Нæ стратегион партнер – стыр бæстæ  Уæрæсе

Хуссар Ирыстон æмæ Уæрæсейы Федерацийы ‘хсæн Æмцæдисад æмæ интеграцийы тыххæй æхсæнпаддзахадон бадзырд иу кæны дыууæ бæстæйы æдасдзинады тыгъдад, уымæ гæсгæ РХИ-йы ныхмæ гарзджын агресси нымад цæуы, куыд УФ-йы ныхмæ агресси, афтæ. Уый тыххæй йæ комментарийы банысангонд бадзырдыл къухтæ æрфыссыныл 15 азы сæххæсты охыл фехъусын кодта Хус-сар Ирыстоны президенты паддзахадон уынаффæгæнæг Коцты Константин.

Уый банысан кодта, зæгъгæ, Хуссар Ирыстоны изоляцийы фæдыл Гуырдзыстон æмæ йæ ныгуылæйнаг партнеры цахæмфæнды бафæлвæрдтытæн дæр ницы хуызы ис бамбарæн.

«Нæ стратегион партнер у иттæг стыр бæстæ – сурзæххы уæлцъарæн йæ æвдæм хай, кæцыйæн практикон æгъдауæй йæ бон у йæхи фæдарын», – загъта Коцты Константин.

Йæ ныхæстæм гæсгæ Хуссар Ирыстоны алкæмæндæр æмбæрстгонд у, Уæрæсейы Федерациимæ ахастытæн кæй ис иттæг ахсджиаг нысаниуæг. Уæрæсе, зæгъгæ, махæн кæддæриддæр уыдис Стыр зæхх, æнæ уымæй Хуссар Ирыстоны хъуыды дæр ничи акæндзæн йæ бæстæйы фидæныл.

«Ахсджиаг у банысан кæнын, Хуссар Ирыстоны æмбæстæгтæй сæ фылдæрæн кæй ис Уæрæсейы Федерацийы æмбæстагдзинад дæр æмæ уый та ноджыдæр бæлвырд кæны дыууæ бæстæйы ‘хсæн ахастыты сæрмагонд характер, кæцытæн ис рагон истори æмæ уæрæх стратегион перспективæ».

Паддзахадон уынаффæгæнæг куыд нымайы, афтæмæй растдæр у дзурын æрмæст æхсæнпаддзахадон ахастытыл нæ, фæлæ адæмтæн сæ ахастытыл, сæ иудзинады, кæрæдзийыл æнувыддзинады æнкъарыныл.

«Уæрæсе Хуссар Ирыстонмæ æххуысмæ фæзынд 2008 азы августы иууыл уæззаудæр бонты, – зæрдыл æрлæууын кодта Константин. – Ныртæккæ республикæ уæвы æмæ ныфсимæ æнхъæлмæ кæсы йæ сомбонмæ фыццаджыдæр Уæрæсейы фæрцы.

Коцты Константины хъуыдымæ гæсгæ дыууæфарсон ахастыты гъæдыл ирдæй дзурæг у бадзырдон-барадон базæ.

«Фаг у зæгъынæн уый, æмæ бæрзонд политикон кæнæ хицауады æмвæзадыл ныридæгæн къухтæ кæй æрфыстæуыд 120 фылдæр документыл, цалдæр документыл та цæуы куыст. Уый у цæстуынгæ бæлвырдгæнæн дыууæфарсон ахастыты интенсивондзинадæн», – загъта Константин.

Уый ма йæ ныхасмæ бафтыдта, зæгъгæ, Хуссар Ирыстонæн уæлдай ахсджиагдæр сты бæрзонд æмвæзадыл контакттæ, дыууæ паддзахады уæлдæр къухдариуæггæнджыты фембæлдтытæ.

«Ахæм фембæлдтыты боны фæтк хицæн кæны йæ алыварсондзинадæй, аххæссы иууыл ахсджиагдæр фарстатыл æмæ се скъуыддзаг кæнынæн арæзт æрцæуы нысаниуæгджын къахдзæф. Ныфс нæ ис, Хуссар Ирыстон æмæ Уæрæсейы президенттæн Мæскуыйы цы фембæлд уыдис, уый ног импульс кæй ратдзæн дыууæфарсон æмгуысткæнынады ахсджиаг проектты фæдыл куыстæн», – банысан кодта Коцты Константин.