Нæ республикæйы паддзахадон киноконцертон зал «Чермен»-ы уагъд æрцыд ирон национ кæфтыты конкурс-фестивалы уæлахиздзауты гала-концерт. Хайад дзы райстой нæ республикæйы 14 скъолайы ахуыргæнинæгтæ, куыд районты, афтæ горæтты хореографион къордтæ дæр. Бæрæгбонмæ фæуазæг сты цытджын уазджытæ, Хицауады Сæрдары хæдивæг Пухаты Эрик, Ахуырад æмæ зонады министр Гасситы Натали. Жюрийы уæнгтæ уыдысты РХИ-йы сгуыхт ахуыргæнæг Дзабиты Екатеринæ,  Гуырдзыстоны сгуыхт артисткæ Гугутишвили Медея (жюрийы сæрдар) æмæ Абхазы сгуыхт артисткæ Санахъоты Жаннæ.

Мадзал бацæуæн ныхасæй байгом кодта Дзигойты Маринæ. Уый, фыццаджыдæр, стыр бузныг загъта Ахуырады æмæ зонады министрадæн, кæцыйы хъæппæрисæй æрвылаз дæр ацы конкурс уагъд æрцæуы бæрзонд æмвæзадыл. Уыдон бацархайдтой, цæмæй нæ республикæты скъолаты арæзт æрцыдаиккой национ хореографион къордтæ, æмæ афтæмæй сывæллæттæ бауарзой ирон кæфтытæ, уарзой аивад, зоной æмæ аргъ кæной ирон адæмы традицитæн.

Гала-концерты хайадисджытæн ирон национ уæлæдарæс æлхæд æрцыдысты рæзгæ фæлтæры монон-хъомыладон программæйы фæлгæтты. Ацы аз фестивалы фыццаг хатт хайад райстой сабидæтты хъомылгæнинæгтæ дæр. Уыдон гала-концерты сæхи равдыстой тынг активонæй æмæ стыр æхцондзинад æрхастой залы бадджытæн.

Конкурсы домæнтæм гæсгæ йæ хайадисджытæ фыццаджыдæр хъуамæ бацæттæ кодтаиккой ирон адæмон кæфтытæй сæ иууыл уæздандæр æмæ рæсугъддæртæй дыууæ – «Симд» æмæ «Хонгæ кафт». Фестивалы уагæвæрдмæ гæсгæ, скъоладзауты нымæц бирæ кæм у, уыцы скъолаты хореографион къордтæ хъуамæ бацæттæ кодтаиккой кафт «Симд», сывæллæтты нымæц къаддæр кæм у, уыдон та –  «Хонгæ кафт».

Конкурсы финалмæ ахызтысты цыппар хореографион къорды. Жюрийы уынаффæмæ гæсгæ æртыккаг къæпхæны дипломæй хорзæхджын æрцыд нæ горæты фыццæгæм астæуккаг скъола, (къорды къухфдариуæггæнджытæ Икъаты Миленæ æмæ Беройты Иринæ). Ацы скъола кæд æрæджы байгом, уæддæр ын ис стыр æнтыстытæ, куыд ахуыры, афтæ аивады къабазы дæр. Дыккаг бынат лæвæрд æрцыд дыууæ скъолайæн –  Дзауы скъола-интернат ( къухдариуæггæнæг Коцты Лаурæ) æмæ Дзауы астæуккаг скъолайæн (къухдариуæггæнæг Санахъоты Альбинæ). Æмæ фыццаг бынат та бацахста Цхинвалы скъола-интернат (къухдариуæг-гæнæг Тасойты Азæмæт). Гран-при та радтой 5-æм астæуккаг скъолайæн (къухдариуæггæнæг Чилæхсаты Георги). Ацы скъола уæлахиздзау ссис ныр æртыккаг хатт. Скъолатæн се ‘ппæтæн дæр лæвæрд æрцыдысты бузныджы гæххæттытæ.

Фестивалы организатортæ æмæ хайадисджытæн бузныджы ныхæстæ загъта РХИ-йы Хицауады Сæрдары хæдивæг Пухаты Эрик æмæ банысан кодта, зæгъгæ, ахæм фембæлдтытæ стыр ахъаз сты национ культурæйы размæцыдæн. «Абон цы æхцондзинад райстон, ахæм æхцондзинад никуы райстон профессионалты кафтмæ кæсгæйæ дæр. Мадзал уæлдай тынгдæр барæсугъд кодтой сæ кафтæй нæ сабидæтты сывæллæттæ, стыр бузныг чи сæ бацæттæ кодта, уыдонæн», загъта уый æмæ ма йæ ныхасмæ бафтыдта, зæгъгæ, фæсивæды монон-хъомыладон программæйыл дарддæр дæр куыст кæй цæудзæн. «Ацы программæйыл дарддæр куыст цæуы æмæ æввахс рæстæджы 2017-2019 азтæн райсдзыстæм ног программæ. Йæ реализаци кæныны фæлгæтты республикæйы ахуырадон уагдæттæн дарддæр дæр æлхæд цæудзæн национ кафты уæлæдарæс», – банысан кодта Пухаты Эрик.

Ахуырад æмæ зонады министры хæдивæг Лолаты Аслан дæр стыр бузныг загъта фестивалы хайадисджытæн сæ активон хайадисты тыххæй æмæ банысан кодта, зæгъгæ йын тынг æхсызгон у, нæ культурæ  æмæ æгъдæуттæ бахъахъхъæныныл кæй кусæм, уый. «Мах дарддæр дæр кусдзыстæм, цæмæй нæ фæси-вæдæн уарзын кæнæм нæ адæмы культурæ æмæ традицитæ».

Кокайты З.

Comments are closed, but trackbacks and pingbacks are open.