«Мӕлдзыгӕн йе ‘намонд куы ӕрцӕуы, уӕд ыл базыртӕ базайы». Украинаг фашистон режим йе ‘лгъаг цӕсгом ноджы ӕргомдӕрӕй ӕвдисы. 6 августы райсом раджы украинаг гарзджын тыхты элитон дӕлхӕйттӕ бабырстой Курскы областмӕ ӕмӕ бацахстой Суджаны район. Фӕмард сты куыд уӕрӕсейаг ӕфсӕддонтӕ ӕмӕ арӕнхъахъхъӕнджытӕ, афтӕ ма бынӕттон цӕрджытӕ дӕр. Путин ацы ӕрбабырст рахуыдта радон террористон акт.
Курскы областы арӕнты цы гарзджын тыхтӕ хъахъхъӕдтой, уыдон равдыстой хъайтардзинад, фидар фӕлӕууыдысты фашистты ныхмӕ. Фӕлӕ украинаг хӕстонтӕ ӕгӕр бирӕ уыдысты, ифтонг уыдысты уӕззау техникӕйӕ, артиллерийӕ, ӕмӕ сын бантыст 10-15 километры бӕрц размӕ абырсын. Америкӕйаг информацион фӕрӕзтӕ куыд хъусын кӕнынц, афтӕмӕй Курскмӕ бабырсыны хайад истой гуырдзиаг ӕххуырст хӕстонтӕ дӕр 120 бӕрцӕй. Сӕ командир та у Георгий Парцвания, кӕцы ныр дыууӕ азӕй фылдӕр хайад исы Уӕрӕсейы ныхмӕ хӕстон архӕйдтыты бандеронты рӕнхъыты.
Уӕрӕсейаг гарзджын тыхтӕ аккаг ныхкъуырд радтой знагӕн – ӕрмӕст фыццаг бон скуынӕг кодтой 300 фылдӕр украинаг фашисты, 50 фылдӕр та бронетехникӕ.
Знӕгты бабырст Курскы областмӕ у мас-штабон проблемӕ ӕмӕ дзы уый фӕдыл бакодтой уӕлвӕткон уавӕр. Рынчындӕттӕм алыгъуызон цӕфтимӕ бахаудтой 100 адӕймагӕй фылдӕр, ис дзы фӕмардуӕвджытӕ дӕр. Бӕрӕг аххосӕгтӕм гӕсгӕ нырма бӕлвырд информаци нӕй.
Ныгуылӕн бӕстӕтӕ фырцинӕй мӕлынц, сӕ «цагъайрӕгты» бон кӕй бацис Уӕрӕсейӕн разиан кӕнын, уый фӕдыл. Еврокъамисы ӕддагполитикон хъуыддӕгты фӕдыл минӕвар Петер Стано загъта, зӕгъгӕ, разы сты, украинаг гарзджын тыхтӕ Курскы областмӕ кӕй бабырстой, уыимӕ. АИШ-ы паддзахадон департамент та бамбарын кодта, украинаг фашисттӕ америкӕйаг ӕхсӕнгӕрзтӕй кӕй пайда кӕнынц Курскы областы, уый, зӕгъгӕ, ницӕуыл дзурӕг у, ницы ӕхсӕнадӕмон бадзырдтӕ халы.
Цы нысанӕн бабырстой Курскы областмӕ?
Ӕфсӕддон эксперттӕ куыд ӕмбарын кӕнынц, афтӕмӕй украинаг гарзджын тыхты ӕрбабырст Курскы областмӕ здӕхт у Курскы атомон электростанц байсынмӕ ӕмӕ горӕт Суджайы уӕвӕг ӕрдзон газӕрвитӕн комплекс бацахсынмӕ. Сӕ фӕндтӕ сӕ къухты куы бафтой, уӕд райдайдзысты «базар» кӕнын, ома уӕ гарзджын тыхтӕ акӕнут Харьковӕй ӕмӕ Донбассӕй, ӕмӕ уӕд мах дӕр ацӕудзыстӕм. Уыимӕ ма сӕ ноджы сӕ ныгуылӕн куратортӕн равдисын фӕнды, зӕгъгӕ ӕдых не стӕм, нӕ бон у ӕнтыстджынӕй хӕцын Уӕрӕсейы ныхмӕ, ӕмӕ нын ноджы радтут финанстӕ ӕмӕ хӕцӕнгарз. Хуымӕтӕг ӕвзагмӕ йӕ куы ракӕнӕм, уӕд Украинӕйы гарзджын тыхты хъуыд пиар, цӕмӕй сӕ хӕстонты кадыл схӕцой.
Украинаг ӕрбабырсты фӕстиуӕгӕн иууыл фылдӕр зиӕнттӕ баййӕфта горӕт Суджа. Ныридӕгӕн дзы нал ис электроны рухс, ӕрдзон газ, хъуаг ӕййафынц нуазыны донӕй. Телефон дӕр дзы рӕстмӕ нал кусы. Бынӕттон цӕрджытӕн эвакуаци аразынц, бирӕ регионтӕй райдыдтой ӕрвитын гуманитарон ӕххуыс.
