21 июлы АИШ-ы президент Джо Байден фехъусын кодта, зӕгъгӕ, мӕ кандидатурæ нал хӕссын президентон ӕвзӕрстытӕм. 81-аздзыд политик йӕ хӕстӕ ӕххӕст кӕндзӕн ног президент равзарыны бонмӕ. Ацы хабар диссаг никӕмӕ фӕкаст, фӕлӕ уӕддӕр Байден цӕуылнӕуал стох кодта, уый фӕдыл парахат кӕны алыгъуызон информаци.
АИШ-ы президентон ӕвзӕрстытӕ ӕгас дунейы цымыдис кӕнынц, уымӕн ӕмӕ се ‘ддагон политикӕ алкӕуылдӕр ӕндавы. АИШ у хъомысджын паддзахад, тыхджын экономикон ӕмӕ ӕфсӕддон потенциалимӕ, ӕмӕ, ӕгӕрыстӕмӕй, кӕцыдӕр бӕстӕты уӕвынад комкоммӕ баст у АИШ-имӕ. Зӕгъӕм, Украинӕйӕн АИШ куынӕ уаид, уӕд афонмӕ нал дӕр уӕвид куыд паддзахад. Кӕнӕ сисӕм Израиль, – АИШ ын куынӕ уаид, уӕд ӕй йӕ сыхаг бӕстӕтӕ раджы скуынӕг кодтаиккой. Нӕ сыхаг бӕстӕ Гуырдзыстон дӕр ныр 30 азы дӕргъы АИШ-ы хӕслӕвӕрдтӕ ӕххӕст кӕны ӕмӕ сӕ паддзахады разамынады къахдзӕфтӕ комкоммӕ баст сты америкӕйаг паддзахадон департаменты домӕн-тимӕ. Ӕрмӕст мӕгуырау бӕстӕтыл нӕ цӕуы йӕ бон АИШ-ӕн, фӕлӕ ма Уӕрӕсе, Китай ӕмӕ ӕндӕр ахӕм хъомысджын бӕстӕты дӕр тыхсын кӕны йӕ зиан-хӕссӕг политикӕйӕ.
Цӕуылнæ уал сразы Байден президентон ӕвзӕрстыты хайад райсыныл?
Байденӕн йӕ позицитӕ фӕцудыдтой ӕрӕджы, Трампимӕ сын фембӕлд куы уыд дебатты, уӕд. Политикон эксперттӕ уыцы фембӕлдӕй хатдзӕгтӕ сарӕзтой, зӕгъгӕ, Байденӕн йӕхи демократон партийы минӕвӕрттӕ дӕр хъӕлӕс нал ратдзысты. Дебаттӕй райгондӕй нӕ баззадысты Байдены партийы спонсортӕ дӕр. Бирӕтӕ дзы финанстӕ дӕр нал радтой ӕвзӕрстытӕн, ома Байдены куынӕ баивой, уӕд се ‘хца «доны калынц». Демократон партийы минӕвӕртты 65 процент фӕндыд, цӕмӕй Байден ма уа ӕвзӕрстытӕм кандидатӕй хаст.
Ӕрмӕст дебаттӕ нӕ уыдысты аххосджын Байдены рейтинг къаддӕр кӕныны хъуыддаджы. Ныр цалдӕр азы дӕргъы бӕрӕг у, Байден ӕнӕниз кӕй нал у – ферох дзы вӕййынц йӕ зонгӕты нӕмттӕ, дзургӕ-дзурын схӕццӕ вӕййы, ӕдӕрсгӕ цӕуын йӕ бон нал у, адӕмы размӕ рахизгӕйӕ-иу нал зыдта, цы загътаид ӕмӕ кӕдӕм ацыдаид, уый…
Стӕй ма Байдены рӕстӕджы сцырен сты ног конфликттӕ – Украинӕйы ӕмӕ Израилы. Ахӕм конфронтацион политикӕ уадзыны фӕстиуӕгӕн АИШ-имӕ сызнаг сты дунейы фылдӕр хай. Уымӕй уӕлдай ма ӕййафынц егъау зиӕнттӕ, сӕ цӕрджыты фӕрныгад фӕкъаддӕр, се ‘хсӕнад ноджы схӕццӕ ӕмӕ сӕм криминогенон уавӕр фӕкарздӕр. Ӕппӕт ацы фактортӕ ахъаз уыдысты демократон партийы рейтинг фӕкъаддӕр кӕнынӕн. Ныр Байдены бӕсты раразмӕ кодтой кандидатӕй вице-президент Камала Харрисы. Фӕлӕ экспертты хъуыдымӕ гӕсгӕ, Харрис ӕгӕр лӕмӕгъ политикыл нымад у ӕмӕ йӕ Трампы хуызӕн фӕлтӕрд политик ӕнцонтӕй рамбулдзӕн. Ныридӕгӕн дӕр Харрисы рейтинг ныллӕгдӕр у Байденӕй.
