1-2 сентябры Луганскы уыд Луганскы Адæмон Республикæйы II экономикон форум æмæ Адæмон хæдзарады æнтыстыты равдыст – 2017», цыран хайад райстой Республикæ Хуссар Ирыстоны хицауадон делегаци, РХИ-йы Экономикон рæзты министр Кокойты Геннади æмæ йæ хæдивæг, базарадон-сæудæджерадон палатæйы къухдариуæггæнæг Кокойты Роины хайадистæй.

Форумы рæстæджы хуссарирыстойнаг делегацийæн фембæлдтытæ уыд Луганскы Адæмон Республикæйы экономикон блокимæ, Экономикон рæзты министры хæстæ æххæстгæнæг Еленæ Костенкоимæ

Кокойты Геннадийы ныхæстæм гæсгæ, къухы бафтыд бæрæг фæстиуджытæ, нырма уал ныхасæй бадзырдтæ, æмахастытæ æмæ кæрæдзиимæ æмгуысткæнынады тыххæй.

Банысан кæнын хъæуы,  уый кæй уыд дыууæ республикæйы экономикон блокты фыццаг контакт. Бирæбæрцæй уымæн уыд кæрæдзиимæ зонгæ кæныны нысан.

«Экономикæ, сæйраджыдæр та Луганскы Адæмон Республикæйы экономикæйы реалон сектор размæдзыд у.  Украинæйы мидæггагон  продукцийы иумиаг гуырахсты зынгæ хай  арæзт цыд Луганскы æмæ Донецкы Адæмон республикæты хыгъдæй, уыдон бюджеты рæзтмæ хастой стыр хайбавæрд», – банысан кодта министр.

Уый куыд загъта, афтæмæй Луганскы Адæмон Республикæйы сæудæджерад сæрмагондæй здæхт у хæдзарады раззагон къабæзтæм: дурæвзалы æмæ æрзæт къахынмæ. Размæдзыд сæм у металлурги æмæ згъæргуыст, афтæ ма хъæууон хæдзарад дæр, цыран ахсджиаг бынат ахсы фосдарды къабаз.

«Афтæмæй, зæгъæн ис, ис нын иумиаг интерестæ  экономикæйы къабазы ахастытæ райрæзын кæныны тыххæй», – фехъусын кодта экономикон ведомствойы сæргълæууæг.

Æмгуысткæнынады цæ-виттонæн фенæн уыд ивгъуыд дуджы  Советон Цæдисы рæстæджы дæр. Кокойты Геннадийы ныхæстæм гæсгæ, завод «Электровибромашина» Луганскы егъаудæр куыстуæттæй сæ иуимæ уыд зонадон-кондадон баиугæнды. Æмкуысткæнынæн фадат ис технологион фадыджы дæр, уымæн æмæ Луганскы куыстуæтты ис раззагон технологитæ.

«Уыдонмæ фæлтæрддзинад ис ног зонадон къабæзтæ базоныны хъуыдда-джы, уый та, мæнмæ гæсгæ райрæзын кæнын хъæуы Хуссар Ирыстоны дæр», – загъта уый.

Кокойты Геннади куыд банысан кодта, афтæмæй дыууæ республикæйæн дæр  бæрæг цымыдисдзинад ис экономикæйы фадыджы. Кæй зæгъын æй хъæуы, уый саразын æнцон нæ уыдзæн, нæ республикæты ‘хсæн стыр дæрддзæг æмæ бæрæг политикон цæлхдуртæ куы бахынцæм, уæд. Уыцы ныхдуртæ та сты паддзахадон арæнты сæрты уæзтæ ласын. Фæлæ уымæ нæ кæсгæйæ, дыууæ республикæйы дæр банысан кодтой дырыс тырнындзинад экономикон æмгуыстады рæзтмæ.

Йæхи ‘рдыгæй Хуссар Ирыстонæн йæ бон у бæрæг цымыдисдзинад равдиса  ту-ристон-рекреацион къабазы. Луганскы Адæмон Республикæ у хуссарирыстойнаг нуазыны æмæ минералон дæтты потенциалон æлхæнæг.

«III экономикон форуммæ, кæцы ауагъд æрцæудзæн афæдзы фæстæ, мах æрæвналдзыстæм бæрæг проектты реализацимæ.

Ныртæккæ мах кусæм иумиаг документ аразыныл, бадæтдзыстæм æй нæ паддзахадты къухдариуæггæнджытæм, уый фæстæ та бадзырдты фæлгæтты æрæвналдзыстæм бæрæг проектыл бакусынмæ», – загъта Экономикон рæзты министр.

Кокойты Геннади банысан кодта, зæгъгæ, Хуссар Ирыстоны делегацийыл фембæлдысты зæрдиагæй æмæ балцы дыууæ хайы дæр банысан æрцыдысты хæлардзинад æмæ кæрæдзимæ хъарм ахастытæй.

 

Дунеон информацион

агентад «Хуссар Ирыстон абон»

Comments are closed, but trackbacks and pingbacks are open.