Нæ республикæйы цы æвæрццаг ивындзинæдтæ æрцыд, уыдонæй сæ иу у кадетты скъола бакæнын. Кадетты скъола, куыд Хъахъхъæнынады министрады структурон дæлхай, афтæ конд æрцыд РХИ-йы Хицауады уынаффæйæ 2011 азы апрелы, республикæйы хъахъхъæнынады ныры министр, инæлар-лейтенант Гассеты Ибрагимы хъæппæрисæй.
Цалдæр азы дæргъы кæд кадетты скъола уыд фыццаг астæуккаг скъолайы агъуысты, уæд ын ныр та ис йæхи сæрмагонд бæстыхай Цхинвалы районы Ирыхъæуы.
Скъолайæн ис йæхи устав, фæтк æмæ нысан. Йæ сæйраг нысан у йæ ахуыргæнинæгтæн æфсæддон-патриотон хъомылад радтын.
Йæ бакондæй кæд дæс азы йедтæмæ нæ рацыд, уæддæр ын ис хорз фæстиуæг. Дæс азы дæргъы скъола рауагъта 274 рауагъдоны. Рауагъдонтæн сæ фылдæр сæ ахуыр адарддæр кæнынц Уæрæсейы престижон уæлдæр æфсæддон ахуыргæнæндæтты, кæцытæ ахуыры фæс-тæ кадрон офицертæй æрыздæхынц сæ райгуырæн Ирыстонмæ æмæ цæсгомджынæй фæс-лужбæ кæнынц республикæйы тыхон стуктурæты.
Скъола у цыппаразон, ис дзы цыппар къласы – 8-11 кълæстæ. Цæмæй кадетон скъола æмбæлон фæтк æмæ уагыл кусын райдыдтаид, уый тыххæй стыр куыст бакодта скъолайы къухдариуæггæнæг æмæ бындурæвæрæг булкъон Тадтаты Артур. Йæ хæстон æмæ педагогон фæлтæрддзинады, фидар удыхъæды æмæ æвæллайгæ архайды руаджы абон скъола кусы æххæст хъомысæй.
Скъолайон цардмæ уæзгæ хайбавæрд хæс-сынц ахуырадон куысты фæдыл хистæры хæдивæг Джиоты Эльвирæ æмæ хъомыладон куысты фæдыл хистæры хæдивæг Цхуырбаты Нэя дæр.
Скъолайы ис цыппар профессионалон офицер-хъомылгæнæджы. Уыдон курсантты цæттæ кæнынц профессионалон æфсæддон службæмæ. Уыдон сын амонынц райдиан æфсæддон службæйы ногдзинæдтæ.
Скъолайы кусынц фæлтæрд педагогтæ. Сæхиуыл æнæауæрдгæйæ, кадеттæн сæ зонындзинæдтæ рæдауæй амонынц Адæмон ахуыргæнæг, РХИ-йы сгуыхт педагог, уырыссаг æвзаг æмæ литературæйы ахуыргæнæг Сомхиева Ангелинæ, РХИ-йы сгуыхт педагог, ирон æвзаг æмæ литературæйы ахуыргæнæг Хуыбылты Венерæ, РХИ-йы сгуыхт педагог, англисаг æвзаджы ахуыргæнæг Плиты Инесса, РХИ-йы сгуыхт педагог, географийы ахуыргæнæг Цхуырбаты Нэя, РХИ-йы сгуыхт педагог, физикæйы ахуыргæнæг Карапетова Екатеринæ.
Кадетты скъолайы куыст æмæ ахуырмæ лæмбынæг йæ хъус дары, бахъуыды рæстæджы кæд-дæриддæр сæ фарсмæ балæууы скъолайы куратор, сæрмагонд скондимæ куысты фæдыл хъахъхъæнынады министры хæдивæг Гасситы Æхсар.
Скъолайон царды æмæ сывæллæтты æфсæддон-патриотон хъомылады процессы активон хайад исы хъахъхъæнынады министры хæдивæг Тыджыты Алан дæр. Ирыстоны историон æмæ уаз бынæттæм экскурситы дæр ацæуы семæ æмæ сæ базонгæ кæны сæ историимæ.