Трампмӕ диссаг нӕ фӕкаст Байдены къахдзӕф ӕмӕ ма Камала Харрисы йӕ бӕсты куы снысан кодтой, уӕд ноджы бацин кодта, зӕгъгӕ, мын Харрис ӕнцондӕр амбулӕн уыдзӕн. Трамп ма Байдены рахуыдта «иууыл ӕвзӕрдӕр президент америкӕйы историйы». Уымӕй уӕлдай ма Трамп хъавы демократон партийыл бахъаст кӕнынмӕ. Куыд ӕмбарын кӕны, афтӕмӕй йӕ, ома, зыдтой, Байден ӕнӕниз кӕй нӕу, ӕвзӕрстыты хайад райсын йӕ бон кӕй нӕ бауыдзӕн, дзыллон информацийы фӕрӕзтӕ ӕмӕ дохтыртӕ йын йӕ низыхатт кӕй ӕмбӕхстой, фӕлӕ йӕ уӕддӕр ныры онг кӕй ныууагътой кандидатӕй. Уымӕ гӕсгӕ республикон парти йе ‘хцайы фӕрӕзтӕ ӕнӕхъуаджы бахардз кодта ӕмӕ ныр Трампы командӕ ногӕй хъуамӕ уадзой президентон æвзæрстыты компани.
Чи у Камала Харрис?
Харрисы ныййарджытӕ уыдысты эмигранттӕ – йӕ фыд Ямайкӕйӕ, йӕ мад та -Индийӕ. Йӕ рӕстӕджы Харрис уыд иунӕг ахӕм сылгоймаг, кӕцы нысан ӕрцыд Калифорнийы генералон прокурорӕй. Смой кодта, фӕлӕ йын сывӕллӕттӕ нӕй. Рагӕй фӕстӕмӕ активон хайад исы ЛГБТ ӕмӕ ӕндӕр ахӕм ницæйаг организациты размӕ кӕныны хъуыддаджы. Ӕвӕццӕгӕн йӕ карьерӕ дӕр уымӕн ӕнтыстджын рауад. Ныгуылӕн бӕстӕты ныр ахӕм тренд ис – цас фыддӕр фидиссаг митыл хӕст уай, уыйбӕрц дӕ бӕрнондӕр бынӕттӕм снысан кӕндзысты.
Бирӕ политологтӕм раст нӕ фӕкаст Харрисы раразмæ кӕнын. Фӕлӕ демократон партийӕн ӕндӕр гӕнӕн нал уыд, нӕй сын ныридӕгӕн аккаг кандидат. Стӕй ма АИШ-ы ӕмбӕстӕгтӕй негртӕ чи сты, уыдон растадаиккой сӕ ныхмӕ, ома йӕ барӕй не снысан кодтой. Уымӕй уӕлдай ма сылгоймӕгтӕ дӕр равдыстаиккой се ‘нӕразыдзинад, зӕгъгӕ, сылгоймаг кӕй у, уый тыххӕй йӕ нӕ бауагътой ӕвзӕрстытӕм.
Цы уыдзӕн дарддӕр?
Ныридӕгӕн америкӕйы политикон тыхты ‘хсӕн дзырд цӕуы, цӕмӕй Байдены аиуварс кӕной президенты бынатӕй. Ома, кӕд йӕ бон кандидатӕй уӕвын нӕу, уӕд президенты хӕстӕ ӕххӕст кӕнын йӕ бон куыд хъуамӕ уа. АИШ-ы хуызӕн хъомысджын бӕстӕйы сӕргълӕууӕг хъуамӕ уа адекватон. Ядерон хæцæнгарз сӕм ис ӕмӕ фыдбылыз ӕруадзынӕй тӕссаг у.
Куыд рабӕрӕг, афтӕмӕй ма Байден 1987 азы систа йӕ кандидатурӕ президентон ӕвзӕрстытӕм. Уӕды рӕстӕджы уыд сенатор. Ӕвзӕрстыты агъоммӕ йӕ фӕаххосджын кодтой плагиаты, ома, йӕ дзуринӕгтӕ радавта кӕмӕйдӕр. 2008 азы дӕр ӕй фӕндыд президент суӕвын, фӕлӕ йӕ партийы минӕвар Барак Обамайы рейтинг уӕлдӕр уыд ӕмӕ та йӕ бахъуыд йӕ кандидатурӕ сисын.
Абоны бон Трампы рейтинг у 44 проценты, Харрисӕн та – 39 проценты. Фӕлӕ банысан кӕнын хъӕуы уый, ӕмӕ Трампӕн кӕй фыссынц къаддӕр, Харрисӕн та – фылдӕр проценттӕ. Уымӕ гӕсгӕ дыууӕ кандидаты рейтингы ноджы фылдӕр хицӕндзинад ис. Ӕвзӕрстыты фальсификаци куынӕ уа, уӕд Трамп ныридӕгӕн демократон партийы минӕвӕрттӕй кӕйфӕнды дӕр ӕнцонтӕй рамбулдзӕн.
Ныры разамынад тӕрсынц Трампӕй бафхӕрынӕй ӕмӕ алцыдӕр аразынц, цӕмӕй Трампы ма бауадзой ӕвзӕрстытӕм. Уымӕ гӕсгӕ тӕссаг у ӕвзӕрстытӕ аивынӕй. Сӕ аивынӕн та бирӕ мадзæлттæ ис. Зӕгъӕм, хиаразгӕ финансон-экономикон кризис ацаразын зын нӕу, кӕнӕ та хакерон атакӕ сараз ӕмӕ АИШ-ы ӕппӕт финансон-хӕдзарадон архайд ӕрлӕудзӕн. Уый фӕстӕ уӕлвӕткон уавӕр бакӕнын зын нал у, фӕлӕ йӕ тӕссагдзинад дӕр уым ис, ӕмӕ дзы ахӕм уавӕрты райдадзӕн мидӕггагон хӕст. Йӕ рӕстӕджы Владимир Жириновский прогноз сарӕзта, зӕгъгӕ, 2024 азы АИШ президентон ӕвзӕрстытӕ нал ауадздзысты.
ДЖИОТЫ Алыксандр
