Аивгъуыдта 2022 аз. Уый нын уыд нæ размæцыды ног æнтыстыты аз. Социалон-экономикон рæзты къабазы Инвестицион программæйы цы мадзæлттæ нысан æрцыдысты, уыдон зæгъæн ис, сæххæст сты. Æндæр æмæ æндæр мадзæлттæ æххæст цыдысты ацы программæйæн æддейæ дæр.
Ног æрбалæугæ азы республикæйы социалон-экономикон рæзтæн ахъазгæнæг ног инвестицион программæмæ хаст цы мадзæлттæ æрцыдысты, уыдон тыххæй нын радзырдта РХИ- йы арæзтад æмæ архитектурæйы министр Зæгъойты Эдуард.
Йæ ныхæстæм гæсгæ 2023- 2025 азтæн Ивестпрограммæйы фæлгæтты реконструкци æрцæудзæнис Едыс-Цхинвалы донуадзæн. Ацы мадзал среализаци кæнын фадат ратдзæн горæт Цхинвал, Дзауы район æмæ уыдонмæ хæстæг цæрæн бынæтты цæрджыты сыгъдæг нуазыны донæй сифтонг кæнын. Уыдонæй дарддæр ма план цæуы Къостайы хъæумæ донуадзæны арæзтад. Уый арæзт куы æрцæуа, уæд нуазыны донæй ифтонг æрцæудзысты æрмæст ацы хъæуы цæрджытæ нæ, фæлæ Ногхъæу æмæ Тъбеты хъæуы цæрджытæ дæр.
Ног азы дарддæр капиталон цалцæг цæудзысты республикæйы сæйраг горæты уынгтæ. Уыдон уыдзысты фараст. Дарддæр Царзы микрорайоны арæзт æрцæудзæнис сывæллæтты цæхæрадон æмæ Харебаты Исахъы уынджы та бирæ фатерон цæрæн хæдзар.
Ивгъуыд азæй ног азмæ рахызтысты фондз объекты. Уыдон сты Знауыры районы бирæфатерон цæрæн хæдзар, нæ горæты Ирæтты уынджы бирæ фатерон цæрæн хæдзар, Леуахийы цæугæдоны сæрты хид, Ерцъо-Синагуры автомобилон фæндаг æмæ Дзауы районы Мзиугомы сывæллæтты улæфæн лагеры арæзтад.
БЕСТАУТЫ Валя
