Цæцæны республикæйы финансон æххуысæй нæ горæты раздæры кинотеатр «Ирыстон»-ы бынаты сырæздзæн Аивæдты скъола. Уый фæдыл 20-æм июлы нæ республикæмæ æрцыд Цæцæны республикæйы делегаци, йæ сæргълæууæг Национ политикæ, æддагон бастдзинæдтæ, мыхуыр æмæ информацийы министр Ахмед Дудаев, афтæмæй.
«Объект финансгонд цæудзæн Ахмат-Хаджи Кадыровы номыл регионалон æхсæнадон фондæй. Ацы хæрзаудæн акци здæхт у дыууæ республикæйы ‘хсæн æппæтварсон ахастытæ фæарфдæр кæнынæн. Цы аивæдты скъола сырæздзæн, уый хæсдзæн Цæцæны Республикæйы фыццаг президент Ахмат-Хаджи Кадыровы ном æмæ ахъаз кæндзæн Хуссар Ирыстон æмæ Цæцæны республикæты ‘хсæн дарддæр дæр хæларадон ахастытæ фидар кæнынæн. Махæн нæ ахастытæ нырæй фæстæмæ ахиздзысты ног æмвæзадмæ. Цæттæ стæм æрмæст культурæйы фадыджы нæ, фæлæ æндæр фæдыздæхты дæр æмгуыст æмæ æмархайд кæнынмæ. Уавæрæй пайдагæнгæйæ бузныг зæгъын уæ къухдариуæгад æмæ æппæт ирон адæмæн, уæ фæлмæн ахасты тыххæй», – загъта Ахмед Дудаев.
Гаглойты Алан фидæны фæлтæртæм ныффыста ныстуан æмæ йæ бавæрдта капсулæйы. «Æнæкæрон бузныджы ныхæстæ зæгъын не ‘фсымæр – Цæцæны Республикæйы президент Рамзан Кадыровæн ахæм стыр лæвары тыххæй. Ацы Аивæдты скъолайы цы сывæллæттæ ахуыр кæной, уыдонæн уыдзæн нæртон лæвар. Мæн ныфс ис, фидæны аивæдты скъолайæ кæй рацæудзæн курдиатджын ахуыргæнинæгтæ, Ирыстоны ном дардыл чи айхъуысын кæна, ахæм авивадон архайджытæ.
Скъола арæзт æрцæудзæн Ахмат Кадыровы номыл æхсæнадон фондæй, кæцыйы сæргъ лæууы Аймани Кадырова. Ацы фонд уый размæ та баххуыс кодта нæ барадхъахъхъæнæг органтæн. Æххуыс кæны æгас Цæгат Кавказæй Сæрмагонд æфсæддон операцийы хайад чи исы, уыцы хæстонтæн дæр», – дзырдта Гаглойты Алан.
Уый фæстæ Гаглойты Алан æмæ Ахмед Дудаев цытджын æгъдауæй бындур рывæрдтой Аивæдты скъолайæн.
УАЗÆГТЫ Марфа
