Цхинвалы хойрагисæн завод фæуæрæхдæр кодта йæ ассортимент. Ныр уый комбихоллæгтæй дарддæр уадздзæн сæрмагонд комбихæринæгтæ хуытæн, тæрхъустæ, гогызтæ, бабызтæ æмæ кæрчытæн. Куыстуаты разамонæг зæгъы, ног продукцийæ ныридæгæн кæй рауагътой фондз тоннæйы бæрц.
Паддзахадон унитарон куыстуат «Хойрагисæн комплекс», кæцы ныр ис Хъæууон хæдзарады министрады дæлбар, йæ куыст æрурæдта 2018 азы, бюджеты раз ыл стыр хæстæ кæй уыд, уый аххосæй. Хъæууон лæгæн иттæг ахсджиаг у куырой. Нæ республикæйы цы арендатортæ ис, уыдонæй бирæтæ кæнынц нæмыгон культурæты куыст. Сæ тыллæг кæм среализаци кодтаиккой, уый сын нæ уыд, хойрагисæн комплекс кæй нæ куыста, уый аххосæй. Раздæр фермертæ сæ фосæн комбихоллаг ссадтой ацы куыстуаты. Уыцы-иу рæстæджы-иу æрыссадтой цалдæр хуыз хойраг, кæрæдзимæ сæ хæццæ кодтой æмæ уыцы компоненттæй арæзтой фосæн комбихоллаг.
«Апрелы мæйы скусын кодтам нæ комплекс Хицауады уынаффæмæ гæсгæ. Уый стыр æххуыс у хъæууон хæдзарады райрæзтæн. Ныртæккæ нæ куыстуаты хъомысад у иу сахатмæ дыууæ тоннæйы комбихоллаг уадзын. Ныр нæ фермерты се стуртæн Цæгат Ирыстон-Аланийæ нал хъæуы комбихоллаг ласын. Нæхимæ уагъд продукцийæ пайда кæныны уавæр сын ис кæддæриддæр. Нартхор, хъæбæрхор, мæнæу, сысджы æлхæнæм бынæттон арендатортæй. Æрмæст мæм ис иу домæн, цæмæй нын уæй кæной хæрзгъæд хойраг», – зæгъы куыстуаты директор Къудухты Давид.
Куыстуат цы комбихоллаг уадзы, уый гъæд бæрæг кæнынц лабораторийы. Къудухы фырт ма куыд зæгъы, афтæмæй сæ заводы æвæрд æрцыд, 1,8 мин килограммы суткæйы чи ссы, ахæм уæлдæр, 1-аг æмæ 2-аг сорты ссадыссæн куырой дæр. Цæстдард цæудзæн ссады гъæдмæ дæр. Æппæт бæрæггæнæнтæ нысан кæндзæн компьютер. «Фæлхасгæнджытæ алы хатт дæр фæагурынц бынæттон ссад. Мах сын уыцы гаранти ратдзыстæм. Нырма уал нæ продукцийы бæрц афтæ бирæ нæ уыдзæн, фæлæ адæм куы бамбарой, цы уадзæм, уый хæрзгъæд кæй у, уæд мах дæр нæ куыст фæактивондæр кæндзыстæм. Ныртæккæ куыстуаты фæллой кæнынц цыппар фæлтæрд кусæджы. Фидæны нæ архайд куы райтынг уа, уæд бакæндзыстæм дыууæ сменæ. Ныртæккæ цы продукци уадзæм, уыдоныл хорз æххæссынц, чи нæм кусынц, уыдон», – зæгъы Къудухты Давид.
Куыстуат йæхицæн сараздзæн бренд, йæ ном фыст уыдзæн къоппытыл, цæмæй йæ магазинты тæрхджытыл фæлхасгæнæг æнцонтæй ссара, цалынмæ сын сæхи магазин нæ фæзына, уæдмæ.
Комбихоллаг цы продукцийæ уадзынц, уыцы компоненттæ завод сæйраджыдæр æлхæдта Знауыры районы арендатортæй. Фæлæ июны мæйы цы ихуард уыд, уый тынг бахъыгдардта Знауыры районы тыллæгæрзад. Кæд бынаты цы продукци балхæной, уый фаг нæ уа, комбихоллаг уадзынæн, уæд уал рæстæгмæ æрласдзысты Беларусийæ. Уый тыххæй сын ис æмбæлон бадзырдтæ.
УАЗÆГТЫ Марфа
