Алтайы республикæйы ацы бонты йæ куыст райдыдта дунеон фæсивæдон фестиваль «Манжерок», зæгъгæ, æмæ дзы хайад исынц хуссарирыстойнаг фæсивæд дæр. Ацы фæсивæдон фестиваль æрбангом кодта дунейы 15 бæстæйы рæзгæ фæсивæды минæвæртты.
Фестивалы фыццаг бон йæ хайадисджытимæ фембæлд Уæрæсейы Паддзахадон Думæйы депутат Роман Птицын. Уый йæ раныхасы фыццаджыдæр банысан кодта фестивалы нысаниуæджы тыххæй, афтæ ма йын цымыдисон æмæ хъæздыг программæ кæй бацæттæ кодтой, уый. Дунейы бæстæты фæсивæд уæрæхмасштабон мадзæлтты ног зонындзинæдтæ кæй райсдзысты æмæ дзы ног хæлæрттæ сæхицæн кæй ссардзысты, уый дæр банысангонд æрцыд депутаты раныхасы.
«Фестивалы программæ у хъæздыг æмæ æнæмæнг ногæй цыдæртæ базондзыстут уæхи пайдайæн. Алтайы бæстæйы ис ахæм æмбисонд, зæгъгæ, адæймаг адæймагæй хъæздыг у, æмæ уын уый тыххæй та мæ ныхас у, цæмæй ацы цалдæр боны мидæг сымах уæхицæн ссарат хæлæрттæ æмæ кæрæдзийæн аргъ кæнат бирæ азты дæргъы. Мæ зæрдæ уын зæгъы, цæмæй уæ фестивалы рæстæджы æрмæстдæр райсат позитивон æмæ хъæлдзæг эмоцитæ. Уæ алыварс ис алæмæттаг æрдз æмæ уыцы рæсугъддзинадæй дæр æнæмæнг уæ зæрдæтæ барухс уыдзысты», – банысан кодта Роман Птицын.
Фестивалы уазджытыл ма уыцы бон арфæйы ныхæстимæ сæмбæлд Евразиаг æмгуыстад æмæ интеграцийы фонды генералон директор Николай Журавлев дæр. Уый дæр ахсджиагыл банымадта, фестивалы куыст кæй сног кодтой æмæ банысан кодта, азæй азмæ йæ хайадисджыты нымæц кæй фылдæр кæны, уый.
Ацы аз æрбамбырд кодтам медиа-индустрийы минæвæртты: журналистты, блогерты æмæ æндæр ахæм куыстыл лæуд фæсивæды. Мах ахсджиагыл нымайæм, цæмæй сымахæн базонын кæнæм, Еврази цы у æмæ мах куыд уынæм абон интеграцион проекттæ Евразиаг тыгъдады, афтæ ма уыцы процесстæ, кæцытæ уæ бæстæты æмбæстæгтæн хуыздæр цæрыны тыххæй фадат дæттынц», – йæ раныхасы банысан кодта Николай Журавлев.
Фестиваль байгом кæныны цытджын церемонийы мадзæлтты æмрæнхъ ма уазджытæн равдыстой документалон кино «Евразия. Азбука общей истории», зæгъгæ, ахæм номимæ.
Дарддæр фестивалы хайадисджытæм æнхъæлмæ кæсы цымыдисон программæ æндæр æмæ æндæр мадзæлттимæ. Цалдæр боны æмгъуыдмæ фæсивæд хайад исдзысты дискусситы æмæ конкурсты.
Кæронбæттæны фæсивæдæн сорганизаци кæндзысты медиа-тур æмæ базонгæ уыдзысты бæстæйы фенддаг бынæттимæ дæр.
Нæ уацх.