Кадетон скъолайы хъомылгæнинæгтæ æрвылхатт дæр активон хайад райсынц горæтон æмæ республикон скъолаты ‘хсæн предметон олимпиадæты, спортивон æмæ культурон мадзæлтты æмæ бацахсынц призон бынæттæ.
Кадеттæн æнæ аргъæй лæвæрд цæуы æфсæддон дарæс, ахуыргæнæн чингуытæ, фыссæнгæрзтæ, лæвар сихор, афтæ ма сын рахицæн чындæуыд сæрмагонд автобус, кæцы сæ аласы скъоламæ æмæ – фæстæмæ. Уыимæ иумæ ма курсанттæ исынц стипенди дæр, чи куыд ахуыр кæны, уымæ гæсгæ, зæгъæм, æртæтыл чи ахуыр кæны, уый исы 200 сомы, цыппæртыл чи ахуыр кæны уый – 600 сомы, 1000 сомы та исынц, хæрзтыл чи ахуыр кæны, уыцы курсанттæ. Кæд стипенди бирæ нæу, уæддæр ахъаз у стимулæн. Курсанттæн ис сæрмагонд карточкатæ, уыцы карточкатæм хынцыд цæуы се стипенди.
Цалынмæ коронавирусы пандеми нæ райдыдта, уæдмæ-иу кадеттæ арæх ацыдысты экскурсийы Хъырыммæ, Абхазмæ, Мæскуымæ. Ахуырадон-хъомыладон куысты программæйы фæлгæтты-иу æрвылаз дæр 3-4 боны æмгъуыдмæ кадеттæ экскурсийы ацыдысты «Лермонтовы бынæттæм» – горæттæ Ессентук, Кисловодск æмæ Пятигорскмæ. Алы аз дæр-иу ахуыры азы кæрон цыбыркъух бинонты сывæллæтты улæфынмæ арвыстой денджызмæ.
Цалынмæ коронавирусы пандеми нæ райдыдта, уæдмæ æрвылаз дæр Мæскуыйы уагъд цыдысты кадетон сбортæ, цыран хуссарирыстойнаг кадеттæ дæр истой активон хайад æмæ-иу рамбылдтой призон бынæттæ. Фæстаг хатт цы сбортæ уагъд цыдысты, уым Хуссар Ирыстоны кадетон скъолайы курсанттæ фæстиуæгон бахыгъды бацахстой фыццаг бынат.
Банысан кæнын хъæуы уый, æмæ æрмæст æфсæддон парадты нæ, фæлæ республикæйы иунæг паддзахадон бæрæгбон дæр нæ ацæуы æнæ кадетты хайадистæй.
Лæппутæй дарддæр кадетон скъолайы ахуыр кæнынц чызджытæ дæр. Уыдон лæппутæй фæсте ницæмæй лæууынц, æххæст кæнынц куыд уставы, афтæ æфсæддон цæттæдзинады æппæт домæнтæ дæр.
Уæлдæр æй куыд банысан кодтон, афтæмæй кадетты скъолайы царды ахсджиаг бынат ахсы æфсæддон-патриотон хъомылад. Скъолайы ауагъдæуы æхсардзинады уроктæ, кæцыты рæстæджы курсанттæ фембæлынц 1989-2008 азты хæстон архайдтыты хайадисджытимæ, кæцытæ тох кодтой Хуссар Ирыстоны сæрибардзинады тыххæй, фембæлынц ма Стыр Фыдыбæстæйон хæсты æмæ Афганистаны хæсты ветерантимæ дæр. Ахæм уроктæ хъомыладон процессæн сты ахсджиаг.
Кадетты скъоламæ бацæуынвæнд чи кæны, уыдон физикон æгъдауæй хъуамæ уой фидар, сæххæст кæной спортивон нормавтивтæ, зачеттæ радтой математикæ, истори, ирон, уырыссаг æмæ англисаг æвзæгтæй, уыимæ иумæ ма сæм хъуамæ уа психологæй разыйы гæххæт дæр.
ОСИАТЫ Индирæ
Comments are closed, but trackbacks and pingbacks are open.