Нæ горæты сыгъдæгдзинад æмæ хæрзарæзтадыл æрвылбон дæр чи кусы, уый у цæрæнуатон-коммуналон хæдзарад. Кусджытæй иутæ сæумæрайсомæй суанг изæрмæ кусынц уынгты сыгъдæгдзинадыл, иннæтæ – æмбæлон бынæттæ цъæхвæлыст скæныныл, æндæртæ та бакусынц, æмбæстæгтæ тынгдæр сæ улæфты рæстæг кæм фервитынц, уыцы бынæттæ фæткмæ æркæныныл. Хæдзарады управленийы хистæры хæдивæг Джиоты Юри куыд радзырдта, афтæмæй уал фыццаг рады цы куыстытæ сæххæст кодтой, уыдонæй иу у, Хъайтарты уынджы рухсы цырæгътæ кæй бакодтой, уый. Уыдонæн сæ хорздзинад ис уый мидæг, æмæ æхсæвыгон рухс дæттынц тынгдæр, стæй лæугæ та кæнынц фылдæр рæстæг. Горæты иуæй-иу уынгты хицæн бынæтты асфальт скалд æмæ уыдæтты аххосæй зындзинæдтæ æвзæрстой куыд автотранспорты хицæуттæ, афтæ фистæгæйцæуæг æмбæстæгтæ дæр. Уыцы згъуыд дæр бахынцыд æрцыд æмæ ахæм куыстытæ æххæст æрцыдысты дыууæ къуырийы æмгъуыдмæ Сталины, 8-Июны æмæ æндæр бынæтты. Стыр ахадындзинад ис, бирæуæладзыгон цæрæн хæдзæртты раз цы кæртытæ ис, уыдон æмбæлон уагмæ æркæнынæн. Уыцы хъуыддаг бахынцыд æрцыд æмæ уал куыстæуы Плиты Харитоны уынджы хæдзæртты алыварс территоритæ саив кæныныл. БАМ-ы районы, Джиоты Аланы проспекты 183, 187-æм æмæ æндæр хæдзæртты раз дæр кæнынц æнгæс куыстытæ.
Хуыбиаты Никъала