Курскмӕ ӕрбабырст ӕнӕнхъӕлӕджы цау схонӕн нӕй. Уымӕн ӕмӕ уыйбӕрц бирӕнымӕц хӕстонтӕ ӕмӕ хæстон техникӕ сусӕгӕй нӕ бакодтаиккой Уӕрӕсейы арӕнтӕм. Хӕстон дуджы развæдсгæрст ӕппынӕдзух кусы ӕмӕ бафиппайдтаиккой уыйбӕрц ӕфсӕддонты змӕлд. Стӕй ма бынӕттон цӕрджытӕй дӕр бирӕ хӕрзгӕнджытӕ ис Уӕрӕсейӕн ӕмӕ уыдон дӕр фехъусын кодтаиккой уыцы хабӕрттӕ. Фӕлӕ та радон хатт арӕнтӕ ӕмбӕлонӕй не сфидар кодтой, куыд ӕмбӕлы, афтӕ нӕ бацӕттӕ кодтой сӕхи знаджы ӕрбабырстмӕ.
Афтӕ зӕгъӕн нӕй ӕмӕ знӕгты ныхмӕ цы арӕнхъахъхъӕнджытӕ ӕмӕ ӕфсӕддонтӕ лӕууыдысты, уыдон сӕхи лӕмӕгъ равдыстой. Ныридӕгӕн ис информаци сӕ хӕстон сгуыхтдзинӕдты тыххӕй. Се ‘хсӕн ис ирон хӕстонтӕ дӕр.
8 августы Курскы областы хъахъхъӕнджытӕм ӕххуысмӕ фӕзындысты ӕндӕр ӕфсӕддон дӕлхӕйттӕ. ЧВК «Вагнер»-ы хӕстонтӕ ратындзыдтой ӕххуысмӕ Белорусӕй ӕмӕ фронтмӕ бацӕугӕйӕ, хъазуатон тохты бацыдысты украинаг фашисттимӕ. Хуссарварсӕй та сӕм ӕххуысмӕ ссыдысты «Ахмат»-ы спецназ, интернационалон бригадӕ «Пятнашка» ӕмӕ батальон «Сӕрмӕт». Ныридӕгӕн знаг ӕййафы егъау зиӕнттӕ, сӕ азмӕлӕнтӕ сын ӕрӕхгӕдтой, ӕмӕ, хӕстон ӕвзагыл дзургӕйӕ, бахаудтой къӕпхӕны. Размӕ абырсыны фадат сын нал ис ӕмӕ фӕстӕмӕ лидзгӕйӕ та ӕрхъулайы хауынц. Цы фӕндӕгтыл сӕм цӕуы ӕххуыс, уыдон сты уӕрӕсейаг сармадзанты контролы бын.
Знӕгтӕ 9 августы райсом раджы бырстой Курскы атомон электростанцмӕ, фӕлӕ сын дзы ницы рауад. Ныридӕгӕн Суджайы уӕвӕг ӕрдзон газуадзӕн комплекс йӕ куыст ӕрлӕууын кодта ӕмӕ Европӕмӕ ӕрдзон газ нал цӕуы. Уый фӕстиуӕгӕн Европӕйы ӕрдзон газы аргъ бӕрӕг фӕзынаргъ ӕмӕ ноджы хӕрдмӕ хизы. Иууыл фылдӕр зиӕнттӕ дзы баййӕфта Венгри, кӕцы ӕрдзон газ иууылдӕр иста Уӕрӕсейӕ.
Курскы областмӕ бабырст стратегион цӕстӕнгасӕй ницы пайда уыд Украинӕйӕн. Фыццаджыдӕр, ам цагъды кӕнынц сӕ цӕттӕдӕр ӕфсӕддон дӕлхӕйттӕ, стӕй ма сын размӕ абырсыны уавӕртӕ дӕр никуы уыдаид, уыйбӕрц хъомысад сӕм нӕй. Ацы бабырст пайда у Зеленский ӕмӕ йе ‘мцӕдисонтӕн. Фӕнды сӕ хӕсты фӕрцы ноджы фылдӕр рӕстӕг къухдариуӕг кӕнын Украинӕйыл. Сӕ къухты исты ӕнтыст куы бафта, уӕд та сын фадат уыдзӕн «цӕсгомджынӕй» финансон фӕрӕзтӕ ракурынӕн.
Курскы трагикон цаутӕ тынг бандӕвтой Уӕрӕсейы ӕхсӕнадыл. Ӕртӕ бонмӕ не ‘мбӕстӕгтӕ цалдӕр хатты фӕфылдӕр кодтой сӕ финансон ӕххуыстӕ фронтӕн. Уыимӕ ма бӕрӕг фӕфылдӕр сты бархион ӕфсӕддонты нымӕц – цӕуынц ӕмӕ сӕхи фыссын кӕнынц гарзджын тыхты рӕнхъытӕм. Курскы уӕлвӕткон уавӕры бакондӕн радтой федералон нысаниуӕг ӕмӕ ныр ӕппӕт процесстыл къухдариуӕг кӕндзысты федералон центрӕй.
ДЖИОТЫ Алыксандр
