Республикæ Хуссар Ирыстоны базарадон минæвар Уæрæсейы Гогинов Таймураз куыд фехъусын кодта, афтæмæй хæлцад æмæ нозты 30-æм æхсæнадæмон равдыст «Продэкспо-2023»-йы, кæцы уыдзæн Мæскуыйы 6-æм февралæй 10-æм февралмæ, бавдисдзысты Хъелы доны бындурыл уагъд бæгæныйы продукттæй цалдæр хуыз. Базарадон минæвар загъта журналисттæн, зæгъгæ, Хуссар Ирыстон «Продэкспо»-йы хайад исы фæндзæм хатт.

«Фыццаг хатт ацы уæрæх фæзуатыл бавдыст æрцыд сæнуадзæн завод „Иронсæн“-ы продукци æмæ минералон дæттæ „Санай“, „Бæгъиатæ“ æмæ „Ossetian“. Хæлцад æмæ нозтæй Хуссар Ирыстоны стендыл уæд цы продукттæ бавдыстам, уыдон стыр цымыдис сæвзæрын кодтой дистрибьютертæм. Немæ хъуыддагон ныхас кодтой Казахстан, Донецк æмæ Луганскы Адæмон республикæтæй, Беларусæй. Куыд зонæм, афтæмæй хæлцад æмæ нозты фадыджы „Продэкспо“-йы равдыст у æрвылазон æмæ уыимæ авторитетон дæр, 25 азы дæргъы. Æрвылаз дæр фыдыбæстæйон хæлцады индустрийы вектормæ бацæуынц 60 мин адæймагæй фылдæр. Хайад дзы райсынц сæдæ уæрæсейаг регионæй фылдæр. Уыдон æхсæн Хуссар Ирыстон дæр кæй вæййы, уый мæнмæ стыр сæрыстырдзинады æнкъарæн æвзæрын кæны», — дзырдта Таймураз Гогинов.

Уый ма загъта, «Продэкспо»-йы тыгъдады Хуссар Ирыстонæн цы стенд рахицæн кодтой, уым æвæрд кæй æрцæудзæн «Едыс»-ы дон «Иронсæн», «Южный сад»-ы дыргъты æмрæнхъ ма Ленингоры районы бæгæныфыцæн заводы бæгæныйы æртæ хуызы — «Аланова», «Ирыстон», «Бордыстар». Базарадон минæвары хъуыдымæ гæсгæ бæгæныйы продуктæн стыр перспективæ ис. Уымæн æмæ, дам, Хъелы суадонмæ ис диссаджы æууæлтæ. Уымæй размæ «Продэкспо»-йы стендыл цы продукттæ æвдыст æрцыд — «Ирон-сæн» æмæ минералон дæттæ «Санай», «Бæгъиатæ», уыдон абон уæй цæуынц Уæрæсейы стырдæр супермаркеттæ æмæ уазæгдæтты.

«Равдысты фæлгæтты, фондз бонмæ мах нывæндæм дыууæ сæдæ дистрибьютертæ æмæ хызæгтимæ фембæлдтытæ. Уыдзæнис нын бирæ куыст. Фæнды мæ сымах фæрцы æндæр æнтыстджын амалиуæггæнджытæм æрсидын, кæд æмæ искæй фæнды йæ продукци ахæм æхсæнадæмон равдысты бавдисын, уæд æз цæттæ дæн æмгуыст кæнынмæ, нæ республикæйы интерестæ фидар кæнынмæ. Равдысты хайад райсæн ис æнæаргъæй. Фæлæ уый хыгъд куыстуатæн хъуамæ уа æппæт æмбæлон документаци», — загъта базарадон минæвар.

УАЗÆГТЫ Марфæ

Comments are closed, but trackbacks and pingbacks are open.