Ис финанскæнынад, хъæуы куысты темптæ фæтагъддæр кæнын хицæн объектты

Хицауады Сæрдар Джуссойты Константин ауагъта 2024 азы Инвестпрограммæ реализаци кæныны фарстаты фæдыл штабы радон рабадт. Хайад дзы райстой арæзтад, архитектурæ æмæ цæрæнуатон-коммуналон хæдзарады министр Цоциты Зауыр, Хицауады аппараты къухдариуæггæнæг Пæррæстаты Алинæ, сæудæджерад, транспорт æмæ энергетикæйы комитеты сæрдар Къæбысты Ацæмæз, Автомобилон фæндæгты арæзтад æмæ эксплуатацийы фæдыл комитеты сæрдар Гæбæраты Алан, паддзахадон унитарон куыс­туат «Водоканал»-ы директор Сиукъаты Иван æмæ æндæртæ.

Ныхас цыд Сиукъаты Таймуразы уынгыл къæвдадæттæцæуæн канализацийы, микрорайон «Солнечный» æмæ Хъорнисы хъæуы хиды арæзтады фарстатыл, афтæ ма Дзауы районы сывæллæтты улæфæн лагерь эксплуатацимæ радтын.

Аразджытæ банысан кодтой, зæгъгæ, арæзтадон объекттæн æхцайы фæрæзтæ хицæн цæуынц Инвестпрограммæйы фæлгæтты æнæкъуылымпытæй, фæлæ хицæн арæзтадон фæзуатты куысты темптæ хъæуы фæтагъддæр кæнын.

Хицауады Сæрдар банысан кодта, Инвестпрограммæйы мадзæлттæ среализаци кæныны фæлгæтты хæстæ рæстæгыл æххæст кæныны ахсджиагдзинад æмæ аразджытæй æмæ профилон министрадты æмæ ведомствоты къухдариуæггæн­джы-тæй æрдомта, цæмæй куыст уа конструктивондæр.

«Инвестпрограммæйы хæстæ æмæ Хицауады хæслæвæрдтæ скъуыддзаг кæнынмæ хъæуы констурктивон ахаст дарын. Мах æмбæлæм, цæмæй радон рабадты фехъусын кæнæм Инвестпрограммæ реализаци кæныны иууыл ахсджиагдæр фарстаты фæдыл эффективон фæндтæ. Уымæ гæсгæ, курæг дæн профилон организациты къухдариуæггæнджытæй, цæмæй лæмбынæгдæр хъусдард æмæ бæрнондæрæй кусой боны фæткыл æмæ цæттæ уынаффæтимæ æрбацæуой штабы рабадтмæ», – банысан кодта Джуссойты Константин.

Уый ма банысан кодта, зæгъгæ, арæзтады рæстæджы сæвзæргæ техникон æмæ организацион хуызы фарстатæ хъуамæ скъуыддзаг цæуой республикæйы цæрджыты интерестæ хынцгæйæ.