Ног ахуыры азы æрбалæудимæ йæ куыст райдыдта Хуссар Ирыстоны паддзахадон университеты музей дæр. Уый æрæджы фæхъæздыгдæр ис æртæ ног зынаргъ æмæ рагон экспонаттæй. Уый тыххæй нын фехъусын кодтой университеты пресс-службæйы.
«Музейы этнографи æмæ бæстæзонæн хайадæн цымыдисон экспонаттæ балæвар кодтой не ‘мбæстæгтæ Тадтаты Арон, Чилæхсаты Мурат æмæ Мæргъиты Ларисæ», – банысан кодтой пресс-службæйы.
Тадтаты Арон музейæн балæвар кодта 1884-æм азы уагъд карабин. Экспонатыл зыны, йæ хицау æм хорз кæй каст æмæ уый тыххæй кæй ис тынг хорз уавæры, уый. Чилæхсаты Мурат дæр музейы бафснайдта, рагæй кæй хъахъхъæдта, уыцы рагон самурайаг цирхъ. Мæргъиты Ларисæ та университеты музейæн балæвар кодта 1924-æм азы уагъд æвзист монетæ.
«Мидхъуыддæгты министрады кусджытæ æмбæлон процедурæтæ ауагътой, цæмæй Хуссар Ирыстоны паддзахадон университетмæ фæхæццæ уыдаиккой зынаргъ экспонаттæ», – загътой нын университеты пресс-службæйы.
Царды ивындзинæдтимæ, рæстæджы цыдимæ, æхсæнад æмæ æмбæстæгтæ кæмæй фæпайда кæнынц, уыцы мигæнæнтæ аззайынц рохуаты æмæ сæ нал фæархайынц, сæ бынатмæ фæзынынц ног æндæр дзаумæттæ æмæ мигæнæнтæ. Цæмæй рагон мигæнæнтæ фидæны фæлтæртæ зоной æмæ ивгъуыд историимæ зонгæ кæной хицæн бынаты, уый тыххæй дунейы алы бæстæты бахъуыд музейтæ саразыны сæр.
Хуссар Ирыстоны музейон комплекс сырæзт университеты ректор Тедеты Вадим Ботазы фырты инициативæмæ гæсгæ 2019-æм азы. Уый уыдис университеты культурон царды ахсджиаг цау, уымæн æмæ музейæн æхсæнадон царды ис йæхи сæрмагонд бынат æмæ егъау нысаниуæг. Университеты музейон комплексы сырæзтæй кæд бирæ рæстæг нæ рацыд, уæддæр дзы ныртæккæ фенæн ис бирæ алыгъуызон экспонаттæ. Сæрмагондæй ам кусынц цалдæр хайады – этнографи æмæ бæстæзонæн, зоологийы æмæ аивадон равдыстыты залтæ.
ХИПУ-йы пресс-службæ
