Мæскуыйы паддзахадон æхсæнадæмон ахастыты институт (МПÆАИ) Уæрæсейы кадджындæр ахуыргæнæндæттæй сæ иу, йæхимæ здахы æгас дунейы студентты. Ам ахуыр кæнынц фидæны дипломаттæ, æхсæнадæмон юристтæ, экономисттæ, политологтæ æмæ æхсæнадæмон бизнесы фадыджы специалисттæ. Уæдæ куыд цæрынц МПÆАИ-йы студенттæ?
Ацы институт равзарын мæнæн зын нæ уыд, уымæн æмæ фылдæрбæрцæй баст уыд æвзаджы цæттæдзинад, ахуыргæнджыты æмæ мæ фидæны альма-матеры æддеахуыры гæнæнтимæ. Афтæмæй мын МПÆАИ уыд иууыл хуыздæр вариант. Бацæуæн фæлварæнтæ æнтыстджынæй ратгæйæ, ацыдтæн Уæрæсейы дипломатон кадрты сæйраг куырдадзмæ.
Институтмæ бацæугæйæ, фыццаг бонтæй бамбæрстон, МПÆАИ-йы ахуыр кæнын кæй домы бирæ тыхтæ æмæ стыр куыст. Студенттæ сæмбæлдысты академион хæсты бæрзонд æмвæзадимæ, ам ахуыр кæнын хъæуы цалдæр фæсарæйнаг æвзаджы, ам хъуамæ специалон дисциплинæты арф аныгъуылай, афтæ ма хайад исай алыхуызон зонадон мадзæлтты. Ахуырадон программæтæ сног вæййынц дунейы цæуæг тенденцитæ æмæ хабæрттæм гæсгæ, уый студенттæн фадат дæтты æхсæнадæмон ахастыты æмæ экономикæйы фæстаг ивддзинæдтимæ базонгæ уæвын.
Уæлдай хъусдард мæ аздахын фæнды мæ факультетмæ – æхсæнадæмон бартæ. Ам тынг зын у ахуыр кæнын. Æрвылбон зонгæ кæнын уæрæсейаг закъондæттынады доктринæтимæ. Ахуыр кæнын бæстæйы ифтонгады актуалон фарстытæ лæмбынæг æмбарыныл – уыдæттæ сты ацы фадыджы сæйраг аспекттæ. Æвзæгты программæ, ома, англисаг æмæ немыцаг, рауайы тынг вазыгджын æмæ бахъæуы бирæ тыхтæ бахардз кæнын, цæмæй зонындзинæдтæ æмбæлон уагыл бамбарай.
МПÆАИ-йы цард æрмæст лекцитæ æмæ семинартыл не ‘нцой кæны. Ам ма тынг райрæзт æддеахуыры архайд: студенттæн сæ бон у хайад исын дебатты, ИНО-йы моделты, спортивон секциты, студентон сфæлдыстадон хихъæппæрисон къордты. Университет арæх фæуадзы конференцитæ, форумтæ æмæ тымбыл фынгтæ дунейы зындгонд эксперттæ æмæ политикты хайадистæй. Уый та студенттæн фадат дæтты байхъусын æмæ фарстытæ раттынæн бæрзонд æмвæзады профессионалтæм. Афтæ ахуыры азы дæргъы æз хайад истон не ‘мзæххонты Алайнаг æхсæнады мадзæлтты. Се ‘хсæн уыдысты спортивон фембæлдтытæ, зæгъæм, Уæрæсейы сгуыхт тренер Тедеты Дзамболатимæ, культурон фарсы ‘рдыгæй та – Цæгат Ирыстоны муфтий Гацалты ХадзыМуратимæ.
МПÆАИ-йы бирæ ис студентты организацитæ æмæ цымыдистæм гæсгæ клубтæ. Зæгъæм, Студентты цæдис, Европæйаг клуб, Экономистты клуб æмæ бирæ æндæртæ. Ацы организацитæ студенттæн фадат дæттынц алыхуызон фадгуыты сæ зонындзинæдтæ фæарфдæр кæнын, зонгæтæ скæнын, кæрæдзи фæлтæрддзинадимæ базонгæ уæвын æмæ сæ лидеры хиæдтæ райтынг кæнынæн.
Радзурын ма мæ фæнды, йæ барады хайады кæмæн дæн, уыцы уæрæсейаг студентты Æмæхсæнады тыххæй. Æмæхсæнад у уæлдæр ахуыргæнæндоны студентты организацитæй æппæты стырдæртæй иу, МПÆАИ-йы уæрæсейаг æмзæххонты æхсæнадты куыстæн уаг кæй дæтты, уымæ гæсгæ. Æмæхсæнад ауагъта, мæхæдæг формæ кæмæн бæлвырд кодтон, бирæ ахæм мадзæлттæ. Уыцы фæлтæрдзинад мын фадат радта бирæ адæмимæ, университетæн йæхи кусджытимæ базонгæ уæвын æмæ студентты бинонты уæнг суæвынæн.
Бирæ студенттæн, уæлдайдæр та, æндæр горæттæй æмæ бæстæтæй чи ис, уыдонæн МПÆАИ ссис сæ дыккаг хæдзар. Университеты кампус фадат дæтты æмбæлон уавæрты цæрын, ахуыр кæнын æмæ улæфынæн. Кампусы ис библиотекæтæ, спортивон залтæ, хæрæндæттæ æмæ кафетæ, уымæй та студенттæн сæ цард свæййы æнцонвадат æмæ цымыдисондæр.
МПÆАИ-йы ахуыр кæныны пайдайы миниуджытæй иу у, æхсæнадæмон здæхт ын кæй ис. Университет активонæй æмгуыст кæны æгас дунейы зындгонд ахуыргæнæндæттимæ æмæ организацитимæ, уый та студенттæн фадат дæтты æхсæнадæмон ивдтыты, стажировкæты, дывæр дипломы программæты хайад исынæн. Афтæмæй студенттæн арфдæр кæнынц сæ зонындзинæдтæ, сæ фæлтæрддзинад æмæ æхсæнадæмон архайæджы карьерæйы перспективæтæ.
МПÆАИ-йы рауагъдонтæн стыр аргъ кæнынц Уæрæсейы дæр æмæ фæсарæнты дæр. Университетæн æнгом бастдзинæдтæ ис куыстуæтты разамонджытимæ. Ам æххуыс кæнынц студенттæн зындгонд компаниты, паддзахадон уагдæтты æмæ æхсæнадæмон организациты стажировкæ рацæуын æмæ куыст ссарынæн. МПÆАИ-йы карьерон центр дæтты консультацитæ, агуры ваканситæ. Æххуыс кæны студенттæн куыст ссарынæн, уый сын стыр ахъаз фæвæййы сæ ахуыры фæстæ царды.
МПÆАИ-йы студенты цард у интенсивон ахуыр, активон æддеахуыры архайд æмæ уникалон æхсæнадæмон гæнæнты æмиуад. Студенттæ ам райсынц гъæдджын ахуырдзинад, райтынг вæййынц куыд гоймаг, райсынц, сомбон сын чи феххуыс уыдзæн, ахæм фæлтæрддзинад. МПÆАИ дæтты алы фадæттæ дæр, цæмæй алкæцы студент дæр раргом кæна йæ потенциал æмæ сæххæст кæна йæ разылæууæг нысæнттæ.
Джиоты Людвигы фырт Тимур,
МПÆАИ-йы 1-æм курсы студент
