10 проценты æмæ кусæг йæхæдæг та фиды 1 проценты йæ куыстмыздæй. Бынæттон пенсиисæгæн ныр-тæккæ йæминималон пенси у 2,900 сомы æмæ уырдыгæй ноджы исты фиддонтæ ахынцын æмбырдгæнæн фондмæ раст нæ уыдзæн», – зæгъы Тасойты Азæ.

Уæдæ ахæм провокацион ныхæстæ чи кæны адæмы ‘хсæн, уыдон хъуамæ зоной РХИ-йы Пенсион фонды фадæттæ кæй æнцой кæнынц республикæйы закъондæт-тынады 19 статьяйы «Тариф страхового взноса»-йыл.

Тасойты Азæйы ныхæстæм гæсгæ: «Кусгæ чи кæны, уыцы пенсиисджытæй дæр урæд цæуынц фиддонтæ. Уымæн æмæ уыдон сты республикæйы æмбæстæгтæ, кæцытæ исынц мызд республикæйы бюджетæй æмæ закъонмæ гæсгæ уыдон хъуамæ хæссой фиддонтæ пенсион фондмæ, куыд æндæр æмбæстæгтæ, афтæ».

Уазæгты М.