5 январæй 8 январмæ Мæскуыйы уагъд æрцыд Æппæтуæрæсейон XXIX фестиваль-конкурс «Рождественская елка «Казачий круг». Ногазон мадзалы хайад райстой сфæлдыстадон коллективтæ æмæ курдиатджын гоймæгтæ Республикæ Татарстанæй, Алтайы æмæ Краснодары крайтæй, Новосибирскы, Ростовы, Сахалины, Челябинскы областтæй, Хуссар Ирыстонæй æмæ ма Уæрæсейы æндæр регионтæй. Конкурсы хайадисджытæ сæ арæхстдзинад æвдыстой зарынæй, кафынæй, музыкалон инструменттыл цæгъдынæй, фольклорæй, æмдзæвгæтæ аив дзурынæй æмæ æндæр номинациты.
Хуссар Ирыстонæй ахæм диссаджы фестивалмæ афæндараст кодтой Знауыры районы культурæйы хæдзары хореографион ансамбль «Ныфс»-ы. Йæ номмæ гæсгæ дзы нæ республикæйы культурæйы министрад, æвæццæгæн, ныфс æвæрдтой, сæ курдиатыл сын нæ дызæрдыг кодтой. Ансамбль «Ныфс» иттæг хорз цæттæйæ ацыдысты фестивалмæ æмæ сын сæ арæхстдзинад æмæ курдиатыл жюрийы уæнгтæ дæр сæ цæст æрæвæрдтой. Уыдон адæмы раз сæххæст кодтой дыууæ кафты – «Хæххон кафт æмæ «Чызджыты кафт». Кæд æмæ дзы бирæ аккаг коллективтæ уыд, уæддæр уæлахиздзаутæ систы хуссарирыстойнаг хайадисджытæ. Конкурсты 1-æм къæпхæнты лауреатты схорзæхджын кодтой кубоктæй æмæ дипломтæй. Сфæлдыстадон коллективты къухдариуæггæнджытæ та хорзæхджын æрцыдысты Уæрæсейы æфсæддон-историон æхсæнады æмæ Уæрæсейы хъазахъхъаг-хæстонты цæдисы грамотæтæй.
Фестивалы хайадисджытæн ма сорганизаци кодтой экскурсион программæ дæр – акодтой сæ музейон комплекс «Дорога памяти»-мæ, А.С.Пушкины номыл сурæтгæнæн аивады музеймæ, «Поклонная горайы уæвæг Уæлахизы музеймæ, УФ-йы гарзджын тыхты Сæйраг кувæндонмæ, Кремылы территоримæ (фенын сын кодтой Успенскийы стыр аргъуан).
Фестиваль-конкурсы организатортæ сты автономон æнæкоммерцион организаци «Центр патриотического воспитания и туризма «Зарница», Уæрæсейы æфсæддон-историкон æхсæнад æмæ педагогон центр «Каникулы». Уагъд цæуы 1995 азæй фæстæмæ æмæ дзы ныры онг хайад райстой 25 адæймагæй фылдæр. Кармæ нæ кæсынц – сывæллонæй суанг 80-аздзыды онг бар ис арæхстдзинад равдисынæн. Мадзал нысанмæздæхт у патриотизм, истори, культурæ æмæ традицитæ сфидар кæнынмæ. Уæлдай ахъаз у рæзгæ фæлтæрæн – дæтты сын монон хъомылад историон æмæ тардицион хæзнаты бындурыл. Стæй ма йæ фæрцы базонгæ вæййынц курдиатджын гоймæгты æмæ фольклорон коллективты арæхстдзинадимæ. Стыр ахъаз ма у æндæр æмæ æндæр нациты адæмон сфæлдыстад бахъахъхъæнынæн.
ДЖИОТЫ Алыксандр
