Ацы аз Инвестицион программæйы фæлгæтты арæзтадмæ цы уынгтæ бахаудтой, уыдон нымæцы ис нæ горæты Кобылы фырты уынг дæр. Рацæудзæн чысыл рæстæг, æмæ та аразджыты иузæрдион æмæ хъаруджын куысты фæрцы барухс кæндзысты цæрджыты домæнтæ.

Ацы уынг дæр 2008-æм азы августы хæсты аххосæй бынтон ныххæлæттаг æмæ дзуапп нал дæтта, куыд фистæгæйцæуджытæн, афтæ автотранспорты хицæуттæн дæр. Ныртæккæ уым, зæгъæн ис, æмæ нал змæлы транспорт, уымæн æмæ дзы асфальт скæныны агъоммæ кæнынц арæзтадон-цалцæггæнæн куыстытæ. Фыццаградон куыстытæ æххæст кæнын йæхимæ райста ПУК «Водоканал»-ы организаци æмæ йæм æвналгæ та бакодтой 4 марты.

Уæдæй абонмæ уал ахицæн кодтой куыстыты иу хай. Ис сæм алыгъуызон техникæ æмæ фаг кусæгдых. Кусджытæ дих æрцыдысты дыууæ бригадæйыл æмæ сæ алчи дæр æнæзæрдæхудтæй æххæст кæны, цы хæстæ сыл ис, уыдон æмгъуыдæй раздæр ахицæн кæныныл. Сæ иутæ кусынц канализацион хæххытæ æрбæстон кæныныл, иннæ бригадæйы уæнгтæ та архайынц сæйраг хаххæй хицæн цæрджыты хæдзæрттæм нуазыны доны хæх-хытæ аразыныл. Боныгъæд уыцы бон дæр кæд мæнæ хæрзтæй нæ уыд, уæддæр уый нæ къуылымпы кодта кусджыты æмæ æд техникæ цырд змæлыдысты сæ хæстæ æххæст кæныныл.

Бригадæйы хистæр Джиоты Аслан куыд радзырдта, афтæмæй куыстытæ иууылдæр æввахс бонтæм сæххæст кæндзысты Советон уынджы онг æмæ та стæй дарддæр кусдзысты уымæй дарддæр. Кусджытæй иууылдæр нæ худы зæрдæ, алчи дæр сæ счъилдысæй æххæст кæны йæ разылæууæг хæстæ, фæлæ уæддæр хуыздæрты ’хсæн дæр вæййы хуыздæртæ. Уыдон та сты Цхуырбаты Владик, Кокойты Дзанг, Цъæхилты Серги, Коцты Эдик, Шауердаты Радик, Гæбæраты Ацæмæз æмæ æндæртæ.

ХУЫБИАТЫ Н.

Comments are closed, but trackbacks and pingbacks are open.