Хистæр фæлтæрæн кæддæриддæр æхсызгон вæййы, сæ хорз хъуыддæгтæ сын кæстæртæ кадимæ куы мысой æмæ куы дарддæр кæной. Хистæр фæлтæрæй та абоны бонмæ дзæвгар раппæлинаг миниуджытæ æрхæццæ. Уыдон ахсджиагдæртæй сæ иу, кæй зæгъын æй хъæуы, Фыдыбæстæмæ уарзондзинад у, æдзухдæр ын йæ хæрзиуджытыл фарны хъуыддæгтæ æфтауын, куы бахъæуа, уæд та йын йæ сæрибардзинад хъахъхъæнын. Ныртæккæ сабыр дуджы æрвитынц сæ рæстæг кæстæртæ, фæлæ сæ рох не сты, хистæртæ Райгуырæн бæстæйы сæраппонд цы æнæмсæр тохты бахсыстысты, уыцы цаутæ. Уый сæраппонд цытджын æгъдауæй банысан кæнынц Фыдыбæстæ хъахъхъæнæджы бон, æрæмысынц сын сæ хæстон сгуыхтдзинæдтæ.
Ахæм бæрæгбонон мадзал æрæджы уагъд æрцыд, Советон Цæдисы Хъайтар Цоциты Уасилы номыл Цхинвалы 10-æм астæуккаг скъолайы дæр. Мадзалмæ фæхуыдтой Стыр Фыдыбæстæйон хæсты активон хайадисæг Тедеты Никъала, горæты Ветеранты советы сæрдар Гобозты Æхсар æмæ йæ хæдивæг Козаты Павелы. Æрæмбырдуæвджыты раз раныхас кодта æмæ 1941-1945-æм азты ирон адæмы фырттæ æмæ чызджыты сгуыхт-дзинæдты тыххæй, стæй Хуссар Ирыстоны сагсур фæсивæды хъæбатырдзинад гуырдзиаг хотыхджынты ныхмæ тохты фæдыл радзырдта ацы скъолайы ахуыргæнæг Джиоты М. Æрбахастой Ирыстоны тырыса, айзæлыдысты ирон гимны зæлтæ. Зæгъын хъæуы, ацы скъолайы раздæры рауагъдонтæ сæхи аккагæй кæй равдыстой гуырдзиаг лæгхорты ныхмæ æнæмсæр тохты, æмæ дзы бирæтæ нал æрæййæфтой абоны сабыр рæстæг. Уæлахизы боныл чи нал бацин кодта, уыдон рухс нæмттæ мадзалы хайадисджытæ ссардтой иу уысм æдзæмæй алæууынæй.
Скъоладзаутæ æххæст кодтой хæстон зарджытæ, кастысты æмдзæвгæтæ ирон æмæ уырыссаг æвзæгтыл. Хорз рауадысты, ахуырдзаутæ æфсæддон цардæй инсценировкæтæ кæй равдыстой, уыдон дæр. Уымæй дарддæр дзуаппытæ лæвæрдтой æфсæддон хъуыддæгты тыххæй æндæр æмæ æндæр фарстытæн. Нæ республикæ фæстаг хæстон азты цы фæндæгтыл рацыд, уыдонмæ та кастысты экраныл. Иудзырдæй, бæрæгбонон мадзал рауад зæрдæмæдзæугæ æмæ дзы се ‘ппæт дæр баззадысты райгондæй. Скъолайы хъæрмуд коллектив сæ уæздан ахаст равдыстой уазджытæм дæр æмæ сын бакодтой зæрдылдарæн лæвæрттæ.
Банысан кæнын мæ фæнды, уый æмæ скъолайы коллективæн кæй нæй алыгъуызон мадзæлттæ бацæттæ кæнын æмæ ауадзыны тыххæй сæрмагонд бынат. Скъолайы агъуыст у тынг цалцæгкæнинаг, йæ астæрдтæй уынгæг кæны адæймаджы зæрдæ. Раст у, скъола куы сырæзт, уæдæй нырмæ дзæвгар рæстæг рацыд, фæлæ рæстæджы цыдимæ ивынц, хуыздæр кæнынц царды домæнтæ дæр. Кæд йæ райдианы ахуыргæнджытæ сæ уавæртыл хъæцыдысты, уæд ныр абон уыдонæн быхсæн нал ис. Уый уыд ахуыргæнджыты коллектив æмæ ныййарджыты рæстагон домæн. Сæ домæнтæ та æххæст куы æрцæуой, уæд ахуыр-хъомыладон куыст æмæ бæрæгбонон мадзæлттæ уадзынæн уыдзæн хуыздæр фадæттæ.
Хуыбиаты Н.
Comments are closed, but trackbacks and pingbacks are open.