Фос хъуамæ хынцыд æрцæуой

Хъæууон-хæдзарады министрады зонæнтæм гæсгæ республикæйы, куыд фермерон, афтæ хисæрмагонд хæдзарадты дæр нымадæуы ставдкъах фос 15 436 сæры бæрц.

Ивгъуыд аз Хицауады уынаффæмæ гæсгæ, уыдонæн хъуамæ арæзт æрцыдаид картотекæ. Куыд фермерон, афтæ хисæрмагонд хæдзарадты фосæн дæр сæ хъустыл конд æрцæудзæн сæрмагонд нысæнттæ идентификацион номыримæ. Хъæууон хæдзарады министрады хынцæн чиныгмæ хаст æрцæудзæн стуры тыххæй зонæнтæ, йе ‘нæниздзинады уавæр. Уый фæстæ æмбæлон гæххæтт лæвæрд æрцæудзæн стуры хицауæн. Фæлæ цæмæндæр бирæтæ не ‘ууæндынц ууыл.

Хъыгагæн, фæстаг рæстæджы адæмы ‘хсæн фосы тыххæй апарахат ахæм дам-думтæ, ома, фосæн картотекæ арæзт кæй цæуы, уый нысан кæны, цæмæй сын фидын кæной хъалон. Уыцы ныхæстæн кæй ницы бындур ис, уый тыххæй æрæджы фехъусын кодта Хъæууон хæдзарады министр Пухаты Лев дæр. Уый ма куыд загъта, афтæмæй нæ республикæйы разамынад архайы, цæмæй хъæууон фæллойгæнæгæн арæзт цæуа æппæт фадæттæ дæр ставдкъах фос фылдæр кæнынæн. Уымæй дарддæр фæнд кæнынц республикæйы фермерон æмæ хисæрмагонд хæдзарадтыл азилын, цæмæй бабæрæг кæной фосы сæ хицæуттæ цы уавæрты дарынц, исты низтæй рынчын сты æви нæ, уыдæттæ.

Хуссар Ирыстонæй Уæрæсемæ дзидза ласæн кæй нæй, «Россельхознадзор»-ы уынаффæмæ гæсгæ, уымæн йæ сæйраг аххосаг у, нырмæ дæр фос идентификацигонд кæй нæ цыдысты, уый. Ныр хъæууон хæдзарады министр куыд зæгъы, афтæмæй уыцы ниты фæзындтытæ аиуварс æрцæудзысты æмæ дзидзайы продукцийæн Хуссар Ирыстонæй ласыны бар уыдзæнис Уæрæсемæ. Кæй зæгъын æй хъæуы, ныр республикæйæн æддæмæ æрвитын хъæудзæнис гъæдджын продукт. Нæ республикæ та аграрон бæстæ кæй у, уымæ гæсгæ æппæт рæстæджыты дæр нæ хъæууон фæллойгæнджытæн сæ цард баст уыдис фосдард æмæ зæххы куыстимæ. Советон дуджы дæр фосæн арæзт цыд картотекæ. Иумиаг хæдзарадты цы фос дардтой, уый фыдызгъæлæй ницы тас уыд, уымæн æмæ рынчын фосæн нæ уыд уæй кæныны бар.

Зындгонд аххосæгтæм гæсгæ хъæууон хæдзарад фæстæмæ алæууыд. Нал ис колхозтæ æмæ совхозтæ. Цæрджытæн дæр фадæттæ нал уыд фосдард æмæ зæххы куыст кæнынæн. Фæлæ ныр нæ республикæйы разамынад мадзæлттæ исы, цæмæй ногæй райтынг уа хъæууон хæдзарад. Фермертæн фадæттæ цас амонынц, уымæй сын  æххуыс кæны паддзахад, цæмæй рæза хъæууонхæдзарадон продуктты æрконд.

Нӕ уацх.