Фыццаг хатт — Хуссар Ирыстоны зæххыл

Куыд зонæм, афтæмæй Фæсивæды боны цытæн РХИ-йы Президент Тыбылты Леонид æмæ Фæсивæдон политикæ, спорт æмæ туризмы хъуыддæгты фæдыл комитеты фæхуындмæ гæсгæ фыццаг хатт Хуссар Ирыстонмæ æрцыдысты популярон румынаг къорд «Morandi»-йы хайадисджытæ. Театралон фæзуаты концерты размæ уыдонæн мультимедион пресс-центр Sputnik-ы пресс-конференци уыд Хуссар Ирыстоны дзыллон информацийы фæрæзты минæвæрттимæ. Къорды сконды ис аст хайадисæджы бæрц. Пресс-конференцийы хайад райстой къорды сæйраг солист Андрей Ропчеа (Ранди), Георге Александру æмæ Кристина Хемей, кæцы пресс-конференцийы размæ раарфæ кодта, Цхинвалмæ сæ кæй фæхуыдтой, уый тыххæй. «Тынг æхсызгон нын у, цымыдисон истори æмæ диссаджы æрдз цы бæстæйæн ис, уырдæм кæй æрцыдыстæм, уый. Ахæм бæрзонд хæхтæн арæх фенæн нæй», — загъта Хемей.

Уазджытæ журналистты фарстытæн лæвæрдтой лæмбынæг дзуаппытæ. Журналисттæ фылдæр фарстытæ лæвæрдтой къорды солист Андрей Ропчеамæ. Пресс-конференци райдыдта традицион фарст Хуссар Ирыстонмæ сæ балцы тæлмæнты тыххæй.

«Мах Цхинвалмæ æрцыдыстæм æхсæвы. Дзæуджыхъæуæй Цхинвалмæ фæндаг у даргъ, мах федтам сыгъдæг Георгийы статуя, банызтам минералон дон дæр.

Махæн тынг цъус рæстæг уыд, цæмæй базонгæ уыдаиккам Ирыстонимæ, фæлæ уæддæр уайтагъд бамбæрстам, хуссарирыстойнаг адæм хæларзæрдæ кæй сты, афтæ ма уæм шофыртæ тагъд кæй скъæрынц, уый дæр», — загъта къорды вокалист Андрей Ропчеа.

— Куыд уæм кæсы, кæцы зарæгмæ байхъусын бафæнддзæн абон хуссарирыстойнаг сценæмкæсæджы. Æххæст æрцæудзысты уæ хуыздæр зарджытæ?

— Кæй зæгъын æй хъæуы, абон бирæ зарджытæ айхъуысдзысты Хуссар Ирыстоны, иууыл зындгондæр зарджытæ. Мæнмæ гæсгæ уæ зæрдæмæ фæцæудзысты. Мах сæххæст кæндзыстæм зарæг «AngeIs» дæр. Ацы зарæг у сабырдзинадхæссæг æрмæст Хуссар Ирыстонæн нæ, фæлæ æппæт дунейæн дæр.

— Кæд рацæудзæн уæ ног альбом?

— Нæ альбом хъуамæ рацыдаид дыууæ азы размæ, фæлæ, хъыгагæн, нæ рацыд. Рацæудзæн фæззæджы. Morandi кусын райдыдта æндæр продюсеримæ. Альбомы уыдзæн 20 зарæджы.

— Сымах фылдæр зарут англисагау. Цæмæннæ зарут румынаг кæнæ æндæр æвзæгтыл?

— Англисаг æвзаг æмбарынц æнæхъæн дунейы. Фæлæ махæн зарджытæ ис румынаг, португайлаг æмæ испайнаг æвзæгтыл дæр. Уыдонæн ссарæн ис интернеты.

— Сымах æрцыдыстут Хуссар Ирыстонмæ. Нæ тæрсут уæ ныхмæ санкцитæ бакæнынæй?

— Цæмæн нын хъуамæ бакæной нæ ныхмæ санкцитæ. Мах уыдыстæм Косовойы, Цæцæны. Цард ахæм у æмæ алы фæндагыл дæр хъуамæ рацæуай, алцыдæр фенай. Мах кæцы бæстæмæ фæхонынц, уырдæм ацæуæм.

Банысан кæнын хъæуы уый дæр, æмæ пресс-конференцийы рæстæджы журналистты æмæ уазджыты фарстытæ кæй тæлмац кодта къорды хайадисæг Кристина Хемей. Уый куы бафарстой, зæгъгæ, афтæ хорз уырыссаг æвзаг кæцæй зоны, уæд сдзуапп кодта: «Æз цæрын Молдовийы. Æмæ Молдовийы цæрджыты иу хай дзуры уырыссаг æвзагыл æмæ иннæ хай та — румынаг æвзагыл. Уайы афтæ æмæ мах кæй стæм Уæрæсе æмæ Румыны ’хсæн».

Андрей Чопреа ма радзырдта, зæгъгæ, йын ис йæхи студи. Музыкæ йын бауарзын кодта йæ мад, кæцы у музыкæйы профессор: «Мæ мад мæ æхсæзаздзыдæй райдыдта пианинойыл цæгъдын ахуыр кæнын. Æз хъуыды кодтон, зæгъын, уадз æмæ пианинойыл цæгъдын сахуыр уон. Фæлæ хæрзæвзонгæй райдыдтон фыссын музыкæ æмæ йæ бауарзтон». Уый ма загъта, зæгъгæ, сын, хъыгагæн, Хуссар Ирыстоныл азилынæн рæстæг нæ фæуыдзæн, дыккаг бон хæдтæхæгыл кæй хъуамæ атæхой, уымæ гæсгæ.

Банысан кæнын хъæуы уый дæр, æмæ ацы къорд сценæйыл кæй ис ныр 15 азæй фылдæр. Уыцы рæстæджы Morandi æртæ хатты райста номинаци «Хуыздæр зарæджы», «Хуыздæр ног æххæстгæнæг» æмæ «Хуыздæр кафт»-ы хорзæхтæ.

Джиоты Е.