Хуссар Ирыстоны дзыллæйад дæр цытимæ нысан кæнынц Уæрæсейы бон, уымæн æмæ нæ алкæмæн дæр у стыр æмæ зынаргъ бæрæгбон.
Уæрæсейы Федерацийы сæйраг паддзахадон бæрæгбоны цытæн алыгъуызон бæрæгбонон мадзæлттæ уагъд цæуынц нæ республикæйы столицæ Цхинвал æмæ районты дæр. 10-æм июны Анахарсисы номыл централон библиотекæйы фойейы райдыдтой ацы стыр бæрæгбоны цытæн цымыдисон мадзæлттæ, кæцытæ уагъд цæуынц Республикæ Хуссар Ирыстоны Культурæйы министрады. Централон библиотекæйы фойемæ цы бирæ адæм æрбамбырд сты, уыдон стыр цымыдисимæ зонгæ кодтой Цхинвалы районы Къостайыхъæуы нывгæнæн скъола-студийы, ахуыргæнинæгты куыстытимæ. Æрыгон нывгæнджытæ адæмы размæ хæссынц Хъырымы плэнерон куыстыты рæстæджы цы аив æмæ цымыдисон нывтыл бакуыстой, уыдонæй, кæцыты зыны уырыссаг æрдз æмæ цардуаг. Равдысты ма сæрмагондæй равæрдтой РХИ-йы сгуыхт журналист Гæззаты Иваны къухтæй арæзт хъæдæрмæгæй конд æрмæджытæ дæр.
Республикæ Хуссар Ирыстоны Культурæйы министры хæстæ æххæстгæнæг Зассеты Жаннæ байгом кодта равдыст æмæ ракодта арфæ бæрæгбоны сæраппонд. Уый банысан кодта нæ республикæйæн Уæрæсейы бон цы нысан кæны æмæ йæм цавæр ахаст дарæм, æппæт уыдæттæ æмæ цыбыртæй адæмы базонгæ кодта бæрæгбонон программæимæ. Дарддæр гимназ «Альбион»-ы ахуыргæнинæгтæ уырыссаг æвзагыл сæххæст кодтой музыкалон номыр æмæ сын уый фæстæ байуæрстой бæрæгбонон лæвæрттæ.
Централон библиотекæйы ма ацы бон æрæмбырдуæвджытæн равдыстой кинофильм, кæцыйы дзырд цыдис ирон адæмы историйыл. Уый фæстæ музыкæйы æхцон зæлтæм арæзтой кроссвордтæ. Бæрæгбоны хайадисджытæм ма бахатыдысты, цæмæй хайад райстаиккой диктант «Моя Россия»-йы дæр. Диктант фыст цыдис уырыссаг æвзагыл æмæ йæ тæлмац та ракодтой ирон æвзагмæ.
ЦХУЫРБАТЫ Ларисæ
Comments are closed, but trackbacks and pingbacks are open.