Ирон театралон аивад æмæ литературæмæ егъау хуынтæ чи бахаста, ирон сылгоймаджы æмæ актрисæйы ном бæрзонд чи хаста, нæ уыцы уарзон æмæ курдиатджын артисткæ Галуанты Людмилæйыл 14-æм февралы сæххæст уыдаид 86 азы. Галуанты Людмилæйы рухс ном ссарыны тыххæй Хуссар Ирыстоны паддзахадон драмон театры уагъд æрцыд мысæн мадзал «Тых ныл кæнæт æрмæстдæр уарзт», зæгъгæ, ахæм номимæ.
Номарæн мадзал райдыдта документалон кинойæ, кæцыйы æвдыст цыдис Галуанты Людæ. Экранмæ кæсгæйæ, цæстытыл уадысты зындгонд артисткæйы саразгæ фæлгæндзтæ æмæ йæ хъазт. Райгуырæн бæстæмæ уарзондзинадыл æмæ нæ республикæйы суверенитет чи бахъахъхъæдта, уыцы хъайтартыл Людмилæ Графы чызг цы æмдзæвгæтæ ныффыста, уыдонæй фæсивæды минæвæрттæ аив бакастысты æмæ сæм адæм хъусынтыл фесты. Уый фæстæ экраныл æвдыст цыдысты, номдзыд артисткæ цы спектакльты хъазыд, уыдонæй скъуыддзæгтæ.
Галуанты Людмилæ уыдис Республикæ Хуссар Ирыстон æмæ РЦИ-Аланийы адæмон артисткæ, Хетæгкаты Къостайы номыл паддзахадон премийы лауреат æмæ уымæ гæсгæ ацы мысæн изæры хайад райстой дыууæ Ирыстоны популярон зарæггæнджытæ. Хуссарирыстойнаг æмæ Цæгат Иры артисттæ Галуанты Людмилæйы фыст æмдзæвгæтыл сæххæст кодтой зæрдæмæхъаргæ зарджытæ. Зарæггæнæг Лалыты Хъазбег банысан кодта: «Махæн Галуанты Людмилæ басгуыхт номдзыд сылгоймагæй, уый æгæрон уарзтæй уарзта йæ райгуырæн бæстæ, бирæ сарæзта ирон аивады рæзты хъуыддагæн æмæ йын йæ рухс ном кæддæриддæр фидæны фæлтæртæ æмæ мах дæр дардзыстæм нæ зæрдыл». Цалдæр азы размæ Галуанты Людмилæйы тыххæй рацыд чиныг «Мæ адæм, уæ разы лæууын æз ныфсджынæй», кæцыйы автор у Хетæгкаты Оксанæ. Уый адæмы зæрдыл æрлæууын кодта, чиныджы рацыдыл Людмилæ стыр æхсызгонæй кæй сæмбæлд, уый. Дзæнæттаг Галуанты Людæйы арфæйы ныхæстæ чиныджы авторæн æрцыдысты фыст æмæ сæ байхъусын кодтой æрæмбырдуæвджытæн. Йæ раныхасы Хетæгкаты Оксанæ бирæ рæсугъд æмæ аккаг ныхæстæй ссардта Людмилæйы рухс ном.
Галуанты Людмилæ курдиатджын артист уыдис, суанг йæ зæры бонтæм йæ куыст нæ уагъта сценæйыл, уыд йæ дыккаг хæдзар. Йæ фæстаг роль сæххæст кодта Гаглойты Владимиры пьесæмæ гæсгæ æвæрд спектакль «Ныййарæджы кадæг»-ы. Людмилæ ацы роль сæххæст кодта æртæ хатты æндæр æмæ æндæр азты. Цы бирæ спектакльты ахъазыд, уыдон-иу кæддæриддæр уарзон уыдысты сценæмæкæсджытæн, кæцыфæнды жанры дæр йæ ирд фæлгæндзтæй фæндаг ардта адæмы зæрдæтæм æмæ ссис æцæг адæмон артисткæ.
Галуанты Людмилæйы рухс ном арынæн зæрдæмæхъаргæ зарджытæ сæххæст кодтой Хуссар Ирыстоны паддзахадон ансамбль «Симд»-ы нæлгоймæгты хор, Харебаты Вадим, Бекъойты Вано, Хаситы Сослан, Æлборты Инал, Гуцаты Нодар, Лалыты Хъазбег, Харебаты Мартæ, нæ театры артисттæ æмæ æндæртæ. Мысæн мадзал фæцис зарæг «Мæ Ирыстон»-æй Галуанты Людмилæйы фыст æмдзæвгæйыл.
Нæ уацх.
Comments are closed, but trackbacks and pingbacks are open.